IGIHE

Abagore: Imbaraga zikomeye mu kubaka iterambere rirambye ry’u Rwanda

0 8-03-2019 - saa 10:09, Patrice Habinshuti, Prof. Pierre Damien Habumuremyi

U Rwanda ruzwi mu ruhando rw’amahanga nk’igihugu cyabashije kwikura ahabi kikiyubaka nyuma yo gusenywa na Jenoside yakorewe Abatutsi yo mu 1994, nyamara ubu kikaba ari kimwe mu bihugu bifite iterambere ryihuta kandi rwageze kuri byinshi mu gihe gito kingana n’imyaka 25 gusa.

U Rwanda kandi rufatwa nk’intangarugero mu bihugu biri mu nzira y’amajyambere rubikesha kuzamura imibereho myiza n’ubukungu by’abarutuye nk’uko bigaragarira muri byinshi rwagezeho, twavuga nk’ubukungu bwihuta cyane, imiyoborere myiza, ubuvuzi n’uburezi kuri bose, n’ibindi.

Mu gihe nta wakwiyibagiza ko igitsina-gore ari 52% by’abaturage b’u Rwanda bose basaga miliyoni 12; nta kabuza ko ibanga rituma u Rwanda rwesa imihigo mu gutera imbere byihuse rishingiye ku mahitamo yarwo nk’igihugu, yo kuzamura no guteza imbere umugore.

Buri mwaka tariki ya 8 Werurwe, isi yose yizihiza Umunsi Mpuzamahanga w’Abagore. Iki ni igihe cyo kwishimira ibyo abagore bagezeho mu mibereho myiza, umuco, na politiki. Uyu munsi kandi uba ari igihe cyo gushimangira ko ihame ry’uburinganire rikwiye gusigasirwa.

Mu gihe rero twizihiza uyu munsi, ni iby’agaciro kuri twe kubasangiza bimwe mu bimenyetso bigaragaza ibyo u Rwanda n’abanyarwanda twagezeho mu guteza imbere umugore, n’umusaruro byagiye bitanga mu iterambere ry’igihugu:

Kugira uruhare muri politiki no mu gufata ibyemezo:

Itegeko nshinga ry’u Rwanda rigena ko uburinganire ari ingenzi mu miyoborere y’u Rwanda kandi rigategeka ko nibura abagore bagira imyanya 30% mu nzego zose zifata ibyemezo.

Uyu munsi, u Rwanda ni cyo gihugu cya mbere ku isi gifite umubare munini w’abagore mu nteko ishinga amategeko ku kigero cya 61%. Byongeye kandi, abagore bagize 50% bya guverinoma yacu ndetse na 40% by’inama njyanama z’inzego z’ibanze zose; ibi bikaba bigaragaza ko abagore bagira uruhare runini mu gufata ibyemezo no mu miyoborere rusange y’igihugu mu nzego zose.

Uburezi:

Mbere y’umwaka wa 1994, uruhare rw’umwana w’umukobwa mu muryango nyarwanda rwari ahanini kubyara no kurera abana ndetse no gukora indi mirimo yo mu rugo, kuko yafatwaga nk’utagomba kwiga.

Uyu munsi u Rwanda ntirwashyize imbaraga mu burezi gusa, ahubwo rwibanze ku guteza imbere cyane uburezi bw’umwana w’umukobwa, ubu imibare igaragaza ko abana b’abakobwa bitabira ishuri cyane ku kigero cya 98% kurusha abana b’abahungu, bo bari ku kigero cya 97%.

Muri buri kigo cy’amashuri abanza cyangwa ayisumbuye, hashyinzwe “Icyumba cy’umukobwa” kirimo ibikoresho nkenerwa kugira ngo hakurweho imbogamizi umwana w’umukobwa yahura nazo zishobora gutuma asiba ishuli kubera imiterere y’ubuzima bwe.

Byongeye kandi, abakobwa bashishikarizwa kwiga amasomo y’ubumenyi, ikoranabuhanga, n’imibare mbere yafatwaga nk’agenewe gusa basaza babo b’abahungu; kandi abatsinze neza bakabona amahirwe yo gukomeza amashuri yabo muri muri za Kaminuza zikomeye zitandukanye, imbere mu guhugu ndetse no hanze yacyo.

Ubuzima:

U Rwanda rwashyizeho ingamba zifatika zituma abaturage barwo bose bagerwaho na serivisi z’ubuvuzi, ariko cyane cyane ab’igitsina-gore.

