IGIHE

Imbwirwaruhame ya Anastase Makuza yo mu 1964 igaragaza urwango ubuyobozi bwari bufitiye Abatutsi

20 23-07-2019 - saa 08:01, Tom Ndahiro

Iyo ushakisha inkomoko y’imvugo zagiye zikoreshwa mu mugambi wo gutegura Jenoside yakorewe Abatutsi, ukareba n’imvugo ikoreshwa n’abakoze Jenoside bayihakana, ugenda ubona neza uburyo habaye uruhererekane rw’ibitekerezo rufatanye bisa n’umugozi uboshye neza.

Ubushize nakomoje ku ijambo rya Anastase Makuza mu gifaransa yise “Appel Pathetique: Aggression-suicide de terroristes Tutsi” mu kinyarwanda rikaba ryarasemuwe rikitwa “Impinyuza ibeshyuza Impunzi: Gatutsi-nyenzi yateye yiyahura”.

N’ubwo ari imbwirwaruhame yavugiwe i Paris mu Bufaransa muri Werurwe 1964, inyigisho zari ziyirimo zakoze ishyano mu Rwanda hagati ya Ukwakira 1990 kugeza kuri Jenoside yakorewe Abatutsi ndetse bikanakomeza na nyuma yaho.

Hari igice cy’iyo disikuru ya Makuza cyabaye izingiro rya Jenoside mu itegurwa ryayo no kuyihakana. Ni aho yahakanaga ko hari Jenoside yakorewe Abatutsi uhereye mu ijoro rya Noheli 1963 kugeza muri Mutarama 1964.

Makuza ati: “Igitangaza umunyarwanda utarugambaniye, ni uko amaradiyo n’ibinyamateka, bidahosha kuvuga agahinda bitewe na rubanda rwitabaye, bitagize icyo bivuga ku bugome bw’abo bagira nabi, nk’aho umwotsi ucumba mu nzu yahiye uba urushije ubugiranabi umuriro wayitwitse, cyangwa se nk’aho kwivuna uguteye ali byo bibi kurusha gutera utakwakuye.

Uko gucurika amahame yemerwa n’abantu bose, ukibasira kuzimya umuriro wongera inkongi mu nzu ishya ngo aha urashaka kuyizimya byatera umunyarwanda kwibaza niba ubwenge bw’Abazungu buteye kimwe n’ubw’abirabura.

Kuko, mu bwenge bwa Kinyarwanda, ingirwa-bahanga z’abazungu zigeze kuvuga ko bucuritse, ushaka kuzimya inzu ishya, azimya umuriro uyitwika aho kurwanira kuzimya umwotsi uyicumburukamo. Iyo nzu mvuga ni ya midugararo iherutse kuba mu Rwanda. Umwotsi mwibasiye kuzimya ni umujinya wa rubanda rwahagurukanye rubonye rutewe.”

“Umuriro ni bya bitero by’inyenzi byateye rubanda uwo mujinya mukaba ariko ariwo mwibasira aho kwibasira nyirabayazana. Cyo re, nk’uko nabivugaga ko ibyari hasi byagiye hejuru, niba mu bwenge bwa Kinyarwanda, ureba icyabaye urebye icyagiteye, niba umuntu wese afite uburenganzira bwo kwirengera iyo yasagariwe, umuntu yavuga ate ko ari ko bimeze mu buhanga bwa kizungu, kandi abanyamakuru bamwe bamaze gucurika ibyo Imana yacuruye?

None se hari ugucurika ubwenge kwaruta guhishira cyangwa gushima ubugome bw’inyenzi bwasagariye abaturarwanda, ukarengaho ahubwo ukibasira no gusebya abo baturage baziyamye zibateye? Niba ari ubugira nabi mwanga, ntimwambwira impamvu yabateye guhishira inyenzi zashoje intambara, mugatangira gusakuza aho abaturage babereye nka ya ngwe itari izi gufata ku gakanu iyo itabibwirizwa?”

Guha agaciro icyaha

Umugambi wa Jenoside yakorewe Abatutsi guhera mu 1990, wajyanye no gutegura ubwicanyi mu mitwe y’abantu. Icya mbere cyakozwe kwari ukubiba urwango ku Batutsi, guha Jenoside inyito nziza birimo kuyiha ishusho y’igikorwa cyo kwitabara.

