IGIHE

Abakwiza ingengabitekerezo ya Jenoside bakwiye akato

14 31-07-2019 - saa 08:23, Tom Ndahiro

Mfite impungenge. Izo mpungenge ziriyongera zikantera ubwoba. Izo mpungenge ziganisha ku bwoba, ni iyo mbona ikibazo cy’abafite bakanakwiza ingengabitekerezo ya Jenoside bafatwa nkaho ari abantu basanzwe. Muri abo hakaba n’abo abanyamahanga ndetse na bamwe mu banyarwanda bafata nk’abanyapolitiki, bikarushaho kuba umwaku aho wumva ko banafite n’abayoboke.

Ibyemezo byafashwe mu rwego rwa politiki y’igihugu bitanga icyizere gikomeye ko nta Jenoside izongera ukundi. Ni ibyemezo twatoreye gukurikiza nk’abanyarwanda kandi ku buryo budatezuka. Gutezuka akaba ariyo soko y’impungenge ko hari ibintu bikomeye bidahabwa uburemere bikwiye, ku buryo byasubiza inyuma ibyagezweho cyangwa bikadutinza mu majyambere y’igihugu.

Irangashingiro ry’Itegeko-Nshinga ryo mu 2003 rivuga ko Abanyarwanda baritoye n’abazarisanga “Twiyemeje kurwanya ingengabitekerezo ya Jenoside n’ibyo igaragariramo byose, ndetse no kurandura burundu amacakubiri ashingiye ku moko, ku turere n’andi macakubiri ayo ari yo yose”.

Iryo mu 2015 ryaje risobanura neza icyo twiyemeje ku bijyanye no kurwanya Jenoside: “Twiyemeje gukumira no guhana icyaha cya Jenoside, kurwanya ihakana n’ipfobya bya Jenoside, kurandura burundu ingengabitekerezo ya Jenoside n’ibyo igaragariramo byose, amacakubiri n’ivangura bishingiye ku moko, ku turere n’ibindi ibyo ari byo byose”. Iyo “TWIYEMEJE” isobanura ko bitareba bamwe bigasiga abandi.

Amagambo “gukumira no guhana” asobanuye neza ikigomba gukorwa kurusha “kurwanya” gusa. Kuba barongereyemo “kurwanya ihakana n’ipfobya rya Jenoside” bikaza mbere ya “n’ibyo igaragariramo byose” byongereye imbaraga z’ibisobanuro by’iyo ngingo.

Kuba bidakurikizwa ni yo soko y’impungenge. Iyo Jenoside ikumirwa mu Rwanda, ntiba yarabaye ngo bibe ngombwa ko abayikoze bahanwa nyuma yo kwicwa kw’Abanyarwanda barenze miliyoni. Ubutegetsi bwariho ntibwari kuyikumira kandi aribwo bwayigishije imyaka na yindi bukayitegura. Kugira ngo ihagarare, ni uko mu banyarwanda bayirwanyije hari benshi batanze ubuzima bwabo.

Ingengabitekerezo ya Jenoside, ihakana n’ipfobya ryayo bikorwa n’abantu, bikagaragara mu byo bakoze kandi bagikora. Akenshi, ababikora bakaba badatandukana no kwigisha amacakubiri n’ivangura.

Abakwiza Jenoside ni abo gukumirwa

Nyuma yo gutsindwa kw’abateguye umugambi wa Jenoside bakanawushyira mu bikorwa, barisuganyije bashinga ihuriro ryo kurengera ingengabitekerezo yaryo ryitwa RDR mu magambo ahinnye y’igifaransa. RDR yashingiwe i Goma muri Repubulika Iharanira Demokarasi ya Congo ku wa 3 Mata 1995.

Benshi mu bashinze bakanayobora iyo RDR ni abantu bizerwaga ko ari intagondwa mu ngengabitekerezo ya Jenoside. Abari abayoboke bayo b’imena banaburanishijwe n’Urukiko Mpuzamahanga Mpanabyaha rwakoreraga Arusha muri Tanzania.

Muri abo navugamo bake: Jenerali Augustin Bizimungu, Koloneli Theoneste Bagosora, Majoro Aloys Ntabakuze, Dr. Ferdinand Nahimana, Jean Bosco Barayagwiza, Laurent Semanza na Hassan Ngeze wamamaje iryo huriro ry’ubugome rugikubita. Abo ni bake gusa tuvuze.

Uwayoboye iryo huriro igihe kinini kurusha abandi, ni Ingabire Victoire Umuhoza (IVUmuhoza). Mu minsi ya vuba aha, ibinyamakuru mpuzamahanga bitandukanye byanditse inkuru ko ngo hari abayoboke ba FDU-Inkingi bayoborwa na IV Umuhoza baburiwe irengero.

Nk’ubu hari abantu benshi, abakuru n’abato, batazi ko uyu IV Umuhoza yayoboye ihuriro ry’abaJenosideri nyuma ya Jenoside. Kandi abaJenosideri ntibagutora kubabera umuyobozi batakwiyumvamo.

Nta munyarwanda uwo ari we wese ukwiye kuburirwa irengero. Uwitwa umuyobozi wabo azafatanye na leta gushakisha abo yita abayoboke be.

Ariko, ikibazo gikomeye giteye n’impungenge cyane, ni ukumva IV Umuhoza afite abayoboke mu Rwanda. Abo bayoboke bakaba banavugwa ko ari umutwe w’abaJenosideri kuko uwitwa umuyobozi wabo atarigera yihakana asabira imbabazi ibyaha yakoze na nyuma yo kuzihambwa nk’abandi nkawe ibihumbi n’ibihumbi.

Ishyaka ry’ubwoko bumwe

Ku itariki ya 1 Nyakanga 2005, Radiyo BBC-Gahuzamiryango yagiranye ikiganiro n’abantu batatu. Umwe ni Mzee Servilien Sebasoni wari Umuvugizi w’Umuryango FPR-Inkotanyi. Abandi bari François Nzabahimana wari Perezida wa mbere wa RDR kugeza mu 1997 na Ingabire Victoire Umuhoza wari Perezida wa RDR icyo gihe.

Abateguye icyo kigamiro, Felin Gakwaya na Ally Yusuf Mugenzi wakiyoboye, bibukije ko banizihizaga imyaka 10 ya RDR kuko yatangiye mu 1995. Kwizihiza isabukuru y’ihuriro ry’abaJenosideri ubwabyo ni agahomamunwa ariko si igitangaza kuri BBC-GAhuzamiryango.

Muri icyo kiganiro hari ibintu bibiri nakuyemo byavuzwe na IV Umuhoza. Icya mbere ni icy’abayoboke n’abayobozi ba RDR, ikindi ni icyo kwihaniza FPR yanze kumva ku mahoro ikazagamburuzwa n’intambara.

Ku cya mbere, Mugenzi yabajije IV Umuhoza ati: “RDR yatangiye ivugira impunzi, irahinduka iba umutwe wa politiki, ubu ng’ubu iravugira mu mahanga ariko hari abayirega ko mu by’ukuri imeze nk’aho ukiri umutwe uvugirwamo n’ubwoko bumwe. Sinatinya kuvuga ko uvugirwamo n’Abahutu gusa.”

IV Umuhoza byaramuruhije, cyakora ntiyari kubura icyo avuga afite urubuga ku nsakazamajwi nk’iyo. Avuga ko ibyo bintu atari byo ngo cyakora bafite ikintu bemera kandi “batandukaniyeho na FPR”, ngo bo bemera ko mu Rwanda hari amoko atandukanye y’Abahutu, Abatwa n’Abatutsi. Kandi ko ayo moko “atari ikinegu, buri munyarwanda wese agomba kubyemera, ahubwo ko ari ubukungu twagombye kususha abandi…”

Ubwoko buba ubukungu bushingiye kuki? Ubwoko bwakoherezwa mu mahanga nk’igicuruzwa? Iyo yari politiki ya Jenoside aho kwica “ubwoko” bumwe byahaga abica inyungu yo kunyaga iby’abandi. Ni byiza ko yibutse ko FPR ishyira imbere ubunyarwanda idashyira imbere ubwoko budafite agaciro.

Mugenzi yaramubajije ati: “Mu buyobozi mufite harimo Abatutsi?” Ubajijwe yariye iminwa, arabeshya ngo “Amoko yose uyasangamo…” ariko nta rugero yatanze kuko ari ntarwo. Kubeshya ntibyamuvunaga kubera ko RDR ariho ishingiye. Uretse no kuvuga Abatutsi, Umuhutu utari intagondwa nka we, cyangwa Ndereyehe Charles Ntahontuye yasimbuye, nta mwanya yakabonye muri RDR kuko abayitangije n’abayiyoboye bazwi.

Kuba uyu munsi IV Umuhoza ajya mu cyaro gushaka abayoboke mu bwoko, nta gitangaza. Ni ingengabitekerezo imutinzemo! Igitangaje ni ugukomeza kurebera abiba urwango.

Iterabwoba riterwa n’ubuhumyi

IV Umuhoza yabajijwe impamvu RDR idashobora gutaha igakorera mu Rwanda. Igisubizo cyari gikaze: “RDR ntidushobora kujya gukorera mu kwaha kwa FPR. FPR twayihaye igihe kinini , imyaka icumi irashize, twarayibwiye bihagije..”

Yongeye kubishimangira asubiza Sebasoni anabwira FPR: “ntabwo tuzahera hanze. Ntimushobora kuduheza hanze, u Rwanda ni igihugu cyacu. Kugeza ubu turababwira ku neza ngo mukingure ayo marembo mwugariye, mwemere habeho demokarasi… muri kubyanga uko mwatashye murabizi, murabizi uko mwatashye!”

Uburakari bwari butarazamuka bihagije Mugenzi ataramubaza niba nyuma y’imyaka 10 RDR imaze batazongera kumara indi ari impunzi.

IV Umuhoza yabonye umwanya wo gutera ubwoba FPR no gukorera mitingi kuri BBC. “Ntabwo indi myaka icumi tuzayimara turi impunzi. Twagize igihe gihagije cyo gusaba FPR, kuyibwira ku neza ko igomba gukingura amarembo ya Demokarasi. Twayihaye igihe ngo irebe nayo ubushobozi bwayo bungana iki. Ubu rero igisigaye, kuko abanyarwanda ntabwo bashobora kuguma mu butindi n’ubutindahare.”

Uwo perezida w’abaJenosideri ati: “Ubu igisigaye…RDR ibahamagariye gufatanya natwe, ubu ngubu, tukarwanya ubutegetsi bw’igitugu bwa FPR, tugashyiraho ubutegetsi bw’abarurage. Ubu mu myaka icumi iri imbere ni cyo RDR igiye gukora, kandi turizeza Abanyarwanda ko dufatanyije mu gihe kitarenze imyaka icumi, ibintu bizaba byarahindutse mu Rwanda.” Mu mvugo ishingiye ku ngengabitekerezo ya Jenoside, iyo bavuga ‘abaturage’ cyangwa ‘abanyarwanda’ baba bavuga abatari Abatwa ntibabe n’Abatutsi. Ari naho inyungu mu bwoko bayumvira.

Nyuma y’imyaka itanu Ingabire Victoire Umuhoza ahaye FPR gasopo kuri radiyo BBC, yaratashye. Ingengabitekerezo arayitahana, inamugiraho ingaruka arabifungirwa. Mu Rwanda ibyahindutse byarahindutse nta RDR ibigizemo uruhare. Ntiyigeze amenya imbaraga za FPR yateraga ubwoba.

Agifunze yasabye imbabazi Perezida w’u Rwanda Paul Kagame. Yarazihawe arafungurwa atarangije igihano yahawe. Akigera hanze IV Umuhoza ajya ku maradiyo yabo ahakana ko nta mbabazi yasabye ahubwo akiri nkuko yagiye muri gereza.

Ebola si yo mbi kurusha Jenoside

Nk’ubu harakoreshwa imbaraga nyinshi kandi za ngombwa mu rwego rwo gukumira indwara ya Ebola. Izo mbaraga zigakoreshwa kubera ko mu gihugu cy’abaturanyi iyo ndwara imaze guhitana abarenze 1300. Agakoko kayitera, ntikibasira ubwoko nka Jenoside. Abishwe n’iyo ndwara bapfuye mu gihe kirekire ugereranyije n’abarenze miliyoni bishwe mu Rwanda bazize Jenoside mu minsi ijana gusa.

