IGIHE

Ibiganiro bya politiki mu Rwanda; nta bifurumba by’amafaranga bikenewe

1 2-07-2019 - saa 17:38, Albert Rudatsimburwa

Ubwo mu minsi ishize Perezida Kagame yabazwaga niba abona hashobora kuba intambara hagati y’u Rwanda na Uganda, yasubije ati “ntayo mbona hafi aha.”

Ibi yabishingiye ku mahoro yaranze umubano w’ibi bihugu byombi mu myaka isaga 20 ishize, nubwo hagiye habamo ibibazo.

Niba ikibazo gihari uyu munsi kimwe n’ibindi byabanje byaje bigahita nta ntambara ibaye, ni ukubera ukuri buri wese agomba kumenya: “U Rwanda ni igihugu cyigenga gifite guverinoma yacyo, nubwo (Uganda) yakwifuza ko u Rwanda ruba munsi yayo.” Uganda yibwira ko ishobora gukemura iki kibazo binyuze mu kubwira u Rwanda icyo rugomba gukora.

Ku wa 8 Kamena 2019 umunyamakuru ukomeye wo muri Uganda yanditse igitekerezo muri Daily Monitor ko ikibazo kiri hagati y’ibihugu byombi cyatewe n’uko Perezida Kagame yanze “icyerekezo” na “gahunda” Museveni afite ku Rwanda.

Icyo gihe ibinyamakuru byo muri Uganda byari bikomeje kumvikanisha ko u Rwanda rukwiye kuganira “n’abatavuga rumwe n’ubutegetsi bahunze” ni Rwanda National Congress (RNC), maze kuri iyo nkuru bashyiraho ifoto ya Kayumba Nyamwasa.

Uganda yitwara nk’aho ari yo izi ibyo banyarwanda bakeneye. Nubwo ibyo kuba u Rwanda ari igihugu gifite ubusugire byigeze kujya ku ruhande, tugafata ibikorwa bya Uganda ku Rwanda nk’ineza, ko irwifuriza ibyiza akaba ari nayo mpamvu ikomeza kuzana iyo nama yayo idakenewe, ibijyanye n’icyerekezo, imiyoborere n’ibiganiro byaba ari ingingo Uganda ikwiye kugiramo u Rwanda inama cyangwa n’ikindi gihugu? Mu mupira w’amaguru wenda. Ariko mu bijyanye n’imiyoborere n’ibiganiro, nta somo u Rwanda rukeneye kwigira kuri Uganda.

Itegeko Nshinga ry’u Rwanda riteganya ibiganiro kandi si ku banyapolitiki gusa, ni kuri buri munyarwanda. Amahame remezo abiri muri atandatu ya leta y’u Rwanda ateganywa mu ngingo ya 10, avuga ku “isaranganya ry’ubutegetsi” no “gushaka buri gihe umuti w’ibibazo binyuze mu nzira y’ibiganiro n’ubwumvikane busesuye.”

Itegeko Nshinga riteganya Ihuriro ry’Igihugu Nyunguranabitekerezo ry’Imitwe ya Politiki (mu ngingo ya 59) “kugira ngo ishobore kungurana ibitekerezo no kubaka ubwumvikane n’ubumwe bw’Igihugu.” Imitwe ya politiki yose ishobora kujya muri iri huriro, riganirirwamo politiki zitandukanye mbere y’uko zijyanwa mu Nteko Ishinga amategeko ngo zemezwe cyangwa zikorwemo amategeko.

Ingingo ya 62 iteganya ko Perezida wa Repubulika na Perezida w’Umutwe w’Abadepite badashobora guturuka mu mutwe umwe wa politiki ndetse ko umutwe wa Politiki wabonye amajwi menshi mu matora y’Abadepite udashobora kurenza 50% by’abagize Guverinoma. Ibyo kandi bijyana n’uko umutwe wabonye amajwi 5% uhabwa umwanya muri guverinoma.

Izi ntabwo ari inyandiko ziri aho gusa. Abanyarwanda bubahiriza Itegeko Nshinga ryabo umunsi ku wundi, bakagira uruhare mu “gushaka buri gihe umuti w’ibibazo binyuze mu nzira y’ibiganiro n’ubwumvikane busesuye.”

