IGIHE

Uko hakwiriye ikinyoma kivuga ko Col. Kanyarengwe yapfuwe umusatsi n’Inyenzi

14 28-06-2019 - saa 13:57, Tom Ndahiro

Hari mu ntangiriro za Gicurasi 1991 ubwo twahuriraga mu nama yatumijwe na Perezida wa FPR-Inkotanyi, Colonel Alexis Kanyarengwe. Ingingo imwe rukumbi yari ugutangira kwa Radio y’Inkotanyi, icyo igamije uko igomba gukora ndetse n’uko igomba kwitwa.

Nyuma yo gutanga amazina atandukanye n’impamvu iyo Radiyo ikwiye kwitwa, uwatanze izina ryaje kwemerwa yari Perezida w’Inkotanyi Col. Kanyarengwe. Yarateruye aravuga ati “njye nsanga radiyo yacu ikwiye kwitwa Muhabura”. Atarasobanura nari nzi ko ahisemo iryo zina kubera ko iyo radiyo yagombaga gukorera hafi y’ikirunga cya Muhabura.

Siko byari bimeze. Chairman Kanyarengwe yasobanuye neza impamvu ahisemo iryo zina, avuga ko iyo radiyo izaba ijwi rya FPR/RPF, izakora akazi gakomeye ko guhabura abanyarwanda kuko benshi bahabye (bataye icyerekezo cy’aho bagomba kujya).

Nibwo bwa mbere nari numvise impamvu kiriya kirunga kiri hagati y’u Rwanda na Uganda cyiswe Muhabura. Ni ikirunga cyafashaga Abanyarwanda bahabye kubera ko kigaragara ahantu hanini mu gihugu. Kubera iyo mpamvu umuntu, yashobora kukibona kigatuma amenya inzira n’icyerekezo agomba kunyuramo.

Chairman yasobanuye byinshi kandi byumvikana, bituma iryo zina ryemezwa, atari uko ari irivuze mukuru gusa, ahubwo ko kwari ukuri kuganisha mu cyerekezo. Abataragize amahirwe yo gukurira mu Rwanda twahigiye byinshi.

Nibutse izina rya Radiyo Muhabura, ni uko ryaje, kubera ikibazo u Rwanda rwari rwaragize cyo kugwingira kw’imitekerereze y’abanyarwanda cyane cyane abayobozi. Ni abo bayobozi bahimbye ibinyoma byinshi byagiye bikwira henshi kandi ugasanga abantu barabyemera.

Umusatsi wa Kanyarengwe

Muri iyo nama bwari nk’ubwa gatatu nicaranye na Perezida wa FPR. Ubwa mbere hari mu mpera za Ukuboza 1990. Aho twahuriye hari ahantu yadutumije, ari mu ishyamba munsi y’ikirunga cya Gahinga. Uretse ibyahavugiwe, nari mfite amatsiko yo kumubona, cyane cyane ku mutwe we.

Nagize ibyago biba ari mu ijoro, kandi yambaye ingofero itwikira amatwi akaba anambaye n’igikote kigera hejuru y’irugu. Hari impamvu nashakaga cyane kureba umutwe we.

Izina Col. Kanyarengwe naryumvise bwa mbere mu 1980 amaze guhungira muri Tanzania, aho natwe twari dutuye nk’impunzi zihafite uburambe.

Dutangira kumva ko Col. Kanyarengwe yavuze ko ngo azabana n’Abatutsi ari uko yameze umusatsi aho Inyenzi zamukuruye zikoresheje ijipe.

Nkibyumva bwa mbere, nari nagiye mu kiruhuko ahari iwacu icyo gihe. Nabajije umwarimu w’Umunyarwanda twari duturanye aho ibyo bintu yabyumviye, ambwira ko yabyumvise kuri Radio Rwanda nyuma yo guhunga kwa Col. Kanyarengwe.

Sinongeye cyane kwita kuri iryo zina rya Col. Kanyarengwe kuko ubuzima bwe bwamurebaga nanjye mfite ubwo ngomba kubaho mu buhunzi duhuriyeho.

