IGIHE

Ikigo cya Ellen DeGeneres mu Rwanda kigiye gutangira kubakwa

0 10-02-2019 - saa 11:10, IGIHE

Mu Cyumweru kigiye gutangira ku wa Mbere tariki 11 Gashyantare, mu Karere ka Musanze hazatangizwa kubaka ikigo cy’umunyamerika Ellen DeGeneres kigamije kubungabunga ingagi zo mu birunga.

DeGeneres ni umugore w’imyaka 61 wamamaye muri Leta Zunze Ubumwe za Amerika kubera ikiganiro cyamwitiriwe kuri Televiziyo kizwi nka ‘The Ellen DeGeneres Show’.

Mu Cyumweru gitaha nibwo hazashyirwa ibuye ry’ifatizo ku Kigo Ellen DeGeneres yemeye kubaka mu Rwanda.

Icyo kigo ni impano yahawe n’umufasha we Portia de Rossi (bombi babana ari abagore) umwaka ushize ubwo yuzuzaga imyaka 60 y’amavuko.

Ellen usanzwe yarihebeye kubungabunga inyamaswa, amaze guhabwa iyo mpano yahise aza mu Rwanda kwirebera ibikorwa bya Dian Fossey mu kubungabunga ingagi zo mu mu birunga.

Yahise atangira ibikorwa byo gukusanya inkunga igamije gushinga ikigo mu Rwanda kizibanda ku bushakashatsi bugamije kubungabunga ingagi zo mu misozi miremire ziri gukendera ku Isi.

Umuyobozi w’Ikigega Dian Fossey Gorilla Fund International, Felix Ndagijimana, yabwiye The New Times ko kubaka icyo kigo bizatanga imirimo ku bantu 1500.

Ati “ Turateganya gutanga imirimo ku bantu 1500 (40% ikazahabwa abagore) kandi miliyoni ebyiri z‘amadolari azakoresha ku bakozi b’imbere mu gihugu n’ibicuruzwa. Turateganya ko miliyoni 2.5 z’amadolari azakoreshwa mu kugura ibikoresho bizubakishwa kandi ibyo bikoresho bizaturuka mu bilometero bitarenze 250 uvuye ahari kubakwa.”

Muri icyo kigo ni naho hazaba hari ibiro by’ ikigega Dian Fossey Gorilla Fund kimaze imyaka isaga 50 gikorera mu Rwanda binyuze mu gashami kacyo gashinzwe ubushakashatsi ka Karisoke Research Centre mu Karere ka Musnze.

Ikigega Dian Fossey Fund ni kimwe mu miryango mpuzamahanga ikomeye mu bijyanye no kubungabunga ingagi.

Ndagijimana yavuze ko ikigo cya DeGeneres ari amahirwe. Ati “Ikigo cya Karisoke cyakoreraga mu nzu gikodesha ahantu hadahagije . Giherereye kandi kure ya Pariki y’Ibirunga kandi mu birunga ariho ibikorwa byacu bibera.”

Ndagijimana yavuze ko icyo kigo kizaba kirimo laboratwari, ibyumba by’inama, ibyumba byo kwigishirizamo, inzu ndangamateka ivuga kuri Dian Fossey n’ibindi.

Yemeje ko icyo kigo kizashimangira ubushake bw’u Rwanda mu kubungabunga urusobe rw’ibinyabuzima no guteza imbere ubumenyi.

Biteganyijwe ko ikigo gishya kizafungura imiryango ku mugaragaro mu ntangiriro za 2021.

Igishushanyo mbonera cy'Ikigo Ellen DeGeneres agiye kubaka mu Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza