IGIHE

Hari icyo ubwiza bw’igitsinagore mu madini bwongera ku buhanga bwo kuririmba?

12 28-05-2019 - saa 11:44, Pastor Desire Habyarimana

Bimaze kumenyerwa ko kugira ngo amashusho y’indirimbo akundwe ndetse agurwe cyane, ba nyirayo bifashisha abakobwa b’uburanga maze bagafotorwa babyina cyangwa bagaragazwa ikimero.

Hari kandi n’abahitamo kubambika ubusa, aho barimbishwa utwenda tw’imbere gusa, bitewe ahanini n’ubutumwa bashaka gutambutsa.

Uyu muco wanashibukiye mu baririmbyi bakora indirimbo z’iyobokamana cyangwa se izaririmbiwe Imana nk’uko bamwe bakunda kuzita; na bo basigaye bigana uwo muco aho bajya gukora amashusho y’indirimbo bagashaka abakobwa bazagaragara bayaririmbamo nubwo baba batarifashishijwe mu gufata amajwi.

Ibi byatumye hari abakobwa bagize aka kazi umwuga. Iyo witegereje neza usanga uyu muco utaratanzwe mu makorari atari make n’ubwo atari yose, abayobozi bayo bahihibikanira gushakisha abaririmbyi bashya.

Ubusanzwe kera umuntu yiyumvagamo umuhamagaro w’uburirimbyi, agahitamo korali azakoreramo umurimo, yamara kubisaba nabo bakabyigaho, ndetse hakigwa cyane ku kureba niba abashije umurimo ari gusaba.

Ubu si ko bikimeze cyane cyane ku makorali amwe n’amwe akorera umurimo mu bice by’imijyi. Kuri ubu umuyobozi wa korali ashakisha abaririmbyi ariko akibanda ku bakobwa n’abagore beza, ba bandi azashyira ku murongo w’imbere.

Ese ubwiza bwabo buhuriye he n’ubutumwa batambutsa mu bihangano? Buhurira he se n’ubuhanga baba bitezweho?

Aho ntibyashoboka ko aba baririmbyi bari gutanga ubundi butumwa tutari twiteze butari ubwo twahawe na Yesu Kirisitu nk’uko bigaragara muri Matayo 28:19-20 ngo “Nuko mugende muhindure abantu bo mu mahanga yose abigishwa, mubabatiza mu izina rya Data wa Twese n’Umwana n’Umwuka Wera, mubigisha kwitondera ibyo nababwiye byose. Kandi dore ndi kumwe namwe iminsi yose kugeza ku mperuka y’Isi”?

Mu myemerere y’abizera, ntabwo indirimbo cyangwa ubutumwa twigishwa ari bwo buhindura abantu ahubwo Umwuka uri inyuma yabyo ni wo uhindura. N’ubwo hakoreshwa uburyo bunyuranye bwo gutanga ubutumwa bwiza bute, budaherekejwe n’Umwuka w’Imana ntacyo bitanga. Ahubwo umwuka wihishe inyuma y’ibyo utanga, ni wo ugena ubwoko bw’ubutumwa buzagera ku bo ubushyikiriza.

Reka twibaze: Ni uwuhe mwuka wihishe inyuma y’ibi?

Umwuka w’ubusambanyi ugenda winjira buhoro buhoro mu bantu, udasize no mu bakozi b’Imana kugeza ubwo iki cyaha kizasigara ari ibisanzwe nko gutukana cyangwa kubeshya.

Iyo urebye indirimbo zica kuri televiziyo zitandukanye ku Isi, izirenga 70% zigisha ubusambanyi. Biratangaje cyane kuko n’iyo hanyuzeho indirimbo ihimbaza Imana, ujya kubona ukabona ntaho bitaniye n’izanyuzeho mbere zitwa ko atari izihimbaza Imana.

Iyo uganiriye na bamwe mu bakurikirana hafi ibijyanye n’imyidagaduro, bakubwira ko ari ho Isi igeze, kandi ko abakora ibi baba bagamije gucuruza ibihangano byabo.

Ese ni izihe ngaruka bigira ku mitekerereze?

Birazwi ko intege nke z’abagabo n’abasore zigaragara iyo bageze imbere y’abagore n’abakobwa, baba noneho bambaye imyambaro igaragaza ikimero cyangwa imyanya y’ibanga bigahumira ku mirari. Iyi ni nayo mpamvu uzasanga igicuruzwa cyose abacuruzi bifuza ko kigurwa n’abagabo, cyamamazwa n’abakobwa cyangwa abagore beza.

Ibi bisobanuye ko iyo abagabo n’abasore bakurikiye indirimbo y’umuhanzi runaka cyangwa korali, haba kuri televiziyo cyangwa ari imbonankubone, amaso yabo atinda cyane ku buranga bw’abo bagore n’abakobwa. Ibi bituma usanga iyo indirimbo irangiye, igisigara mu mutwe wabo ari ubwo bwiza aho kuba ubutumwa wifuzaga kubashyikiriza.

Uzasanga akenshi imyambarire y’aba bakobwa n’abagore tuvuze ari imyambaro ibafashe, idahwitse rwose (abemeza ko iyi myambarire igezweho bavuga ko iri “sexy”).

Ubu rero ntabwo aba bagitinya kwinjirana iyo myambaro mu nsengero, bakaririmba rwose cyangwa bakabwiriza ubutumwa bwiza bw’Ubwami.

Uwakwemeza ko mu gihe ibi byaba bidahindutse bizatiza umurindi umuvuduko ubusambanyi buri kwinjirana mu itorero ntiyaba abeshye.

Mperutse kumva rumwe mu nsengero zihurirwamo n’abantu benshi hano mu Mujyi wa Kigali hasigaye harahawe izina rishya, “Ku Nkumi Nziza.”

Abashumba bategeka abakobwa kwambara imyambaro igaragaza ikimero

Hari bamwe mu bashumba bagize iturufu ubwiza bw’abagore n’abakobwa bigatuma babategeka bayobora kuramya no guhimbaza Imana bambaye imyenda ikurura abagabo.

Umunsi umwe nabajije umushumba umwe ikimutera kudacyaha iyo myambarire, ambwira ko abakobwa n’abagore basengera iwe basobanukiwe ko ibibero byabo bihesha Imana icyubahiro!
Ese ibi twabitandukanya dute n’ abaririmbyi baririmba indirimbo zisanzwe bambika abakobwa ubusa kugira ngo indirimbo zabo zigurishwe?

Ibi bishobora gufatwa nko kutubaha igitsinagore? Birababaje ko abantu b’igitsinagore ubwiza bwabo bufatwa nk’ikintu cyo gucuruza cyangwa gukoresha uko umuntu yiboneye kandi nabo bakabyemera bitewe n’impamvu nyinshi tutasobanura hano.

Kwakira agakiza kwiza ni ukwiyubaha. Simpamya ko waba wuzura Umwuka Wera w’Imana ngo akwemerere iyo myitwarire ahubwo ikibazo ni uko abavuga ko bakijijwe binjiranwe n’umwuka w’Isi. Igisigaye ni ukumenya niba abinjiranywe barabimenye ko binjiriwe cyangwa batarabimenya.

Muri iki gihe byakugora kubona ibintu by’umwimerere haba mu byo kwambara, kurya n’ibindi. Tutabaye maso bizagera ubwo no mu nzu y’ Imana tuzakopera ibyo tugaya abo twita ab’Isi.

Erega burya kugenda mu nyanja uri mu bwato ni byiza ariko iyo inyanja ije mu bwato burarohama. Abiyisiraheli bishwe na Egiputa kandi barayivuyemo. muka Loti yishwe na Sodomu kandi yaravuye i Sodomu. Ntibitangaje ko Isi izicira abantu mu itorero.

Mu gusoza igitekerezo cyanjye, ndisabira abayobozi b’amatorero guhagurukira iyi myitwarire mu nsengero bayobora, bakareba niba ubutumwa bifuza gutanga ari bwo n’abaririmba batanga kuko bizagorana igihe mu rusengero rumwe hazagera igihe hazaba hatangwa ubutumwa bubiri bunyuranye.

Icyo gihe umushumba azaba ahugijwe no kwigisha abantu amagambo y’Imana, abashishikariza gukomera mu rugendo no kwakira agakiza kubo katarageraho, naho abaririmbyi bahugijwe no gukurura abagabo n’abasore bazanywe no gushaka ibyabakomeza imitima ahubwo babarahurireho irari.

Ni hahandi uzasanga bamwe bahavuye bajya gusambana, abandi bikinisha, n’ibindi byaba bisigaye byaroretse Isi bishingiye ku mwuka w’ubusambanyi.

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Kagenza 2019-06-10 12:36:02

Ahari ibyinshi uyu mugiramana yanditse, ushatse yabipinga, ariko asigarane ko ’’ubwato bugenda mu nyanja, nyamara iyo inyanja igiye mu bwato burarohama’’.Urabe wumva ....wo mu rutiba.

2
jean mateso 2019-05-29 01:57:09

muli gospel songs no mu makorari yo munsengero, keretse uwo mwali cg se uwo mu maman afite ubuhanga bwihariye mu kulilimba no mu gutambutsa ubutumwa bwiza yaba yaratojwe n’Imana akaba afite iyo mpano, naho ubundi ubwiza bwabo bw’inyuma nta message ihambaye y’ubutumwa bwiza yatanga.

3
Rigue 2019-05-28 21:18:53

Iyi nkuru iri muzishimishije Cyane! Bishobotse mujye mugenera akanya inkuru nkizi wenda haricyo byamarira iyi Si tugezemo join with him on ma e-mail

4
Ruth 2019-05-28 14:00:16

Thank you Pastor,dukwiriye kwiyubaha no kubaha Imana

5
Today 2019-05-28 13:03:10

Kwandika inkuru nkiyi mu isi ya none ni ubutwari!

6
gatera 2019-05-28 12:10:12

This is true.Amadini y’iki gihe usanga akoresha Publicity kugirango abone amafaranga,nyamara Yesu yasize asabye Abakristu nyakuri gukorera Imana ku buntu nkuko Matayo 10 umurongo wa 8 havuga.Muli iyo Publicity,amadini yifashisha cyane Abagore n’Abakobwa beza,baririmba muli za Korali.Nubwo byitwa ngo ni indirimbo z’Imana,ziba zigamije kwamamaza idini no gushaka ifaranga.Niyo mpamvu usanga hajyayo abantu benshi bagiye kwirebera Inkumi nziza.Bibabaza Imana.Imana ivuga muli Matayo 15 umurongo wa 8 ngo :"Banyubahisha iminwa yabo gusa,umutima wabo uri kure yanjye".Tujye tuvumbura amayeri y’amadini.

7
BIZIMANA 2019-05-28 11:26:19

urakoze cyane. biranshimishije kuba hari umuntu wicara akitegereza ibintu biri kuba naho bigana akabisesengura atabogamiye munyungu ze. nubwo imbaraga zibiri inyuma ari nyinshi kurusha izi nama byibura hari nigisigara kumitima yababikoraga baba babizi cg batabizi. abakozi b’Imana nibareke gukora ibyo isi ishaka ngo niho ibihe bigeze, kugirango babone ababa kurikira; ahubwo bumvire umutimanama wabo akenshi uhamanya nibyanditse bize.

8
Muhinda muhozi 2019-05-28 10:56:36

Soma uko yesu yasengaga matayo 26:39 ibindi ni ugukurura publics

9
UWIRAGIYE JULIEN 2019-05-28 06:17:54

Pastor urakoze cyane rwose pe! nubwo agakiza ari ukwakira Yesu kandi koko ahindura umutima, kabone naho waba warahindutse mu ngeso zawe, bikwiye no kugaragara no mu buzima bugaragara n’inyuma. abantu bagomba kubaho decently( bibakwiriye). Ntidukwiye kwamabara neza inyuma ngo imbere tubidogereze cg se ngo twambare nabi tuvuge ngo agakiza kabamu mutima We have to be decent in our daily life.

10
Eco' 2019-05-28 06:07:35

Uku ni ukuri pe! Ikitubesheje mu murimo w’Imana ni ukuyihesha icyubahiro no kugarura abantu kuri Kristo kurusha uko the twagaragara nta kindi! Be blessed Pastor!

Paji: 1 | 2  

Kwamamaza