IGIHE

Ikoreshwa rikabije rya telefoni rishobora guhindura ubwonko bw’umuntu na sosiyete

5 10-01-2019 - saa 19:24, Budurege Jean de Dieu

Turi mu bihe by’umuvuduko w’ikoranabuhanga. Telefoni ngendanwa ni kimwe mu bikoresho bidufasha kuvugana n’inshuti n’abavandimwe bacu ku Isi yose mu gihe twifuza ndetse ikadufasha kumenya amakuru agezweho.

- Waba ufite ikibazo cyo kudashyira telefoni ngendanwa yawe hasi?

- Waba uzi ko kuyikoresha bikabije bishobora kwangiza ubuzima bwawe?

Telefoni tuzifashisha mu bikorwa binyuranye kuko zoroheje ubuzima. Nubwo zifite ibyiza byinshi, zinagira ingaruka mbi ku buzima bwacu iyo zikoreshejwe nabi.

Aho wajya hose ntiwabura kubona abantu bunamye muri telefoni. Uzababona muri bus, resitora, mu nzira, mu kazi, mu ngo ndetse hari n’abo usanga bazunamyeho mu nsengero bananiwe kwihanganira ko misa irangira.

Biratangaje ko hari n’abajya mu bwiherero ntibazibagirwe! Abantu benshi bamaze kuba abacakara bazo ku buryo batakwihanganira kumara umunsi batazifite.

Ese wowe ushobora kumara amasaha 24 udafite telefoni yawe? Gukoresha telefoni birenze urugero ni nk’ikiyobyabwenge kandi bifite ingaruka zikomeye ku muntu.

Niba buri kanya ukunda gukubita akajisho kuri telefoni mu gihe bitari ngombwa, ukumva utakwihangana utayirebyeho, ushobora kuba uri mu bantu bayikoresha bidakwiye.

Muri iki gihe abantu benshi ku Isi, ikintu bakoresha mbere yo gusinzira na nyuma yo kubyuka ni telefoni ngendanwa. Ni igikoresho kimaze guhindura ubuzima bwa benshi.

Mu Rwanda umubare w’abatunze telefoni ugenda utumbagira. Raporo ngarukakwezi y’Urwego Ngenzuramikorere (RURA) igaragaza ko umubare w’abakoresha telefoni ngendanwa (abafatabuguzi babarwa mu minsi 90 bayikoresha buri munsi), bavuye kuri 9 611 998 mu mpera z’Ukwakira bagera kuri 9 640 236 mu Ugushyingo 2018.

Ubushakashatsi butagutse bwerekanye ko Abanyamerika batatu kuri bane bakora kuri telefoni zabo inshuro 2600 ku munsi. Biteye impungenge nubwo telefoni idufitiye akamaro!

Telefoni ngendanwa zangiza ubwonko

Kera cyane mu Bugereki habayeho umucurabwenge witwaga Socrates. Uyu yasobanuye uko ikoranabuhanga ryo kwandika ryadutse mu Misiri, risanga abantu bakoresha imitwe mu kwiyibutsa no gutekereza.

Ikoranabuhanga ryo kwandika ryavumbuwe mu Misiri n’imana yo muri iki gihugu yitwaga Theuth.

Theuth yahise abimenyesha Umwami w’imana zose witwaga Ammon, amusobanurira ko kwandika bizatuma Abanyamisiri barushaho kuba abanyabwenge.

Byari umuco ko igihangano cyose Theuth yakoraga yacyerekaga umwami na we akakigaya cyangwa akagiha umugisha. Mu byo yamweretse, icyo kwandika yakigiriye impungenge aramubwira ati “Iri ni ikoranabuhanga ry’akaga.”

Umwami yabwiye Theuth ko igihangano yakoze kitazafasha abantu kwibuka ahubwo kizabibutsa.

Undi muhanga ukomoka mu Bugereki witwa Plato yashimangiye ko kwandika bitazatuma abantu bagira ubwenge ahubwo ibitabo ari byo bizaba bibubitse.