Nongeye kwita ku izina rye mbonanye na Aloyisia Inyumba i Dar es Salaam wari wabonanye na Col. Kanyarengwe akamukangurira kuba umunyamuryango wa FPR-Inkotanyi. Hari mbere ya Ukwakira 1990.

Ikibazo cya mbere nabajije Inyumba ni ikijyanye n’umusatsi wa Col. Kanyarengwe, n’uburyo yamwakiriye kandi ari mu bo Kanyarengwe yari yararahiriye kutazumvikana nabo.

Inyumba yarasetse cyane ati “Ndahiro koko utangiriye aho utanambajije uko namugezeho n’ibyo twaganiriye”? Namubwiye ko njye mfite amatsiko azamarwa n’uko mwiboneye.

Inyumba yarushijeho kuntera amatsiko ubwo yambwiraga ko nawe ayo matsiko yari ayafite ariko abonana na Col. Kanyarengwe akaba yarasanze yambaye ingofero iyi bakunze kwita iy’Abayisilamu.

Ati kandi kubera ko njye atari cyo cyari cyanjyanye twaganiriye kubiremereye kurusha umusatsi. Nanjye mubwira ko amatsiko y’umunyamakuru atitesha inkuru ishyushye.

Kubera ko mu nama ya mbere ntacyo nabonye kijyanye n’inkovu yo ku mutwe wa Chairman, twongeye kubonana kandi (mbere yo kwita Muhabura) nabwo akaba yari yambaye ingofero itwikira igice kinini cy’umutwe. Nigeze kubaza umwe mu bamurindaga impamvu “Mzee” yambara ingofero igihe kinini ambwira ko ari ukubera umutekano cyangwa imbeho nyinshi iyo ari mu birunga. Nirinze kumubwira icyo mubarije.

Kubera ko ibyakorwaga byari byinshi, nageze aho ndabyibagirwa nkomeza kwita ku bifite uburemere buruta amatsiko yanjye. Amatsiko yaje gushira mu mpera za Gashyantare 1993 ngendanye na Chairman wacu mu ndege kuva i Kampala kugera i Bujumbura.

Mu ndege yakuyemo ingofero kandi nari nicaye hafi nditegereza mbura ahapfutse umusatsi, mbura n’inkovu. Nashize amatsiko by’amashirakinyoma turi mu nama i Bujumbura aho nabonye neza agace ntari nitegereje turi mu ndege.

Icyo kinyoma cyaturutse he?

Mu mutwe wanjye hajemo ikibazo cy’inkomoko y’icyo kinyoma. Uko byaje n’aho byakomotse nicyo cyanzonze. Nta wundi nari kukibaza uretse nyirubwite, Col. Alexis Kanyarengwe, akaba Perezida wa FPR-Inkotanyi. Eh! S’il vous plaît!

Mu minsi twamaze i Bujumbura nirinze kugira icyo mubaza. Tugeze i Dar es Salaam, yampamagaye mu cyumba cye aho twari ducumbitse muri Kilimanjaro Hotel.

Hari icyo yashakaga kuntuma ku muntu w’umunya-Tanzania. Naratumitse, ngarutse kumuha ubutumwa mfunga umwuka mubaza inkomoko y’ibyamuvuzweho kandi nkaba narabonye atari ukuri.

Yarasetse cyane ambwira mu giswahili ati: “Ndugu yangu, siasa za Rwanda tunazopiga vita zina uongo mwingi sana”. Ibi bigasobanura ngo “Muvandimwe, politiki z’u Rwanda turwanya zibamo ibinyoma byinshi cyane”. Ntiyansobanuriye icyo ashatse kumbwira kuko umwanya wari muto.

Nyuma ya Jenoside yakorewe Abatutsi nongeye kumubaza icyo kibazo. Yansobanuriye mu magambo arambuye ariko nahinira mu gisobanuro kigufi. Leta ya Juvenal Habyarimana yari yarakoreye, yibukaga ko Col. Kanyarengwe ari mu basirikare barwanyije Inyenzi mu 1963/4.

