IGIHE

Inkotanyi zirimo gutsindwa- Amagambo yo mu nyandiko ya Musenyeri Mbonyintege mu 1990

95 24-07-2019 - saa 14:11, Tom Ndahiro

Ubwanditsi: Ibikubiye muri iyi nyandiko ni ibitekerezo bwite n’ubusesenguzi bw’umwanditsi. Tom Ndahiro ni umwanditsi n’umushakashatsi kuri Jenoside yakorewe Abatutsi

Nyuma yo gusoma inyandiko ibanziriza iyi hari umusomyi wanyandikiye ubutumwa bugufi ambwira icyo atekereza ku byo nanditse, ati: “Ibi iyo mbitekerejeho nsanga harimo ubugome butagira izina ariko harimo n’ubugwari! Nta nyenzi zigeze zitera ngo zigere mu Cyanika yo mu Bufundu ari yo Nyamagabe y’ubu aho Andre Nkeramugaba wari Perefe wa Gikongoro yamariye Abatutsi abaroha mu migezi ya Mwogo, Rukarara na Mbirurume.”

Yambajije ikibazo ariko nawe yibaza, “utekereza ko umukecuru cyangwa umusaza w’iyo mu Bweyeye, Gikundamvura, i Makwaza n’ahandi bishwe, wagize ngo bari bazi Inkotanyi cyangwa Habyarimana ku buryo babizira? Hejuru y’ubugome n’ubugwari harimo n’ubuswa ntagereranywa [sans qualification]! Kwica Abatutsi bari mu Rwanda n’abandi mutavuga rumwe ukumva ko watsinze uragamba birenze ubuswa niba hari ikindi kiri inyuma yabwo!”

Colonel Barthazar Ndengeyinka wahoze mu ngabo za Habyarimana (FAR) akaba no muri RDF yahunganye ikibazo cyamuzonze. Hari abasirikare babiri bambwiye mu bihe bitandukanye ko uwo Ndengeyinka yajyaga yibaza mu ijwi riranguruye impamvu ingabo za FAR zatsinzwe kandi zari nyinshi kandi zifite intwaro nyinshi n’umubare munini w’abasirikare, interahamwe ndetse n’abaturage babashyigikiye. Niyo mpamvu nabyise igwingira ry’imitekerereze n’imyumvire. Harya byakwitwa iki? Ubundi wakwirara mu baturage batazi intambara ukabica witwa ngo uri ku rugamba, bikitwa iki koko?!

Umubare 6

Sinzi icyari mu mubare gatandatu mu itegurwa rya Jenoside yakorewe Abatutsi. Hari ibinyamakuru bitatu bifite nimero imwe ya 6. Ibyo binyamakuru ni Kangura No 6 yo mu Ukuboza 1990 cyamamaye kubera “Amategeko cumi y’Abahutu” n’igice cya mbere cy’imbwirwaruhame ya Anastase Makuza yo mu 1964 Ubushize nakomoje ku ijambo rya Anastase Makuza mu gifaransa yise “Appel Pathetique: Aggression-suicide de terroristes Tutsi”.

Ikindi kinyamakuru cyasohotse muri uko kwezi ni “Urumuri rwa Kristu” (URK No 6 Noheli 1990). Ikindi ni ISIBO No 6 cyasohohotse ku itariki ya 10 Mutarama 1991, bivuga ko cyari hafi y’ibyo bindi bibiri.
Icyo ibyo binyamakuru bihuriyeho ni uko byarimo imvugo y’urwango n’ubwo abanditsi bayo bari batandukanye. Kangura yayoborwaga na Hassan Ngeze w’Umuyisilamu akaba yarabaye umunyamakuru avuye ku kazi ko kudoda inkweto ku Gisenyi.

Umwanditsi Mukuru w’Urumuri rwa Kristu yari Padiri Smaragde Mbonyintege (ubu ni Musenyeri wa Diyosezi ya Kabgayi). Yandika iyo nimero yigishaga mu Iseminari nkuru ya Nyakibanda yanaje kubera Umuyobozi Mukuru wayo. Naho ISIBO ikayoborwa na Sixbert Musangamfura wize amateka muri Kaminuza y’u Rwanda, ubu akaba asigaye ari mu mutwe w’abajenosideri wa FDU-Inkingi rimwe na rimwe akanagaragara mu mutwe w’iterabwoba wa Rwanda National Congress (RNC).

Iby’ikinyamakuru KANGURA simbitindaho kuko ibyacyo byavuzweho kenshi kandi henshi. Ndagaruka ku igwingira ryakwiriye kuva mu banyapolitiki rikagera no mu bitwa ko bihaye Imana kandi barize. Kuva kuri PARMEHUTU kugera kuri MRND na Jenoside mu 1994.