Nta gitangaza ko iki gice cy’imbwirwaruhame ya Makuza yo mu 1964, yasohotse mu kinyamakuru Kangura No 6 cyo mu Ukuboza 1990. Icyo kinyamakuru akaba ari cyo cyasohoye andi mategeko Icumi yiswe ko ari ay’Abahutu.

Ubwicanyi bwakorewe Abatutsi 1963-4 bwahitanye abarenga ibihumbi makumyabiri na bitanu (+25,000) barimo abaturage ku misozi batuyeho n’abanyapolitiki batari muri PARMEHUTU, nibwo Makuza yahaye inyito nyinshi zipfobya ubukana bw’icyaha cyari cyakozwe. Yanakoresheje ishushanyito zisingiza abicanyi.

Nibwo bwa mbere ibitangazamakuru mpuzamahanga byise ubwicanyi bwakorewe Abatutsi mu Rwanda “Jenoside” n’irimburabwoko “extermination”. Ariko kuri Makuza abicanyi bari abantu b’inzirakarengane batsembye abandi batabishaka ahubwo babitewe n’abicaga. Nicyo yagereranyije n’ingwe yafashe agakanu ari uko ibwirijwe.

Muri iyo mbwirwaruhame, yemeza ko “Inyenzi” zageze ku kiraro cyo ku Kanzeze, ariko “bazisutsemo urusasu bazishora inkungugu, bugoroba bazigejeje hakurya y’u Rwanda”. Niba mu munsi umwe zarakubishwe inshuro bakazambutsa umupaka, ni kuki bashumurije abaturage ngo batsembe bagenzi babo?

Imvugo yoroshya Jenoside yakozwe icyo gihe uyisanga mu byanditswe u Rwanda rwizihiza imyaka 10 y’ubwigenge mu 1972. “Mu myijima ya Ukuboza 1963 ndetse ugashyira imboneko za Mutarama mu wa 1964, inyanga-rwanda z’utunyenzi, zibwiye ko Abanyarwanda batari maso, ziyemeza kuza gukanga amahoro y’abaturage n ’igihugu cyabo, mu ntara zimwe na zimwe zarwo.” (PRESIDENCE DE LA REPUBLIQUE, Ingingo z’ingenzi mu mateka y’u Rwanda. Imyaka icumi y’isabukuru y’ubwigenge: 01-07-1962 – 01-07-1972, Ibiro by’amakuru muli Prezidansi ya Repubulika, 1972, p.82).

Nkuko byagenze mu 1990, Inkotanyi zarateye, urugamba ruri ku mupaka w’u Rwanda/Tanzania/Uganda, Abagogwe bo mu Ruhengeri na Gisenyi baricwa.

Ni isomo ryo kudaha agaciro ubuzima rikomoka kuri PARMEHUTU yitwa ko yasezerewe mu 1973. Iyo kwicwa kw’abantu barenga 25,000 byitwa umwotsi, mu gihe igitero gikubitwa inshuro umunsi umwe kikaba ari cyo cyitwa umuriro na “nyirabayazana”, ni ikimenyetso cy’ingengabitekerezo ya Jenoside iba yararitse mu muntu.

Mu magambo yose ya Makuza ntaho yerekana aho “agahinda” gakura muri “rubanda rwitabaye” bikavamo kwica Abatutsi. Abantu kwica abaturanyi babo batari basanzwe bagira icyo bapfa akabiha inyito nziza yo “kwivuna uguteye”… akabibyinirira ngo ni “uburenganzira bwo kwirengera” kuko basagariwe.

Aho yabihaye ishusho nziza ikomeye, ni uko iyo myumvire ye y’ubugome yayishyize mu rwego rw’amahame buri wese agomba kumva. Anarenzaho avuga ko utabyumva acurika ibintu “Imana yacuruye.” Ubwo buryo bwo kwerekana ko ubwicanyi bwumvikana, ndetse n’Imana yabuhaye umugisha bwakoreshejwe icyo gihe bunakora guhera mu gutegura Jenoside yakorewe Abatutsi mu Rwanda.

Urebye iyo mbwirwaruhame muri rusange usanga yari yaratewe ni uko ubwicanyi bwakozwe bukamenyekana. Biravugwa ko ari Musenyeri Andre Perraudin wagiriye inama Kayibanda ngo yohereze Makuza twagereranya na Joseph Goebbels w’u Rwanda icyo gihe, ngo amare iminsi myinshi mu mahanga yerekana ko abavuze ko abanditse ko habaye itsembabwoko ari injiji zidashobora gutandukanya ururo n’icyatsi.

Isomo rikomeye

Ntibikeneye isesengura rikomeye ngo wumve neza urwango rugwingiza umunyarwanda rwari mu magambo ya Anastase Makuza. Isomo rya mbere ni uko kwica Abatutsi bwari uburyo bwo kurwana intambara. Ni nabyo byakoreshejwe mu 1990-94 aho Umututsi yiswe umwanzi mu buryo bweruye.

Anastase Makuza igitekerezo cye hari ahandi cyari cyaravugiwe. Ubwo Joseph Gitera yasohoraga icyo yise “Amategeko Cumi y’Abahutu” ku wa 27 Nzeri 1959, itegeko rya 5 ni: “Uwahora umututsi inabi yagize, nta mututsi wasigara mu Rwanda. Guhora si byiza. Ariko kwirinda umwanzi cyangwa kwirwanaho aguteye birateganyijwe mu mategeko yose.” Itegeko rya 10 rigasoza rivuga ngo Abatutsi “baragatsindwa mu Rwanda.”

Uko kugira igice kimwe cy’abenegihugu, bakitwa inyangarwanda, ni yo Jenoside. Imitwe y’abicanyi nk’Interahamwe, Impuzamugambi na Hutu-Pawa byateguwe muri gahunda yo “kwirengera” cyangwa “kwitabara” bikiza uwahinduwe umwanzi w’u Rwanda. Ni nayo mpamvu iyo mitwe yiswe “Defence civile.”

Iryo gwingira n’igwingiza ntiryagarukiraga mu banyapolitiki gusa, no mu Kiliziya Gatolika ryarahageze niba atari ho ryatangiriye. Niho tuzakomereza.

Anastase Makuza yabaye Perezida w’Inteko Ishinga Amategeko y’u Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Usabimana 2019-08-16 05:22:45

Rahirako nibikomeza na Bene Mibambwe IV Rutarindwa batazaza gusaba kurenganurwa kwitsemba ryabakorewe kuri coup d’état yo ku Rucunshu? Mbarimombazi ni mwene kanyarwanda.

2
Habineza 2019-07-27 16:49:42

Perezida Gregoire Kayibanda ati:Uvuga ko nanga abatutsi aba atutse Verdiana.Ndumva na Nyakubahwa Anastase Makuza yagombye kuba yaravuze ati: Uvuga ko nanga abatutsi aba atutse Veronika.Mu by’ukuli inyandiko nk’izi umuntu atatinya kuvuga ko zigamije gutesha umutwe Bernard Makuza zimaze kuba zingahe??

3
gafundi 2019-07-25 10:11:44

namwe ibyo murimo murabivuga ubu nibihinduka muzaba mwandikwa ibyo mwavuze muhakwa kubutegetsi. umwami simubi ahubwo babandi bashime banshime nibo babaya haki ya mungu. mujye mwitondera rero ibyo murimo

4
Bwenge 2019-07-25 06:50:27

Reka mbaze ikibazo abasomyi: Mubona aba banyamateka bacu bagamije kubaka cyangwa bagamije gusenya? Iyi nkuru twese tuzi uwo ishaka kwibasira kandi nyamara ni umukozi mwiza ushishikajwe no gukorera neza igihugu cye. Muduhe inkuru n’inama z’ukuntu twiteza imbere, muve mu matiku amaze imyaka 60! Bwacyeye mukanguke! !!!!!!

5
jhjjhjjgjgj 2019-07-25 02:16:50

benedata uku ntabwo ari ukuzura akaboze ahubwo ni ukugira vision yigihugu nigihe tuzaba tutakirih,umwana wavutse ubu uragirango azajye yumva ko Genocide ari indege yaguye gusa ikaba? oya ahubwo agomba gusobanukirwa ko ari ibyateguwe maze nawe akazamenya uko abyirinda

