IGIHE

Ubutumwa bw’Umuhuzabikorwa w’Umuryango w’Abibumbye mu Rwanda ku Munsi Mpuzamahanga w’Abagore

1 8-03-2019 - saa 12:14, Fodé Ndiaye

Muri iki gihe cy’impinduramatwara ya Kane mu by’inganda, guhanga udushya byahindutse inkingi ya mwamba mu iterambere ry’igihugu mu buryo butigeze bubaho mu mateka.

Iterambere mu by’ikoranabuhanga ni uburyo bushya na gahunda bigamije gutuma abaturage barushaho kwegerana no guhindura ubuzima bw’abatuye Isi barimo na miliyoni z’abagore n’abakobwa. Bidufasha kubakira hamwe ejo heza twifuza, ejo huje icyubahiro, uburinganire n’uburumbuke kuri bose.

Kuri uyu Munsi Mpuzamahanga w’Abagore, mu gihe twizihiza abagize igice kinini cy’umuryango wacu, bubaka imiryango yacu kandi bakaba ingenzi mu mpinduka zifite intego, uyu ni umwanya mwiza n’amahirwe yo gutekereza mu buryo bwagutse kugira ngo tubashe kwihutisha uburinganire.

Nk’uko byashimangiwe n’Umunyamabanga Mukuru w’Umuryango w’Abibumbye, Antonio Guterres, bikwiye gushyirwa ku mwanya wa mbere.

Yagize ati “Ugendeye ku muvuduko uhari, bizasaba ibinyejana bibiri kugira ngo tubashe kuziba icyuho mu buringanire mu by’ubukungu. Sinakwemera Isi ibwira abuzukuru banjye b’abakobwa ko uburinganire mu birebana n’ubukungu buzategereza abuzukuru b’abuzukuru babo.”

Uyu mwaka dufite insanganyamatsiko igira iti “ Think Equal, Build Smart, Innovate for Change” (Zirikana uburinganire, byubakireho uhange udushya uzana impinduka). Ndasaba abashinzwe gushyiraho amategeko, abayobozi mu nzego zose n’abaharanira impinduka kubyaza amahirwe ubushobozi buhambaye dufite binyuze muri uku guhanga udushya. Nibwo tuzabasha kuzana ibisubizo bikuriraho imbogamizi abagore n’abakobwa, by’umwihariko abasigaye inyuma cyane.

Ni ingenzi cyane kugaragaza uruhare rw’uburezi muri iyi nsanganyamatsiko y’uyu mwaka. Birasaba guhindura imyumvire, gukuraho imipaka mu bumenyi, kuba abanyabwenge no guhanga udushya, ariko kugira ngo uru rugendo rubashe guhura neza n’uburinganire hagati y’abagore n’abagabo, mureke tugire abakobwa benshi bakurikirana amasomo y’ubumenyi, ikoranabuhanga n’imibare.

Mu gihe kandi duharanira kugira Isi yuje uburinganire hagati y’abagore n’abagabo nk’uko biri mu ntego za 2030, twubakiye ku byo twagezeho, ntitwibagirwe inkomoko y’uyu munsi.

Umunsi Mpuzamahanga w’Abagore wakomotse ku mashyirahamwe y’abakozi muri Amerika ya Ruguru n’u Burayi mu ntangiriro z’ikinyejana cya 20.

Aya mashyirahamwe yashakaga kugaragaza ibibazo abagore bahuraga nabyo birimo gukorera ahantu habi, umushahara muto no kutagira uburenganzira bwo gutora. Ibi byatumye hashyirwaho Umunsi w’Abagore wizihijwe bwa mbere mu 1909.

Mu myaka yakurikiyeho, ibihugu bigize Umuryango w’Abibumbye byiyemeje gukora impinduka nyinshi zigamije uburinganire, zirimo nk’Amasezerano ku gukuraho burundu ivangura ryose rikorerwa abagore (1979), Amasezerano yo mu 1993 ku gukuraho ihohoterwa rikorerwa abagore, ayasinyiwe i Beijing mu 1995 ashyiraho urubuga rw’ibikorwa ndetse n’imyanzuro y’Akanama k’Umuryango w’Abibumbye gashinzwe umutekano ku birebana n’abagore, amahoro n’umutekano.

Izi ntego mpuzamahanga ndetse n’izindi zo ku rwego rw’akarere n’igihugu, ziyobora urugamba rwo kurwanya ihohoterwa rishingiye ku gitsina, ikibazo cyibasira umugore umwe muri batatu ku Isi.

Bituma kandi bigaragara ko bishoboka mu gihe abagabo n’abagore bahabwa amahirwe angana mu by’ubukungu, Umusaruro mbumbe w’Isi wagera kuri miliyari ibihumbi 28 by’amadolari buri mwaka, ubukungu bw’Isi bukiyongeraho kimwe cya gatatu. Uyu mubare ukubye inshuro ziri hagati y’enye n’eshanu amafaranga akenewe kugira ngo Intego z’iterambere rirambye (SDGs) zigerweho .

Niyo mpamvu uburinganire hagati y’abagore n’abagabo atari uburenganzira bwa muntu gusa ahubwo ari n’ingenzi ku bukungu. Nta ngamba n’imwe yazana impinduka nziza nk’izi ku izamuka ry’ubukungu bwacu.

Byagira uruhare mu gutuma bose bagera kuri serivisi, barimo n’abagore miliyoni 740 babaho babikesha imirimo iciriritse. Gushyira mu bikorwa ziriya gahunda zose bitanga ishusho isobanutse y’urugendo rugana iterambere, nk’uko bigaragazwa n’ingero z’ibihugu bitandukanye nk’u Rwanda.

Ibyo u Rwanda rwiyemeje kugeraho bikubiye muri Cyerecyezo 2050 na Gahunda ya guverinoma y’imyaka irindwi, bigaragaza uburinganire nk’igipimo cyo kugera ku ntego igihugu cyihaye.

Uruhare rw’abagore mu bikorwa bifitanye isano no kubaka amahoro, imiyoborere n’ubuyobozi, bituma iterambere ry’ubukungu kuri bose ribasha kugerwaho.

Nk’uko byagaragajwe n’Ikigega Mpuzamahanga cy’Imari, IMF, umusaruro mbumbe w’u Rwanda wazamutse ku gipimo cya 2.2% kurusha ibindi bihugu bya Afurika y’Iburasirazuba no munsi y’Ubutayu bwa Sahara hagati ya 2005 na 2014, kandi kimwe cya kabiri cy’iri janisha cyagezweho kubera imbaraga zashyizwe mu guteza imbere uburinganire.

Kuba kandi Raporo ya 2018 ya World Economic Forum ku birebana no kuziba icyuho mu busumbane hagati y’abagore n’abagabo yarashyize u Rwanda ku mwanya wa 6 mu bihugu 144, bigaragaza ko imbaraga igihugu gikoresha mu gushyigikira abagore mu rugamba rw’iterambere zigaragarira buri wese.

Nubwo intambwe ikomeye ibihugu byateye mu igerwaho ry’uburinganire bikwiye kuyishimirwa, haracyakenewe imbaraga nyinshi kugira ngo ibyagezweho ntibihungabane.

Ubusumbane hagati y’abagore n’abagabo ni imwe mu mbogamizi zikomeye ku iterambere rirambye, mureke tureke kubiraga abazabyiruka mu bihe biri imbere.
Bakwiye umurage mwiza: abagabo n’abagore batera imbere mu buryo bungana.

Aho izi mpinduka zigomba gutangirira harazwi. Bitangirira mu kubaha uburenganzira bw’abagore no gushyira mu bikorwa imyanzuro yiyemejwe haba ku rwego mpuzamahanga, akarere n’igihugu ndetse no kongerera abagore ubushobozi.

Bisaba kandi kubaka ibikorwaremezo biha agaciro ibikenewe by’umwihariko ku bagabo n’abagore, urugero n’inkibikorwaremezo bigena uburyo rusange bwo kurwanya ihohoterwa rishingiye ku gitsina, no gushyiraho gahunda zigamije guhashya ubukene kuri ba bandi batabasha kugera kuri serivisi z’ibanze ndetse n’imyanzuro yoroheje ituma abagore barushaho kwisanga mu kazi.

Ikoranabuhanga rigezwa kuri bose kandi ryagira uruhare mu kuziba icyuho hagati y’abagore n’abagabo muri Afurika, aho usanga umubare muto w’abagore n’abakobwa ari bo babasha guhanga udushya tugamije impinduka zishingiye ku ikoranabuhanga, bigatuma ibikorwaremezo na serivisi nshya zihangwa akenshi bidasubiza ibibibazo bafite.

Gukurikirana no kuziba icyuho mu buringanire mu nzego z’iterambere zirimo izikizamuka ni ingenzi mu kubaka umuryango ushoboye kandi buri wese yibonamo.

Ubushakashatsi bwakozwe na LinkedIn bugaragaza ko abagore 22% aribo bitabira imyuga ifitanye isano n’ubwenge bw’ubukorano (Artificial Intelligence), mu gihe abagabo ari 78% kandi nyamara biri mu bumenyi bw’ingenzi bukenewe ejo hazaza. Ibi bihwanye n’icyuho cya 72% kimaze imyaka itari mike kidahinduka, kandi gishobora kwiyongera hatagize igikorwa.

Uburinganire hagati y’abagore n’abagabo ni ingenzi cyane mu bikorwa by’Umuryango w’Abibumbye. Uyu muryango ukomeye ku bufatanye na Guverinoma y’u Rwanda n’abandi bafatanyabikorwa mu iterambere, abikorera, sosiyete sivile n’abahanga mu guharanira ko abagore n’abakobwa bibona mu buryo bungana muri gahunda zoze z’iterambere n’imibereho myiza.

Gahunda yacu ya UNDAP 2018-2023 (United Nations Development Assistance Plan) ishingiye ku migambi igamije igerwaho ry’uburinganire.

Binyuze muri uyu murongo, Umuryango w’Abibumbye uzakomeza kwifashisha amashami yayo 22 n’ihuriro ryayo mpuzamahanga mu gushyigikira ishyirwa mu bikorwa ry’amategeko na politiki z’ingenzi zigamije uburinganire, kongerera abagore ubushobozi no gutanga umusanzu mu dushya tuganisha ku mpinduka, duhangwa n’abagore, abagabo, abahungu n’abakobwa. Ibi ni ingenzi ku gihugu nk’u Rwanda rwiyemeje kugira ubukungu bushingiye ku bumenyi bitarenze umwaka wa 2035.

Umuryango w’Abibumbye wiyemeje kujya muri uru rugendo rw’ingenzi, kandi dufitiye icyizere ko hamwe n’intumbero ihuriweho, ubuyobozi bufite ubushake, imyumvire ikwiye, politiki no guhanga udushya bizahindura Isi, Afurika n’u Rwanda ahantu heza kuri bose, aho abakobwa n’abagore bazatera imbere mu buryo bungana n’ubw’abahungu n’abagabo.

Ingero zikurikiraho zigaragaza ko ubufatanye n’abandi bafatanyabikorwa mu guharanira kurwanya ihezwa ryaba irishingiye ku bumuga n’igitsina, atari ingenzi gusa ahubwo binashoboka.

Umuryango w’Abibumbye mu Rwanda wagiye ushyigikira gahunda zigamije igerwaho ry’uburinganire hagati y’abagabo n’abagore, zirimo kurandura burundu ubusumbane mu burezi binyuze ku gushyigikira ikoreshwa ry’ikoranabuhanga n’itumanaho mu kwigisha no kwiga, guteza imbere ubuhinzi bubasha guhangana n’imihindagurikire y’ibihe, gukoresha ikoranabuhanga mu kongerera ubushobozi abagore bari mu buhinzi n’ibindi bikorwa bigamije gutuma urubyiruko rurushaho kugira ubumenyi ku birebana n’ubuzima bw’imyororokere no kurwanya inda zitifuzwa mu bangavu.

Twubakiye ku bimaze kugerwaho, turashishikariza abafatanyabikorwa mu iterambere bose, ibigo bya leta n’iby’abikorera, abaturage b’u Rwanda, gukomeza gutanga umusanzu mu ntambwe twateye mu kongerera ubushobozi abagore n’abakobwa.

Umunsi Mpuzamahanga w’Abagore mwiza ku bagore bose mu Rwanda. Turi kumwe! Abishyize hamwe ntakibananira!

Umuhuzabikorwa w’amashami y’Umuryango w’Abibumbye mu Rwanda, Fodé Ndiaye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kayiru 2019-03-08 15:42:46

Babwire babwira, bazumva bidatinze!

Kwamamaza