Isibo y’urwango mu rumuri rwa Kristu

Mu mazina mabi y’urwango yiswe Inkotanyi n’Abatutsi biswe harimo inyenzi, gusa nta ribi nk’inyangarwanda. Ni ijambo riri mu mbwirwaruhame n’inyandiko nyinshi z’abatoza ba Jenoside. Ari mu za Makuza, Juvenal Habyarimana, Hassan Ngeze na CDR.

Uwiswe “Inyangarwanda” biba birenze kwitwa umwanzi. Kwanga u Rwanda, ni igihugu muri rusanga birimo kwanga abarurimo n’ibirugize. Birumvikana ko kwica uwiswe “Inyangarwanda” ari igikorwa cyo gukunda igihugu.

Ku rupapuro rwa mbere rw’Urumuri rwa Kristu No 6, hari ifoto ya Papa Jean Paul II afite isuka y’umujyojyo mu kuboko kwe kw’iburyo. Imbere ye hari umwana w’umukobwa wambaye ikanzu yiganjemo ibara ry’umutuku, yambaye n’agatambaro kavanzemo umweru n’umuhondo mu ijosi. Uwo mukobwa ufite mikoro asa nkaho hari ijambo yari amaze kubwira Papa. Inyuma ya Papa hari hahagaze Musenyeri Thadeyo Nsengiyumva wa Diyosezi ya Kabgayi.

Mu nsi y’iyo foto ku rupapuro rwa mbere hari amagambo “UMUSANZU w’UBUMWE N’AMAHORO”. Icyatumye bahitamo iyo foto n’ayo magambo usanga ntaho bihuriye n’ubutumwa bwa Kiliziya.

Iyo wibutse indirimbo za Simon Bikindi aririmba ‘bene sebahinzi’, birashoboka ko Papa yari yabonye undi mubatizo wa politiki cyangwa se bikaba ari ibya ya ndirimbo “Umurimo ni uguhinga ibindi ni amahirwe” leta ya Juvenal Habyarimana yamamaje mu rwego rwo kugwingiza abanyarwanda.

Ikinyamakuru Urumuri rwa Kristu cyo mu 1990 ni cyo kigaragaramo inyandiko ya Musenyeri Mbonyintege wari Padiri icyo gihe

Igisobanuro cy’amagambo “UMUSANZU w’UBUMWE N’AMAHORO” ari ku rupapuro rwa mbere rw’icyo kinyamakuru Urumuri rwa Kristu (URK), ugisanga mu ijambo ry’ibanze ryanditswe na Musenyeri Mbonyintege (urup 4-5).

Umwanditsi w’iryo jambo ry’ibanze, yanditse ko Papa wari ukubutse mu ruzinduko mu Rwanda aho bamuhaye impano y’isuka, yagaragaje mu ruhame ko ari kumwe n’Abanyarwanda “cyane cyane mu ntambara twatejwe n’abanzi b’amahoro.”

Inkotanyi kwitwa “abanzi b’amahoro” mu URK, nizera ko atari ibya Papa ari ibya Musenyeri Mbonyintege, kuko akomeza agira ati: “Ikindi noneho kiranga ishira ry’uyu mwaka, n’amateka y’u Rwanda ahora azirikana, ni intambara ya Ukwakira twatejwe n’inyangarwanda zaje ziva i Bugande.” Agakomeza agira ati: “Ubu twandika ibi Inkotanyi zirimo gutsindwa. Twizere ko zirimo no kuva ku izima. Umwiryane n’icyunamo byari bitwugarije mu Ukwakira ubu noneho ntibigishobotse.”

Ubona n’iyo Inkotanyi azita Inyenzi aho kuzita inyangarwanda! Nizera ko ubu ukuri yakubonye akamenya inyangarwanda nyazo. Uko guhindura Inkotanyi abanyamahanga, ni ingengabitekerezo yari yararitse mu mitwe ya benshi ku buryo Leon Mugesera aburana mu 2013 yari akivuga ko ari abanyamahanga bateye u Rwanda.

Kuba yarise Inkotanyi inyangarwanda mu rwego rwo guhakwa no guhakirizwa, cyane ko nawe hari aho abyemera, uwabisomaga ntiyabyibagirwa. Ku rupapuro rwa 6 rw’icyo kinyamakuru URK, hari ifoto y’Umupadiri ufashe mu gahanga k’umugore upfukamye imbere ye.

Mu nsi y’iyo foto handitse ngo: “Umusaseridoti ni intumwa y’Imana ku bantu.” Icyo bisobanuye ni uko n’urwo rwango rwo kwita abandi inyangarwanda bwari ubutumwa bw’Imana ku bantu b’abanyarwanda kuko ari Umusaseridoti wabwanditse. Atari n’umusaseridoti usanzwe, ahubwo Umusaseridoti utegura abandi kuzaba Abasaseridoti.

Nkuko Anastase Makuza byamuzinduye akajya kubwira amahanga ko ubwicanyi bwavuzwe mu Rwanda atari bwo ari ibinyoma, na Musenyeri Mbonyintege yanditse ahamya ko ibyavugwaga ku Rwanda ari ibinyoma. Nkunda ukuntu Mbonyintege yishyira mu butegetsi bw’u Rwanda Inkotanyi zanengaga, aho avuga ko abateye batazanye “intwaro z’imbunda gusa, baduteje n’amahanga cyane bakoresha itaramakuru n’itumanaho, maze wakumva urusaku rw’amasasu n’induru z’amaradiyo, n’ibihuha bicicikana hirya no hino, byose kandi bihangitse u Rwanda...”

Musenyeri Mbonyintege arongera akabishimangira ngo “umwanzi” yari abategerejeho “umwiryane” kubera ko “yabuze aho aturuka…” Ikaba ari imvugo yakoreshejwe cyane n’Ikinani n’abambari be. Ari byo bitaga kugwa mu mutego w’umwanzi.

Asingiza politiki y’ikinyoma y’ “Ubumwe n’amahoro” ko ngo ari yo yabafashije “gutsinda umwanzi” bigatuma “umwanzi ataducamo icyuho maze akadufatanya n’amacakubiri.” Urabisoma ukibaza ko u Rwanda ari igihugu kitarimo ivangurabwoko ryemewe.

Ni ijambo ry’ibanze ubona ko ryanditswe n’umuntu wacengewemo n’indirimbo ya MRND ‘Umugambi ni umwe Banyarwanda, amahoro n’ubumwe n’amajyambere... ta ra ra ra ra ra rarara..” kuko abisubiramo kenshi. Uburyo ataka agasingiza Habyarimana bituma wumva ko icyo gihe yandika, iyo umubaza uti Yezu na Habyarimana umwiza ni nde, guhitamo byari kumunanira.

ISIBO n’URK byari nka Korari

Usoma ibyo Mbonyintege yandikaga, ukabigereranya n’ibyo Musangamfura yanditse ndetse n’ibyanditswe n’Abasenyeri Gatolika ugasanga ari nk’abaririmbyi bitoje neza indirimbo.

Ibyo Mbonyintege yanditse na Musangamfura arabivuga mu ISIBO No urup. 2 mu nyandiko yise “Umututsi muri iki gihe cy’Inkotanyi” aho agira ati: “Inyangarwanda zaje zifuza ko twasubiranamo. Zigomba kuba zarumiwe kuko zasanze dukomeye ku bumwe bwacu, ubumwe bwatumye dufatanya kuzirwanya.

Urebye ibyo Abasenyeri Gatolika mu Rwanda banditse mu mabaruwa yabo abiri boherereje abakirisitu mu mpera za 1990, nazo ntaho zitanira n’imbwirwaruhame z’Ikinani. Ibitekerezo biri muri rumwe muri ayo mabaruwa Musenyeri Mbonyintege yaruhaye umwanya.

Mu nyandiko ya Musenyeri Mbonyintege agira ati: “Abepiskopi Gatolika, mu rwandiko boherereje abakirisitu ku ya 7 Ugushyingo 1990, batanze umuganda w’amahoro n’ubumwe mu bana b’u Rwanda. Bagaye abateye u Rwanda, bagaya n’abemeye kuba ibyitso byabo.” Mbese ni ‘MRND yacu nziza, sugira maze usagambe mu Rwanda’.

Ibaruwa y’abasenyeri yo ku ya 5 Ukuboza uwo mwaka yo yakoreshaga imvugo nk’iya Kangura. Ko abateye ari ba gashakabuhake bashaka kugarura ubwami kandi bwaranzwe n’abarenga 80% by’abaturage…

Kinyamateka y’Inama y’Abepiskopi mu Rwanda yarushanwaga na Kangura n’ISIBO mu kubiba urwango. Imwe mu nyandiko zasohotse muri Kinyamateka igira iti: “Ubwo rero gihake yongeye kugariza u Rwanda, Inkotanyi zikaba zitugera amajanja, ka gapariti kacu (kandi Fondateri wako yigeze kuvuga ko tuzakifuza), gakwiye kugaruka. Ako gapariti si akantu ni PARMEHUTU.” (Muhorakeye, D., “PARMEHUTU ishyaka ry’irirwanyi”, muri Kinyamateka No 1340, Gashyantare II 1991, p.3).