Ibi bikorwa haba ku nzego z’ibanze, buri wa Gatandatu wa nyuma w’ukwezi mu Umuganda, aho baganira ku bibazo by’abaturage cyangwa bakicara Abunzi bagakemura amakimbirane igihe ahari. Ni nako bigenda iyo haganirwa ku bibazo mu Nama y’igihugu y’Umushyikirano.

Ibi kandi kandi ntabwo ari gahunda ziri aho Perezida ashobora gusiba ku mpamvu iyo ari yo yose cyangwa ngo azitabire yitwaje imifuka y’amafaranga yo guhonga abatavuga rumwe na we. Perezida asabwa n’Itegeko Nshinga gusaranganya ubutegetsi, si ukubugura, ni n’uburenganzira bw’abatavuga rumwe n’ubutegetsi kugira uruhare mu kubaka igihugu.

Nabwo ari impuhwe zitangwa n’umuntu uwo ari we wese. Perezida w’u Rwanda ntabwo akeneye kwitwaza ibahasha za kaki.

Nta bakora iterabwoba bakenewe

Itsinda ryonyine rihejwe muri uwo mushyikirano ni abakora iterabwoba n’abakigendera ku ngengabitekerezo ya Jenoside. Uku kutemerwa kandi ntabwo kwatangiriye kuri RNC, Uganda ikomeje gusabira ibiganiro.

Iryo hame risanzweho guhera mu 1994 ubwo ryemeranywagaho ko amashyaka yateguye ndetse agashyira mu bikorwa Jenoside agomba guhezwa mu buzima bwa politiki y’igihugu.

MRND ya Perezida Habyarimana n’amashyaka byakorananaga nka CDR, yahagaritswe burundu muri politiki y’u Rwanda. Wenda ikidatangaje ni uko abari bayagize, abenshi bahise bimukira muri Uganda: dosiye y’abasaga 250 bashinjwa uruhare muri Jenoside yakorewe abatutsi bashakishwa yashyikirijwe ubuyobozi bwa Uganda ngo bugire uruhare mu kubafata no kubashyikiriza ubutabera, ariko kugeza uyu munsi icyo gihugu gikomeje kwicecekera, kikagaragaza ko gishyigikiye umuco wo kudahana abagize uruhare muri Jenoside.

Mu yandi magambo, gutakambira RNC uyisabira ibiganiro bya politiki biri mu murongo wo kubererekera abajenosideri yahaye ubuturo. Niba Uganda ifite inyungu mu gukingira ikibaba abajenosideri n’abakora iterabwoba, icyo ni cya “cyerekezo” u Rwanda rudakeneye kwigiraho.

Muri make, niba Uganda ikeneye ibiganiro n’abakora iterabwoba, umuntu yakwibaza impamvu itegera Joseph Kony cyangwa ngo inafungure Jamil Mukulu wa ADF uri muri gereza, ngo bajye muri ibyo biganiro yifuriza u Rwanda, niba bishoboka. Ibiganiro bya politiki n’abantu bayirimo ntabwo ari isomo u Rwanda rukeneye guhabwa.

Babishaka, batabishaka, abayobozi ba Uganda bakwiye kumva ko: U Rwanda ni igihugu gifite ubusugire na Guverinoma yigenga ititeguye kuba ikibuga cy’umuntu uwo ari we wese. Ni ibintu bigaragara ko bidakwiye gusaba Uganda intambara kugira ngo ikunde ibyumve.

Umwe mu bitabiriye Inama y'igihugu y'Umushyikirano iheruka arimo gutanga igitekerezo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Migabo 2019-07-02 13:36:08

Izi analyse za Rudatsimburwa azasome neza arebe niba na Habyarimana ataribyo yabeshyagamo abanyarwanda ababwirako muri MRND muri congré batanga ibitekerezo bigashyirwa mu bikorwa naza comités na comisiyo zabaga muri MRND. Mujye mubeshya abandi batabaye mu Rwanda.

Kwamamaza