Ndatekereza ko buri wese yamenye akamaro ka telefoni nk’igikoresho kidufitiye akamaro ariko gishobora kwica no koreka ubuzima iyo ikoreshejwe nabi.

Ubushakashatsi bw’Ikigo cy’Ubuzima muri Leta Zunze Ubumwe za Amerika bwerekanye ko ubwonko bw’umwana ukunda gukoresha cyane telefoni n’ibindi bikoresho by’ikoranabuhanga budashobora gukura kimwe n’ubw’umwana utabikoresha cyane.

Ubu bushakashatsi bwanagaragaje ko n’abantu bakuru bafite ubwonko bwakuze mbere y’iyaduka rya smartphone, dushobora kugerwaho n’izi ngaruka z’ihinduka ry’ubwonko bwacu.

Bwerekanye ko gukoresha telefoni cyane bigabanya ubushishozi, gutekereza byimbitse no kuzirikana ibintu twakagombye kwibuka.

Kera abantu bafataga nimero z’inshuti n’abavandimwe babo mu mutwe ariko uyu munsi byose babishakira muri telefoni.

Mu ngo nyinshi usanga abana bato barereshwa telefoni ku buryo zasimbuye ibikinisho byabo. Ugasanga umwana ayirirwaho umunsi wose cyangwa areba televiziyo umunsi wose.

Ni gute umwana umeze gutyo azakunda gusoma? Ababyeyi bagomba kugenera abana babo umwanya wo gukoresha iri koranabuhanga ku buryo babona umwanya uhagije wo gusoma no gutekereza.

Tukiri bato batwigishaga imibare aho wasangaga mu cyo twitaga “MARA” abana benshi bazi gukuba, ariko muri iki gihe n’abakuru bifashisha imashini zo kubara muri telefoni bakora imibare yoroheje.

Ubushakashatsi bwakozwe n’Umwarimu w’Imitekerere ya Muntu muri San Diego State University, Jean Twenge, bwerekanye ko igihe smartphones zadutse aribwo indwara zo mu mutwe ziyongereye mu rubyiruko ndetse guhura no kuganira hagati y’abantu byaragabanutse.

Kuganira abantu bicaranye ni isoko y’urukundo n’ibyishimo, ariko telefoni zasimbuye kubonana amaso ku maso. Urukundo mu bantu rwiyongera bitewe no guhura amaso ku maso abantu bakaganira ariko kuvugana kuri telefoni gusa bituma urukundo rukonja.

Telefoni itamaza umushyitsi gito

Kimwe mu biranga umushyitsi utiyubaha watumiwe ahantu ni wawundi ugera mu rugo rw’abandi ugasanga yibereye kuri telefoni aho kuganiriza abo yaje gusura. Igitangaje ni uko uyu mushyitsi iyo ageze mu rugo akunda gusaba ibirimo chargeur ya Samsung na Iphone cyangwa password ya Wifi.

Mu kinyabupfura gikwiye umuntu agomba kwirinda gushyira umutima kuri telefoni mu gihe ari mu rugo rw’abandi, keretse iyo ayikoresha biri ngombwa kandi byihutirwa.

Hari n’abagera ku meza bakunama kuri telefoni! Iyo wasuye abandi urihangana, byaba ngombwa ukayifunga ngo itakurangaza bityo abo wasuye bakabona ko utitaye ku biganiro byabo.

Telefoni, igikoresho gituma benshi babeshya

Telefoni kuri benshi zababereye igikoresho kibafasha kubeshya. Hari igihe uhamagara umuntu umubaza aho ari akakubeshya ko ari mu ntara kandi umureba imbere yawe.

Hari usiba nimero yawe muri telefoni akakubeshya ko atakiyifite, ko yayibwe agashaka indi sim card.

Ku bakoresha WhatsApp abenshi bakuraho akamenyetso kagaragaza ko basomye ubutumwa. Wamubaza uti ko utansubije ati “Sinasomye ubutumwa bwawe uyu munsi.”

Abandi bifashisha telefoni mu guhunga, utashaka guhura n’umuntu wamutera imboni ukayishyira ku gutwi ukagaragaza ko uhuze.

Inama ku bantu telefoni ngendanwa yabereye nk’ikiyobyabwenge

Umuntu ukoresha telefoni ikamubera nk’ikiyobyabwenge hari icyo yakora hakiri kare.

Uburyo bwa mbere ni ukwiha gahunda, ukareba kuri telefoni isaha cyangwa iminota wihaye. Niba itaragera ntuyiteho umwanya ureba ibitagufitiye inyungu cyangwa bitihutirwa.

Ushobora kwirinda application zitari ngombwa aho hari abantu usanga bafite Facebook, WhatsApp, Instagram, Snapchat, Viber n’ibindi kandi byose atari ko bimufitiye umumaro.

Mu by’ukuri, application zose urazikeneye? Ni ngombwa ko zose uzitaho umwanya? Koresha ibigufitiye umumaro mu mwanya wabyo. Nubona ko Snapchat umwanya uyitaho nta cyo bikwinjiriza, yikure muri telefoni yawe rwose!

Mu gihe ugiye kuryama ucometse telefoni yawe, yishyire kure yawe ndetse wihe gahunda y’igihe cyo kuyikoresha.

Wari uzi ko urumuri rwa telefoni rwangiza imboni z’amaso yawe? Irinde urumuri mu gihe ugiye kuruhuka mu ijoro kandi ntuyikoreshe utwaye ikinyabiziga kuko ishobora kuguteza impanuka ukabura ubuzima.

Budurege Jean de Dieu ni umusomyi wa IGIHE

Abantu benshi bamaze kuba abagaragu ba telefoni zigendanwa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
RAYANA 2019-03-05 00:29:53

URAKOZE CYANE KURI IYI NKURU IRIMO UBWENGE BUDUFASHA MUBUZIMA BWA BURI MUNSI PE. TEL YO NI IKIBAZO GIKOMEYE CYANE MUNGO Z’UYU MUNSI. IRASENYA NDABARAHIYE. UMUBYEYI WONSA NKAHO YAKONKEJE AREBA URUHUNJA MUMASO RUMUSEKERA YIFATIRA TEL YE AKAJYA KURI CHAT!!!! ABANA BAKURU BO BARAKUBWIRA NGO MAMAN NAWE KO TEL YAGUTWAYE NKA PAPA!!!TURAKUBWIRA NTAGO UTWUMVA!!! BABYEYI TWISUBIREHO BIKOMEYE DUHE ABO TWABYAYE UMWANYA TWO KUBASIMBUZA TEL. MURAKOZE

2
Sele 2019-01-11 02:13:05

Inkuru ziza ifite inyigisho nyinshi dukeneye muri iyi si ya technology yubujyi buburi!!!

3
Cesco 2019-01-10 16:14:20

Ibyo nibyo.Nakuze Data na Maama bambwira amateka ya ba sogokuruza babo n’ibusekuru ntaho babisoma.Narabyanditse none sinzi iyo nabitaye kandi nabo ntibakiriho.None ubu nzi phone ya Mme mu Mutwe naho iz’abana mbanza kuzireba muri phone.Kera abo twahuraga nibukaga amasura n’amazina..none ubu turahura....kuzahuzahuza izina n"umuntu mwibarisha phone ni grave.

4
Jano 2019-01-10 13:53:30

Mwibagiwe ko yabaye gatanya mu ngo z’iki gihe! Utaretse n’intonganya za hato na gato.

5
Camarade 2019-01-10 13:49:56

Mubihugu byateye imbere bo bazi ingaruka zabyo bakanazirinda mugihe twe twasama tukamira byose tutazi ingaruka z’iri koranabuhanga.

Kwamamaza