Urugero twatanga ni uko u Rwanda ari rwo rwabaye igihugu cya mbere ku isi mu bikiri mu nzira y’amajyambere cyabashije gutanga urukingo rwa kanseri y’inkondo y’umura ku buntu, ku bana b’abangavu bose.

Ku rundi ruhande, ntitwabura kugarakaza kandi ko abagore nabo bagira uruhare runini mu itangwa rya serivisi z’ubuvuzi cyane cyane mu nzego zo hasi, aho aribo bagize umubare munini w’amajyanama b’ubuzima barenga 45,000 bakora umunsi ku wundi kugira ngo servisi z’ubuvuzi zitangwe neza kandi ku gihe.

Amategeko n’ubutabera:

U Rwanda ni igihugu cyateye intambwe ikomeye mu gushyiraho umurongo w’amategeko n’ubutabera urengera igitsina-gore, twavuga nko mu guha umugore uburenganzira ku mutungo w’ubutaka, gutanga amahirwe angana ku bagabo n’abagore mu itangwa ry’akazi n’umushahara, kutemera ivangura rishingiye ku gitsina iryo ariryo ryose, ndetse no guhana akarengane gakorerwa abagore mu ngo, n’ihohoterwa rishingiye ku gitsina.

Kuri buri sitasiyo ya Polisi hagiyeho ISANGE One Stop Center, ndetse inageza serivisi zayo ku mavuriro. Iyi gahunda yabaye indashyikirwa mu gutanga ubufasha bwose bukenewe ku bahuye n’ihohoterwa, kubarinda kongera guhohoterwa, hirindwa isibanganywa ry’ibimenyetso n’itinda rya serivisi z’ubutabera. Ibi byose bituma u Rwanda ruba u ruhando rw’ibihugu byiza byo kuvukiramo ku bana b’abakobwa.

Iterambere mu bukungu:

Nk’uko bigaragazwa na raporo ya 2018 y’Ihuriro ry’Isi ryita ku Ubukungu (World Ecomonic Forum), u Rwanda ni cyo gihugu cya mbere ku isi mu kugira umubare munini w’igitsina-gore cyitabira umurimo.

Imibare igaragaza kandi ko abagore batanga umusanzu wa 30% mu bukungu bwose bw’imbere mu gihugu (GDP); kandi bakaba baratinyutse kwihangira imirimo aho ubu bayobora 42% by’amasosiyete y’ubucuruzi yandise mu gihugu hose ndetse na 58% by’ubucuruzi butanditse nk’uko byagaragajwe na raporo y’Ikigo Mpuzamahanga cy’Imari (International Finance Corporation).

Abagore kandi bahabwa amahirwe yihariye yo kubona igishoro mu bigo by’imari bya Leta n’ibyigenga. Urugero, nk’ikigo cya BDF giha imishinga y’igitsina-gore amahirwe yo gusonerwa ingwate kugera ku kigero cya 75% bigatuma kubona inguzanyo kwabo mu mabanki byoroha.

Muri raporo iheruka y’umwaka wa 2018 igaragaza icyuho kiri mu buringanire ku isi (Global Gender Gap Report), u Rwanda rwahawe umwanya wa mbere muri Afurika n’uwa gatandatu ku isi ku kuba rwarazibye icyuho mu buringanire ku kigero kirenga 80%, aho rwabashije ndetse guhiga n’ibihugu byinshi by’ibihangange ku isi mu kwesa uyu muhigo.

Turebeye u Rwanda mu ndorerwamo y’ibyavuzwe haruguru rwakoze n’umusaruro byagize mu kwihutisha umuvuduko warwo mu kwiyukaba no guhinduka igihugu giteye imbere, twakwemeza neza ko uruhare rw’abagore ari moteri nyayo y’iterambere rirambye.

Nk’uko bigaragazwa n’ibyagezweho biturutse ku guha ijambo umugore, ntitwashidikanya ko u Rwanda rukomeje kuba igihugu Afurika ndetse n’isi yose bakwigiraho akamaro ko kwimakaza uburinganire.

Twese abanyarwanda, uyu munsi ni ngombwa gufata uyu mwanya dushimira umunyarwandakazi wese uruhare rudasubirwaho agira mu gukomeza kubaka “u Rwanda twifuza”.

Prof. Pierre Damien Habumuremyi ni impuguke mu bijyanye na Politiki, naho Patrice Habinshuti akaba impuguke mu iterambere mpuzamahanga.

U Rwanda rufite umuhigo wo kugira abagore benshi mu Nteko Ishinga amategeko
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza