IGIHE

Nyetera Antoine yaciye agahigo mu gushyigikira abajenosideri n’abayipfobya

15 1-11-2019 - saa 14:43, Tom Ndahiro

Hari abantu amateka y’Isi atibagirwa. Hari abibukirwa ku byiza cyane baba barakoze, hakaba n’abibukirwa ku bibi bakoze. Iyo ubirebye, icyibukwa cyane si umuntu, icyo bazirikana n’icyo yakoze.

Mu mateka y’u Rwanda, kubayakurikirana cyane, bibuka Umunyarwandakazi witwa Nyirarumaga wabaye ikirangirire kubera ibisigo ndetse akaba yarabaye Intebe y’inteko ya mbere y’abasizi mu gihugu cyacu. Abandi Banyarwandakazi bazahora bibukwa ku butwari bwabo ni Agatha Uwilingiyimana na Niyitegeka Félicité.

Uko kwibukirwa ku byiza abo Banyarwandakazi bakoze, ni nako abagore nka Nyiramasuhuko Pauline, Bemeriki Valérie, Ingabire Victoire Umuhoza, Thabitha Gwiza n’abandi bazibukwa ku mahano bakoze mu mateka y’u Rwanda.

General Fred Gisa Rwigema, Michel Rwagasana, Faustin Rucogoza bari mu bantu bazazirikanwa n’amateka mu buryo bwo kwifuza kubigiraho. Urutonde rw’abakoze ibyiza bihebuje si ruto si na runini cyane. Kuvuga ko Perezida Kagame hari habi yakuye u Rwanda akarugeza heza habasha kuvugwa si amakabyankuru.

Sinashatse kuvuga iby’abagabo b’Abanyarwanda bakoze ibibi cyane, n’ubwo bahari nka Bagosora Théoneste, Makuza Anastase, Mugesera Léon n’abandi ishyano ryose.

Hari Abanyarwanda mperutse kuvuga ubuhemu bwabo muri make cyane ariko bibaye ngombwa ko mbugarukaho. Mbugarutseho kuko hari uko nabyanditse, bamwe, n’ubwo ari bake cyane, babyumva uko bitari. Ikitumvikanye neza kirasobanurwa.

Mu 1959, Habyarimana Joseph Gitera mu mbwirwaruhame ye y’i Ngoma mu Mujyi wa Huye, yatangaje amategeko icumi y’urwango ku Batutsi. Muri ayo mategeko y’Abahutu, hari iribwira Abahutu gusyigingiza Abatutsi kugeza aho biba. Nyuma y’imyaka itagera kuri itanu Makuza Anastase ahitishamo Abatutsi ngo nibahunge, bahore, bahoore cyangwa se bahonge.

Bose guhunga ntibyari gushoboka kuko rimwe na rimwe bitorohaga. Guhoora byo kwihorera byo ntaho byashobokaga. Icya ngombwa cyari ukubaho kubera ko abari nyiramukubitwa nta n’ububasha bari bafite. Birumvikana ko nta kuntu Abatutsi bari kuburana n’ubahamba.

Hari guhonga byo kwigura byakorwaga aho Umututsi yari ari, ari mu gihugu no mu mahanga yahungiye. Guhonga byarakozwe kuko byarashobokaga. Ibyo bikazamo gutanga ikiguzi icyo ari icyo cyose ngo bucye kabiri. Mu mahanga abantu bahinduye amazina ngo bige ndetse hagira bamwe bihakana Ubunyarwanda bwabo ngo babone amaramuko. Icyiza n’uko Inkotanyi zabagaruriye agaciro bagasa n’ubuyanja bugarurwa n’uwari urwaye.

Hari no guhonga nk’amababi y’igiti cyakubiswe n’izuba cyangwa insina zarwaye kirabiranya, ari byo Gitera yitaga gusyigingiza. Mu Rwanda, hari Abatutsi bamwe, uretse ko ari bake cyane ku buryo babarika, barahonze barakabya banagera aho bagira ubutoni budasanzwe burusha ubw’Abahutu. Muri abo hari n’abagize uruhare rwo kwica Abatutsi mu gihe cya Jenoside.

Uku kuri kw’amateka y’imibereho mibi y’Abatutsi batewe na Leta ya Parmehutu na MRND niko nagaragaje. Uwacitse ku icumu rya Jenoside yakorewe Abatutsi wabyumvise ukundi ndizera ko noneho asobanukiwe. Utabizi azasome igitabo cya Mugesera Antoine. Imibereho y’Abatutsi kuri Repuburika ya 1 n’iya 2 bazumva neza akarengane k’Abatutsi nkunda gukomozaho.

Hari umunyapolitiki Habamenshi Callixte wise Abatutsi ‘INDA’ (utu dusimba tuzanwa n’umwanda) abantu baraceceka na nyuma ya Jenoside turamwihorera apfa neza ashajishijwe neza n’abo yise izo nda zo mu myenda itameswa n’umusatsi w’abatiyuhagira. Ubwo kandi yabitaga inda ari bo yashatsemo, ukibaza niba abana be yarababonagamo izindi nda!

-  Guhonga ukarinda urunduka

Muri abo navugaga bakabije ubutoni kurusha abandi ni Nyetera Antoine washaje mu 2012. Nyetera yarahonze arinda arunduka, amateka ye akaba akwiye kumenyekana.

Amateka ye ni ngombwa kuyabwira abatayazi n’abazavuka kuko ibyo yakoze birenze ukwemera ariko hakaba hari abashaka kuyazimangatanya ndetse hakaba n’abaharanira kuyagira meza kandi nta bwiza na buke yigeze.

Ku isonga ry’abasingiza Nyetera Antoine utabikwiye, ahanini ni abajenosideri nyirizina. Abandi ni abahakana bakanapfobya icyo cyaha nkuko nigeze kubyandika kera. Undi ni umukobwa we Nyetera Denise, ntari nzi, nkaza kumumenya mwumvise ku maradiyo yo kuri murandasi.

Imwe muri ayo maradiyo numviseho icyo Denise aburanira se, yavuganaga na Aloys Simpunga ushinjwa Jenoside yakorewe Abatutsi. Nongeye no kumwumva avugana na Mukarugomwa Agnès uzwi nk’umukangurambaga w’ingengabitekerezo ya Jenoside.

Hari n’ibindi yavugiye kuri murandasi ari nabyo byatumye biba ngombwa ko mvuga ko Nyetera Antoine ngo Abanyarwanda bamumenye. Denise yavuze ko navuze Nyetera kubera kutamumenya, ko yari umuntu wavugishaga ukuri, “nta muntu yatukaga”, akaba umuntu “utemeraga ubuhake”, ko nibasiraga umuryango we n’abacitse ku icumu…..n’andi nk’ayo.

Aloys Simpunga na Mukarugomwa bafite ibitekerezo bahuriyeho na Nyetera Antoine. Ibyo bitekerezo bikaba ari ukwanga Leta y’u Rwanda muri rusange na FPR Inkotanyi by’umwihariko. Ikindi kibahuza ni uguhakana no gupfobya birangwa cyane no gushinjura abakoze Jenoside mu Rukiko Mpuzamahanga Mpanabyaha (ICTR) rwakoreraga Arusha.

Simpunga yagiye gushinjura Colonel Tharcise Renzaho wayoboraga Umujyi wa Kigali, Mukarugomwa ashinjura Ngirumpatse Mathieu wari Perezida wa MRND. Nyetera yabashinjuye bombi. Hari icyo Nyetera yarushije aba bombi.

Mbona Nyetera Antoine bwa mbere twahuriye muri ICTR, Arusha muri Tanzania ku wa 11 Gashyantare 2002, ari umutangabuhamya ushinjura umujenosideri Laurent Semanza. Nongeye guhurira na we mu Rukiko i Paris mu Bufaransa ku wa 23 Nzeri 2008 aho yari umutangabuhamya ushinjura Pierre PEAN.

Muri urwo rubanza rwa Pierre Pean, Nyetera yari yaje kwemeza ko Abanyarwanda, cyane cyane Abatutsi bose barangwa n’umuco wo kubeshya. Erega umukobwa we Denise agatinyuka akavuga ko umubyeyi we atatukananaga. Uzi gutuka igihugu? Muri urwo rubanza Umushinjacyaha yaramubajije ati “ko watubwiye ko uri Umututsi kandi w’igikomangoma, icyatuma urukiko rwemera ko ibyo uvuze ari ukuri ni iki”?

Umusaza Nyetera yariye iminwa, atunganya neza ikoti rye ry’umukara yari yambaye asubiza ko uretse we nta wundi Munyarwanda uvugisha ukuri. Denise niba ashidikanya yabaza mubyara we wari muri urwo rukiko ari mu batangabuhamya bashinja Pean.

Nyuma y’urubanza rw’i Paris negereye Nyetera ndamuramutsa, yarikanze ambaza uko nitwa ndamwibwira namwibutsa ko duherukana muri corridor za ICTR, Arusha aho njye na Simburudali Théodore twamusanze yivugisha ajugunya amaboko hirya no hino kandi ntawe bari kumwe.

Mugenzi wanjye yaramuramukije ati “Uraho Nyete…”? Aho gusubiza yaretse kwivugisha arakomeza aragenda kuko yari amaze gusebera mu rukiko kuko yari yavuze ibintu bitagira epfo na ruguru, mu kinyabupfura bamushimira kuba yarafashe urugendo akaza Arusha mu izina ry’ubutabera.

Mubwiye ibya Arusha yakanuye amaso nkaho hari icyo bimwibukije. Kuko ntashakaga gutindana nawe namubajije mu ijwi risa n’iryongorera kuko ntashakaga ko hari undi ubyumva. Nti “Ese uko usa uko, uko ureshya n’imyaka yawe, iyo wirirwa mu nkiko ubeshya ukabeshyera igihugu cyawe ushyigikira abahekuye u Rwanda wumva utazasiga umugani”? Yahengetse umunwa, arawukaraga kabiri iburyo n’ibumoso nk’uhema ijuru n’Isi musiga aho kuko ntari nkeneye igisubizo cye.

Nyuma y’amezi atanu Nyetera Antoine yagiye gushinjura, ku wa 11 Nyakanga 2002 yari mu Rukiko Arusha ari umutangabuhamya ushinjura mu rubanza rwa Ntagerura André, Bagambiki Emmanuel na Lieutenant Imanishimwe Samuel. Nyuma y’imyaka ine n’igice ku wa 26 Nzeri 2006 yari Arusha ashinjura mu rubanza rwaburanishwagamo Jérôme-Clément Bicamumpaka, Casimir Bizimungu, Justin Mugenzi na Prosper Mugiraneza.

Mu 2007, Nyetera Antoine yasaga n’uwibera Arusha kuko yahagendaga cyane agiyeyo nk’umutangabuhamya ushinjura abajenosideri. Ku wa 12 Werurwe 2007 yari mu rukiko avugira Zigiranyirazo Protais. Yasubiye yo ku wa 4 Kamena 2007 gukora nk’ibyo mu rubanza rwaburanishirizwagamo General Augustin Ndindiliyimana, Major François-Xavier Nzuwonemeye, Captain Innocent Sagahutu na General Augustin Bizimungu.

Nyuma y’ukwezi kumwe, ku wa 5 Nyakanga 2007 yari mu rukiko aburanira Colonel Tharcise Renzaho. Ku itariki 5 Ukwakira 2007 yari muri urwo rukiko aburanira Simon Bikindi.

Nyetera yararuhutse aza gusubira Arusha, ku itariki ya 16 Kamena 2009 yari mu rukiko aburanira Colonel Ephrem Setako. Na none yararuhutse, ku wa 21 Ukwakira 2010 yari umutangabuhamya ushinjura mu rubanza rw’abayobozi bakuru ba MRND, Mathieu Ngirumpatse na Edouard Karemera. Urebye neza Nyetera yaciye umuhigo wo gushinjura abajenosideri. Nta Munyarwanda cyangwa umunyamahanga waba waritabajwe n’abajenosideri nka we.

Nyetera kubaburanira yabitewe n’iki? Urukundo yabakunze yarukuye he? Ubutoni yagize mu gihe cya PARMEHUTU na MRND rukamwangisha Inkotanyi ni ubuhe?
Ibyo umukobwa we yatubwiye mu kiganiro yagiranye na Mukarugomwa, bizaza mu nyandiko itaha.

Kwamamaza
Kwamamaza

Izindi nkuru wasoma

0 7 25-11-2019
0 5 18-11-2019
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Semafara 2019-11-02 13:39:26

Icyo nemera ni kimwe. Umuntu wese wagize uruhare mu kurenganya Abanyarwanda, akabagirira nabi, akica abana, abasaza, abakecuru, ibikwerere, abasore abaziza icyo bari cyo baba Abatutsi cyangwa Abahutu, uwo na we yaba umututsi cyangwa umuhutu, igihe yaba yarabikoreye cyose n’impamvu iyo ari yo yose yaba yaramuteye kubikora, uwo muntu azabyishyura. Dore aho nibereye.
Cyakora nagira abantu inama yo kwitonda bakareka guca imanza batanumvise abo bazicira.
Nta we ufite monopole y’ukuri kuko kurigenga! Ikindi ni uko ntekereza ko nta muntu umwe ugomba kwiha uburenganzira bwo kugira abo yita intwari n’abo yita ibigwari mu Rwanda atanakoranyije inama y’abantu banyuranye ngo babyigeho! Ni ukurengera cyangwa kwiyemera bikabije!