Kimwe na ISIBO mu nyandiko navuze hari aho Musangamfura agira ati: “Mu gihe cya Repubulika ya mbere, magingo aya wenda agapanga kaba karavuze.” Akongeraho umugambi wa Jenoside uri mu mutwe we ati: “Hari abavuga bati dukeneye indi 59 kugira ngo twongere tumare imyaka 30 turya, tukaryama, tugasinzira! Agahoro ko muri 1959 kakanguye Abatutsi benshi, nyuma y’aho ibyagiye biba abenshi turabizi. Kuki abashaka kubaka igihugu tutakorana n’abo bakangutse bose maze izo nkovu zikomorwa burundu? Utemera iyo nama uwo ari we wese arashaka ko igihugu cyacu gihora mu ntambara.”

Uwo mwanzuro umuntu ashobora kuwibeshyaho, nkaho ari umuntu muzima. Ntabwo waba muzima usingiza urupfu ubyinirira imihoro yatemye abantu. Ni nayo mpamvu n’ubu uwo Musangamfura akiri inyuma y’abanze gutandukana n’ingengabitekerezo ya Jenoside.

Biracyaza!

Soma inyandiko yabanjirije iyi: Imbwirwaruhame ya Anastase Makuza yo mu 1964 igaragaza urwango ubuyobozi bwari bufitiye Abatutsi

Musenyeri Smaragde Mbonyintege yabaye Umwanditsi Mukuru w’Urumuri rwa Kristu. Icyo gihe yari Padiri
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3 | 4 | 5 | 6 | 7 | 8 | 9 | 10  

1
king 2019-07-26 16:04:37

Noneho aba gaturika barasaze pee, ahubwo nanjye bitumye menya uwo musenyeri Smagarad ariwe

2
che 2019-07-26 09:39:04

Ah bon, ntabyo nari pe, erega burya ni byiza kugira amakuru nkaya tikarushaho kumenyana, iyi nkuru ni nziza rwose.!

3
... 2019-07-26 08:53:17

None se, Musenyeri Mbonyintege hari aho yabeshye.
Inkotanyi zabanje gutsindwa, mbere yo gusubira inyuma zikisuganya, zigafata indi migambi.

4
Titus 2019-07-26 08:50:06

Njewe ndabaza impamvu iki kinyamakuru kirikwemera ibitekerezo bishigikira uyu tom gusa ibindi ntibabitambutse?

5
Kabanda 2019-07-26 08:49:10

Ibi Tom yirwa akora ngo arashakashaka abenshi yibasira ntacyo bizabatwara, ariko we ikindi gihe wabona abizira yarirwaga yirata ngo avugira leta, aba n’aba...Ibi ni ukutagira ubwenge! Ese twe twari kuri urwo rugamba wibwira ko nubwo rwarangiye twegukanye insinzi, wibwira ko nta gitero na kimwe twatsinzwe? Kubivuga se n’icyaha? Ntitwateye igihugu se? Jya uvuga uziga utazasaza nabi nka ba Bikindi, Cantano,..n’abandi bose bagira ivuzivuzi!

6
murame 2019-07-26 06:46:04

in fact kuvuga ko zatsinzwe muri 1990 si ibanga kuko bizwi ko kagame yaje zatsinzwe n’abayobozi bapfuye so yaba yaravuze ibintu uko bimeze. muri icyo gihe [DICTIONARY FLAG]

7
Mahoro 2019-07-26 05:32:36

Ubu bushakashatsi bwa Tom jye bunteye ubwoba!!!

8
navas 2019-07-26 04:21:55

intrugue.kbs tom ari gusaza nabi kandi yaremerwagwa murwanda

9
BIZIMANA 2019-07-26 04:11:01

ariko ubu nkiyi nkuru imariyiki abayisomye, umuntu afata inzagano ze kugiti cye akajya kuzibiba mubanyarwanda? uretse smargde wanditse; abateguye bakanashyira Genocide mubikorwa, bigeze bacirwa urubanza mwitangazamakuru? Igihe mwikosore, mujye mubanza murebe icyo inkuru imarira abasomyi binajyana n’umurongo w’igihugu. naho Tom wowe suzuma ubushakashatsi bwawe mumateka ucukumbure ibyagira icyo byubaka ku bumwe abanyarwanda biyemeje.

10
PAPU 2019-07-26 04:04:57

Hahaaa Man Uracukumbura ariko ibyiza wari kubanza ukabaza Musenyeri akakubwira impamvu yabimuteye wasanga nawe yarahigwaga agira ngo aramuke kabiri

Paji: 1 | 2 | 3 | 4 | 5 | 6 | 7 | 8 | 9 | 10  

Kwamamaza