Muri izo mbaraga zo gukumira Ebola, habamo gushyira uyirwaye mu kato ngo atanduza abandi. Uyigaragaweho yitabwaho bw’umwihariko n’abahanga babitojwe kandi babyambariye mu buryo batapfa kwandura. Mu byo bakora hari no gufuhera imiti nk’uburyo bwo gukumira iyo ndwara mbi itavurika ku buryo bworoheje.

Jenoside si igikatu, ariko iyo igiye kwica, itsemba ubwoko bwibasiwe n’ubundi. Jenoside kandi ntiyandurira mu byuya, amaraso cyangwa andi matembabuzi nk’ay’agakoko ka Ebola n’izindi ndwara zandura mu buryo nk’ubwo. Jenoside ikwizwa n’abafite ibyo bitekerezo, akenshi babifashijwemo na leta.

U Rwanda ni urugero rwiza aho leta yateguye umugambi wo gutsemba Abatutsi kandi ikawugeraho. Kugira ngo Jenoside ihagarikwe ntibyaturutse ku mbaraga z’abahanga b’Ishirahamwe Mpuzamahanga Rishinzwe Ubuzima (WHO/OMS). Habaye ah’Inkotanyi n’ubutwari bwazo. Habaye n’ubushake bw’Inkotanyi bwo kubaka igihugu kirangwa no gusenya ibyo Jenoside yubakiraho.

Inshingano yo kurwanya ingengabitekerezo ya Jenoside n’abayikwiza, ni inshingano ya buri munyarwanda ndetse n’inyokomuntu. Mu nzego za leta, iyi nshingano si iya CNLG, RIB n’Ubushinjacyaha gusa. Na Minisiteri y’Uburezi birayireba. Amateka nk’aya akwiye kuzigishwa abana b’u Rwanda ntibazazire kutamenya aho bavuye, bakanirinda ibitekerezo by’abaroga ubwonko.

Iby’abanyamahanga kutita ku buzima n’imibereho by’Abanyarwanda si bishya. Gufata IV Umuhoza nk’umunyapolitiki usanzwe ufite uburenganzira bwose, bishobora kuba ari ubujiji, agasuzuguro n’urwango rushingiye ku irondabwoko cyangwa se izindi nyungu.

Ariko ku banyarwanda dufite inshingano n’inyungu zo kurwanya Jenoside n’ingengabitekerezo yayo ntacyatuma tudasaba ko yahabwa akato kenda kungana cyangwa akaruta aka Ebola. Ako kato ntikaba ako kumubuza kujya mu misa no mu isoko guhaha, ariko kaba ako kumukumira kugira uwo ajya kwanduza virusi y’ingengabitekerezo ya Jenoside, kuko nawe yemera ko ayifite.

Ibyo yakoze kera n’ubu aracyashaka kubikomeza. Ariko n’amategeko amubuza ubwo burenganzira bwo gukora politiki, cyane cyane ukurikije ibyo yahaniwe. Kumwemerera gukora politiki, ni uguhembera Jenoside kandi dufite inshingano yo kuyirwanya.

Aho ibintu bigeze ikintu cya mbere gikwiye gukorwa ni ukumurinda urubyiruko rutamuzi, kugira ngo atarwanduza.

Ingengabitekerezo ya Jenoside ntivukanwa yigishwa n’abantu nka IV Umuhoza. N’umunyarwanda mukuru uha IV Umuhoza agaciro akamutega amatwi ndetse akamubera umuyoboke, akwiye kwibazwaho kuko amaherezo yazakora ishyano. Ako kato amaherezo nabo gakwiye kubageraho.

Ibyo kuvuga ko we na FDU-Inkingi ye badakwiye kwemererwa gukora politiki mu Rwanda ndetse n’ahandi turabivuga tubisubiramo. Never Again izagira agaciro abantu bakwiza urwango n’ingengabitekerezo irufumbira izitiwe hose hashoboka. Ntibazabuza igihugu gutera imbare, ariko bagikerereza.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
lg 2019-08-01 06:31:37

Ubumwe nubwiyunge ntibivuga kurenza ho kugirango ikibyimba gikire kigomba kumeneka, abakoze nabafite bene wabo bagize, uruhare muli génocide iyo babonye inyandiko zanditswe ziyivugaho babura amahoro muli bo, bakumva ko ubivuze aba, akoze ishyano riruta iryo abo, bakoze ntanarimwe bitazavugwa ntanarimwe bitazandikwa igitangaje Tom uyu bikoma avuga ibintu ubu mudashaka kumva nyamara iyo babibabwiraga mwavuzaga ingoma namafirimbi amashyi nimpundu uyu munsi, biravugwa mukarwara umutwe Tom asubira, mubyo mwe, cyangwa bene wanyu bavuze, banditse, akanabereka aho biri abijujuta rimwe, banamutuka sindabona umwe uvuga ko ali ibihimbano igihe mwari, mubwicanyi iyo mumenya ko bizahinduka mwari guhera kunyandiko nibinyamakuru mukabitwika aliko, nanyuma nubu murandika Leta, niyo isaba ubwiyunge igasaba, ko ibyabaye bitazongera aliko ntisaba ko ibyabaye bitavugwa abadashaka kubyumva bihangane cyangwa biyahure kugirango bokujya babyumva *

2
Kuku 2019-07-31 14:11:49

Alright! Iki ni igitekerezo cy’umuntu.

3
yves 2019-07-31 08:43:48

Ndabasuhuje. Niba hano mu rwanda hari abantu bacyandika inkuru nkizi biragaragara ko ubukwe nubwiyunge bikiri kure. Shame of al rwandans

4
Isirikoreye 2019-07-31 07:37:37

Rwanda urababaje. Iyo mbonye inyandiko nkizi nsesa urumeza. Tuzahora mu matiku kugeza ryari. Nyagasani ni adutabare naho ubundi ntaho tuva ntanaho tujya.

5
[email protected] 2019-07-31 06:53:02

nikibazo, arko nawe wisuzume Mr tom.

6
Aline 2019-07-31 05:35:52

Uyu mugore umenya atuma Tom arara adasinziriye. Perezida niwe watubwiye neza ati ntituzongera kuyoba. Tom rero uyu mugore turamuzi bihagije ntawe yakwanduza. Kumwandikaho cyane ni nko kumwamamaza. Mwihorere twikomereze inzira y’iterambere

7
Nsanzimana felix 2019-07-31 03:06:18

Ndabasuhuje,Ingabire mumitwe y’abanyarwanda mugupfobya noguhakana genocide turamuzi ariko ndatekereza umuntu arahinduka ntituzi ahazaza he mubyukuri rero mbona bitaribikwiye gukoresha ifotoye kunkuru.kko dusubije amaso inyuma nawe mbonaharingaruka bimutera nyuma yokuyibona kdi burimunyarwanda agombakuba mugihugucye atekanye twese nikotubizi.nukombyumva.murakoze.

8
Nsanzimana felix 2019-07-31 03:05:54

Ndabasuhuje,Ingabire mumitwe y’abanyarwanda mugupfobya noguhakana genocide turamuzi ariko ndatekereza umuntu arahinduka ntituzi ahazaza he mubyukuri rero mbona bitaribikwiye gukoresha ifotoye kunkuru.kko dusubije amaso inyuma nawe mbonaharingaruka bimutera nyuma yokuyibona kdi burimunyarwanda agombakuba mugihugucye atekanye twese nikotubizi.nukombyumva.murakoze.

9
Gasabo 2019-07-31 02:48:50

Iyo uvuga umuntu impuha, uba wivuga imvaho.

10
Felix 2019-07-31 02:42:57

Ndabasuhuje,nibyiza kugitekerezo mwadusangije ariko sinibaza impamvu mwakoresheje ifoto yumuntu uzwi na rubanda nyamwinshi.icyonshakakuvuga twese turamuzi ko ari mubapfobyaga bakanahakana genocide ariko nemerako umuntu ahinduka ndabona bitaribikwiye kumuhakato murububuryo niyoyaba akigendera muribyo kko ibi ndabona ntamahoro bimuhaye ubu abanyarwanda twarajijutse ntago twumva ibintu ngoduhutireho.murakoze.

Paji: 1 | 2  

Kwamamaza