2
Muhinda muhozi 2019-11-02 10:45:43

Ndahiro ese uziko mu ntambara ya génocide yakorewe abatutsi nyetera yali kuli barrière kwi isoko inyamirambo ntawinjiraga mwi isoko atamuhereje irangamuntu ngo arebe ko atali inyenzi !!!! Ikindi yiyise nyeterimana ngo abe umuhutu wemewe irya nyetera ngo ni iritutsi !!!yapfuye keraaa umutwe we ntakibamwo. Yareshyaga namafuti ye.

3
Celestin 2019-11-02 09:40:38

Murakoze Bwana Tom kubwayo mateka.None se uriya Makuza Anastase agira icyapfana na Makuza Bernard? Kuko mbona Bernard ari urugero rwiza rwumunya politike winyangamugayo.Ikindi kibazo hari abatutsi bagize uruhare mukwica abandi batutsi muri genocide yakorewe abatutsi?Mwazaduha amateka yabo tukamenya ubugwari bwabo.Gusa kuri Ingabire Victoire narinziko ntamateka mabi cyane afite yatuma ajyamurako gatebo kabaruharwa.Ngushimiye uburyo utuma dusobanukirwa namateka cyane nkatwe tukiri bato.

4
Ekambi 2019-11-02 02:31:46

Wowe witwa mazina ibitekerezo byawe nibyiza ubukurikiyeho ujye wandika Imana itangijwe ninyuguti nkuru ago kuba intoya

5
Ngabo 2019-11-02 00:25:19

Ndemeranywa na Seruhanga. Ababaye murayo mateka kuva bakiriho kandi bamwe batangiye no kwandika ibitabo.Aho mu Rwanda hose ahabereye ikintu usanga hari umwe cyangwa 2 cyangwa batanu bari bahari kandi bakiriho. Kuburyo kubeshya gutubura, kwinangira, guhakana bitazahabwa intebe na rimwe.

6
Koco 2019-11-01 17:19:43

Ariko Gatwire aho ntagirango abajenosideri hari ugamba kubagisha Inama ku birebana n’amateka y’ u Rwanda?

7
mazina 2019-11-01 12:21:48

Ndakeka ko uyu musaza Nyetera Antoine yashinjuraga aba Genocidaires benshi kubera ko Leta ya Habyarimana "yamukamiye".Usanga abantu aho kureba UKURI,benshi bahitamo "inda".
Inda niyo ituma iyi si imera nabi.Inda niyo yateye Genocide,kubera abantu bashakaga kwikubira umutungo w’igihugu.Inda ni nayo ituma ba Kayumba batera u Rwanda.Nkuko Abaroma 16:18 havuga,inda niyo ituma abantu biyita abakozi b’imana,kubera gushaka ifaranga.
Nyamara Yesu yaradusabye kujya mu nzira tukabwiriza abantu ubwami bw’imana ku buntu nkuko Matayo 10:8 havuga.Gusa tuge twibuka ko abantu bose bakunda ibyisi,harimo n’abanyenda,imana izabahanisha kubima ubuzima bw’iteka muli paradizo.

8
Gatwire 2019-11-01 12:00:08

Bwana Ndahiro ntabwo ari wowe uhitamo ugena intwari zu Rwanda. Nta nubwo ubutegetsi buriho bugena izo nrwari kuko intwari iba yumvikanyweho n’abaturage bose.Amateka yacu rero niba tutari twayumvikanaho ntitugwe mu mutego abandi baguyemo.Ese Ubwirwa n’iki niba Basebya, Rukara batari Intwari?

9
Misago 2019-11-01 11:53:51

Nyetera yari intwali muzajye muvuga abandi uwo mumushyire hasi.

10
SERUHANGA 2019-11-01 11:18:33

Mr Tom, urakoze cyane. "Abatabizi bicwa no kutabimenya". Amateka azivugira na cyane ko abayabayemo bagihari. Thx

Paji: 1 | 2  

Kwamamaza