6
John 2019-07-24 16:49:30

Kubera propaganda ya Parmehutum ubuhake babukoresheje nka epouvantail ngo berekane ko igice kimwe cy’abanyarwanda cyarenganije ikindi. Ntawashatse gusesengura ngo amenye neza icyo ubuhake bwaribwo n’ingaruka byagize ku banyarwanda,
1. Ubuhake Parmehutu yitwaje bwari bwarakuweho n’Umwami Rudahigwa ndetse ategeka n’abatware kugabana nabo bari bahatse;
2. Ubuhake bwari bujyanye na systeme economique y’icyo gihe kuko bwari bushingiye ku nka, gutunga inka ni wo wari umukiro ku banyarwanda bicyo gihe( yaguheshaga ishema mu bantu, ikaguha abakozi, ikarera abana...etc. Niyo yari igize ubukungu bw’umuntu icyo gihe nkuko ubu ari ifaranga
3. Ntawe bahakaga ku ngufu kuko ushaka ubuhake niwe wijyanaga. Uwagiraga Imana yabonaga umuhaka, kuko yari inzira y’ubutunzi. Nkuko ubu ugira Imana abona umuha akazi
4. Ntabwo ari abahutu gusa bari bahatswe( ahubwo nibo bari bacye) binyuranye nibyo Prmehutu yigishije. N’abatutsi bari bahatswe ndetse bagomba kuba baribo benshi muriyo systeme( a verifier)
5. Hari uruhande rumwe rw’ubuhake butari bwiza kuko bwarmo akarenganyo: ni Ukunyaga. Kuko shobuja yashoboraga kukunyaga nizo ataguhaye, zose akazita ize.
6.Niyo ubuhake batabukurahom transformation economique avec ukuza kw’ifaranga byari kuyikuraho byonyine nkuko revolution industrielle yakuyeho commerce d’esclaves.
Aba Parmehutu bajijishije abanyarwanda bifashisgije systeme yari yaranavuyeho kugirango bace abanyarwanda mo ibice: abarenganye n’ababarenganije, babeshyera abatutsi nkuko bose bari bahatse cg se abenshi muri bo batari bahatswe.
Kugoreka amateka mu nyungu za politique ni kimwe mu bikoresho bya regime fasciste.

7
Dieudonne Hakizayezu 2019-07-24 16:13:40

Anastase Makuza yangaga abatutsi, birazwi rwose. Ariko ntaho ahuriye na genocide yakorewe abatutsi muri 1994 kubera ko atari akiriho!

Byongeye Kandi, gahunda ya NDI UMUNYARWANDA itangira, umuhungu we Makuza (Turatsinze) Bernard yafashe iya mbere asaba abanyarwanda bose imbabazi kubera amagambo mabi yose se yavuze.

Ntibyari ngombwa ko abikora kuko ICYAHA ARI GATOZI. Ajya kubikora yashakaga kurimbura ingengabitekerezo yo kwanga abatutsi no gushyigikira ubwiyunge bw’abanyarwanda.

Ubu se koko asomye iyi nkuru yasanga ataravunikiye ubusa? Arunga hanyuma Tom Ndahiro agashwanyaguza!

8
Inteko 2019-07-24 13:23:22

Uko mbibona nuko umuhungu wa Anastase MAKUZA, ariwe Bernard MAKUZA!
Yagombye guca bugufi agasabira ise umubyara imbabazi, ku bugizi bwa nabi MAKUZA Anastase yagiriye ABATUTSI, kugeza ubwo ABATUTSI bahunga bagata igihugu cyabo muri 1959.

9
Rwejo 2019-07-24 07:31:36

Ariko rero, njya nibaza ikintu kimwe : Kuki mwerekana ko abatutsi ari abavictimes ibihe byose? Ko Abahutu bahereye kera babanga kandi nyamara barabakoreye imyaka irenga 300? Something doesn’t make sense kuko

10
Claude 2019-07-24 07:21:26

Simbona ikosa yakoze:
1. Kutwibutsa aho abanyarwanda banyuze bagwa mu makosa akomeye yataye igihugu cyose mu manga ni ngombwa kugirango twibukanye, dusobanukirwe kandi noneho twirinde kurushaho kuko kuzitira ari akazi gahoraho;

2. Abana b ubu barabikeneye kandi ntitubyitiranye no guhembera inzika, kuko twanze dukunze abana ntibazayoberwa genocide yakorewe abatutsi, kuyimenya badafite ubusobanuri ku mavo n amavano yayo, inzira yanyuzemo n ukuntu yaje kwiyubaka mu mitwe ya benshi nk ikintu cyoroshye kandi cyemewe nabyo ni ngombwa, bitabaye uko, twese twagwa mu mutego wo kuyifata nk inkuba yakubise cyangwa se akantu gato katewe n uko uwitwaga umubyeyi wa bamwe yaguye mu ndege, kandi ataribyo. Tuzi neza ko biteye ipfunwe benshi ariko abaguye mu makosa bihangane kuko nta kundi twakwubaka igihugu, abakorewe genocide bo bihanganiye byinshi kurusha, twirinde kwikunda

Paji: 1 | 2  

Kwamamaza