Ahunze bahimba ikinyoma kimusibira amayira, bigatuma Abanyarwanda asanze mu mahanga bamuha akato aho gusangira nawe umubabaro w’ubuhunzi kimwe.

Icyo kinyoma cyarakoze kuko Col. Kanyarengwe yabayeho mu buhunzi ari nyakamwe kubera ikinyoma. Inkomoko y’ikinyoma si ubutegetsi bw’Ikinani, ahubwo ni ijambo rya Anastase Makuza ryo mu 1964.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Ishimwe Philb 2019-08-14 00:56:54

Mwakoze cyane kubw’iyo nkuru; ni amateka mudusangiza tutamenye.
izo nkovu za Kanyarengwe ni ukubeshya.
mu byukuri yahoze ari umusirikare ukomeye; sinumva uko yafatwa byasaba ingabo nyinshi.
uretse ibyo; ruriya ruhara ni karande; mu muryango wabo barumera kare. jye naramwiboneye ku itabaro rya papa (1998) ntago ark inkovu ni uruhara: ubihakana azarebe benewabo aho rubageze.
Ndashima Tom kuri iyi nkuru; jya udusangiza n’izindi ku banyabwenge nka bariya; Rwigema,...

2
Mark Manzi 2019-06-30 03:40:30

Bwana Tom, urakoze cyane. Hanyuma se ubwo nta kuntu watubwira neza kuri Anastase Makuza?

3
Kalibutwa 2019-06-30 02:28:09

Intambara y’inyenzi ntabwo yarangiye muri 1964 ayarangiye muri 1967.Kandi ibintu abantu bose bagombye kumenya ntabwo ari leta ya Kayibanda yise abo bantu inyenzi ntituzagwe mu ruzi turwita ikiziba.

4
Gahama 2019-06-29 05:45:51

Anastase Makuza yari umuntu wumugabo unasobanutse. We yari yarasomye ureke abandi bapacapacaga.Iyo yibereye buriya areba ibibera mu gihugu cye akisekera gusa.

5
Gahama 2019-06-29 05:45:51

Anastase Makuza yari umuntu wumugabo unasobanutse. We yari yarasomye ureke abandi bapacapacaga.Iyo yibereye buriya areba ibibera mu gihugu cye akisekera gusa.

6
Amos 2019-06-29 04:16:36

Muvandi ibyo utubwiye simbyemeranyaho nawe kuko najye icyo gihe nabyumva kanyarengwe atarahunga ntabwo byavuzwe ari uko ahunze oya yarakubenshye ntabundi busobanuro yarikuguha

7
Amos 2019-06-29 04:16:35

Muvandi ibyo utubwiye simbyemeranyaho nawe kuko najye icyo gihe nabyumva kanyarengwe atarahunga ntabwo byavuzwe ari uko ahunze oya yarakubenshye ntabundi busobanuro yarikuguha

8
[email protected] 2019-06-29 01:56:07

Bwana Ndahiro urakoze kutwungura ubumenyi. Niba bishoboka uzanatuganirire ku iherezo rye. Ndavuga imibereho yamuranze mbere gato y’uko yitaba Imana. Murakoze.

9
g 2019-06-29 01:32:29

Ibya KANYARENGWE n’umusatsi we n’inyenzi nabyumvise niga muri primaire, none ubu mfite imyaka 55. Ahubwo komeza ubushakashatsi, umenye neza koko aho byavuye. Kandi abarikumwe icyo gihe cya za 60 baracyariho. Gira vuba ahubwo bataragucika kuko ubu bashigaje amazuba macye.

10
g 2019-06-29 01:32:01

Ibya KANYARENGWE n’umusatsi we n’inyenzi nabyumvise niga muri primaire, none ubu mfite imyaka 55. Ahubwo komeza ubushakashatsi, umenye neza koko aho byavuye. Kandi abarikumwe icyo gihe cya za 60 baracyariho. Gira vuba ahubwo bataragucika kuko ubu bashigaje amazuba macye.

Paji: 1 | 2  

Kwamamaza