Isi ikomeje kugaragaramo urwangano n’amakimbirane nyamara abayituye bafite ubuhanga, basoma, bazi neza ibikwiye kuyiganisha mu mudendezo.

Umuntu atiriwe ajya mu mvugo z’abahanga, ibyo bavuga binahura n’amwe mu magambo aboneka mu bitabo bikurikirwa na benshi mu myemerere yabo, yaba muri kowani y’abayisilamu no muri bibiliya y’abakirisitu; bose bafite aho bahurira mu kubuza abayoboke babo kuvuga nabi cyangwa gukoresha amagambo mabi yateza umwiryane mu batuye isi.

Ariko se kuki urwango rukomeza? “Yewe (Muhamad), bwira abagaragu banjye bakoreshe imvugo nziza kuko shitani arabateranya, rwose shitani ni umwanzi ugaragara w’Umuntu. isura yitwa “Al-Isra 17:53” ; Indirimbo ya karahanyuze mu Rwanda iti “Nujya ku isoko ugure inyama iryoshye kurusha izindi, undi agura inyama y’ururimi ”; “Ijambo ryose riteye isoni, ntirigaturuke mu kanwa kanyu ahubwo uko mubonye uburyo mujye muvuga iryiza ryose ryo gukomeza abandi kugira ngo riheshe abaryumvise umugisha ”, Abefeso 4:29

Ko abenshi ku Isi ari abasenga kuki barenga bakarangwa no gukoresha amagambo ateza umwiryane mu Isi, bagatuma idatekana kubera ibikorwa byabo by’ubwenge, umunwa, amaboko n’ibindi.

Inyungu bwite zarenze kure inyungu rusange, usanga umunu umwe ashobora kwica abantu benshi kubera ikibazo cye bwite gusa, ingero z’ibibera ku isi ni nyinshi aho usanga yuzuye ubwangizi.

Uwitwa Stephen Paddock yarasiye abantu kuri hoteli ya Mandalay Bay, hagwa inzirakarengane mirongo, bakomereka amagana, arangije nawe arirasa; ahandi ugasanga umwiyahuzi yiturikirijeho igisasu agahitana inzirakarengane, bamwe biyitirira imyemerere y’idini runaka abandi bakabikora ntihamenyekane impamvu.

Impamvu zikomeye zikomeza gukongeza urwango ku Isi

Ukwibona no kwiyumva

Kuwa 19 Nzeli 2017 ubwo habaga inama y’Umuryango w’Abibumbye , mu ijambo ritari ryitezwe n’uwo ariwe wese ko ryavugwa n’Umuyobozi ukomeye w’igihugu cy’igihangange kandi rikavugirwa ahantu nka hariya, Donard Trump araterura ati “…..Nzakuraho cyangwa nzasenya Koreya y’Amajyaruguru” ndetse anakomeza yibasira Iran.

Ahanini mwene izi mvugo nta kindi ziba zigamije uretse gukongeza intambara no gukurura ariko by’umwihariko no gutuma abanyagihugu barebana ay’ingwe, bigakurura ubwicanyi bwa hato na hato.

Nk’aho ni ho uzasanga bamwe bashaka uburyo bwo kwirwanaho, Koreya ya Ruguru ikigwizaho ibitwaro bya kirimbuzi byakoreka Isi, kuvuka kw’imitwe y’ibyihebe n’ibindi.

Rimwe na rimwe uzanumva abaturage b’igihugu iki n’iki biciwe aha, bafashwe bugwate, bashimuswe cyangwa bagabye ibitero aho abantu bari mu bikorwa runaka.

Mu minsi ishize na none hongeye kumvikana amagambo y’irondaruhu muri Amerika ku bakinnyi ba Basketball nabwo bitewe n’imvugo zikarishye, ibi kandi no mu mupira w’amaguru byagiye bibaho.

Gushaka kwigira umupolisi w’Isi

Ni kenshi ibihugu bijya bigirana amakimbirane ndetse bikanarenga imbibe bikagera naho za Ambasade zifungwa n’ababihagarariye bakirukanwa kubera gusa umwuka mubi watewe no kuba igihugu kimwe gishaka gutegeka ibindi no kugiha amabwiriza gikurikiza no kuyoboka imwe mu mirongo ya politiki. Ikibabaje iyo mirongo yirengagiza ko n’ikindi gihugu gihatirwa kuyiyoboka bitandukanye n’icyerekezo gifite, amahitamo y’abaturage n’ibindi. Nyamara uzumava abo bashaka ko ibyabo ari byo biyobokwa aribo batanga amasomo ya ‘demokarasi”!

Igihugu runaka cyanze ayo mabwiriza, iyo kigikenera inkunga zishobora guhagarikwa.

Ariko se wasobanura ute ukuntu umuntu akunda abanyagihugu b’igihugu runaka kuruta ba nyira cyo? Binagera n’aho gitera hitwajwe isura ya demokarasi.

Ukwibasira imyemerere y’abantu runaka

Hari abiyambika isura y’imyemerere y’idini nta kindi bagamije uretse gukongeza urwango ku isi no kugaragaza isura mbi y’abo yiyitiriye. Ibi nabyo bikagira ingaruka ku mutekano w’Isi, abaturage n’ibihugu biturukwamo na bamwe muri abo bitiriwe iyo myemerere bagahabwa akato gukandagira mu gihugu bashaka. Twumva cyane ibitero by’abiyahuzi biyitirira imyemerere y’idini ya Islam.

Ubujiji mu myemerere

Usobanura ute ko umuntu ashobora kwica inzirakarengane yishingirkirije inyigisho n’imyemerere y’idini runaka? Nta gitangaza ko umuntu ashabora gukangurira no kwigisha abandi kwica inzirakarengane ashingiye ku nyigisho z’imyemerere y’idini runaka kuko akenshi abo babikora nabo aba ari abahanga bazi guhitamo bamwe mu bafite intege nke mu myemerere, bakennye cyangwa bafite ibindi bibazo byabo bwite n’inyungu runaka.

Nyamara nta dini na rimwe ryigisha ko kwica inzirakarengane ari byiza ahubwo usanga yose ahurira mu kwigisha amahoro, ubumwe, ubwiyunge, gukundana, kutamena amaraso n’ibindi. Ababikora bo bashingira ku ki?

Mu Rwanda mu gihe cya Jenoside yakorewe Abatutsi 1994, hari bamwe bijanditse mu bwicanyi hifashishijwe imirongo n’inyigisho za Bibiriya nyamara abazibigishije bari bazi impamvu babikora, bari bazi neza abo bazigisha ko bafite intege nke mu myemerere, ari injiji, ko bamira bunguri badashunguye.

Ubu mu bihugu bimwe hari abigishwa buhumyi korowani, bakavamo ibyihebe ngo bararwana ku idini y’ukuri.

Wazirikana ibi “Ubu twamaze kumenya kuguruka mu kirere nk’inyoni, no kuba mu nyanja nk’amafi, igisigaye ni ukwiga kuba ku isi nk’abantu”, George Bernard Shaw

Ngiki icyananiye abantu kubera ubushake buke no kubera inyungu zabo bwite (Ukwikunda) kuko ibyari bikomeye twarabyize turabimenya, turanabikora nyamara ibyoroshye byaratunaniye (kubana mu bwubahane nk’abantu).

Mahatma Gandhi we yagize ati “Ijisho nirihorerwa irindi, isi izaturwaho n’impumyi gusa” naho Albert Einstein yungamo ati “Amahoro ntashobora kuboneka hakoreshejwe imbaraga (ingufu) ahubwo agerwaho biciye mu kumva kimwe ibintu/kumvikana.”

Ndagijimana Ibrahim, Impuguke akaba n’umusesenguzi muri Politike, Ubuyobozi n’Imiyoborere Myiza

Ndagijimana Ibrahim, Impuguke akaba n’umusesenguzi muri Politike, Ubuyobozi n’Imiyoborere Myiza; ari gukorera impamyabumenyi y’ikirenga (PhD) mu ishami ry’Ubuyobozi n’imiyoborere myiza muri Jomo Kenyatta, University of Agriculture and Technology (JKUAT).


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved