IGIHE

Uko byari bimeze mu myaka 25 ishize ubwo Guverinoma y’Ubumwe yajyagaho

6 19-07-2019 - saa 18:41, Tom Ndahiro

Itariki ya 19 Nyakanga 1994 ni umunsi ufite umwanya wihariye mu mateka y’u Rwanda. Niwo munsi hagiyeho guverinoma ikura u Rwanda mu kuzimu kw’igwingira. Ubu imyaka ishize ikaba ari makumyabiri n’itanu (25).

Umuhango wo kurahira kw’iyo guverinoma nshya iyobowe na Perezida Pasteur Bizimungu, wabereye imbere y’Inteko ishinga Amategeko mu ruhande rureba iburengerazuba (ubu ni reba kuri International Convention Centre). Ni hariya hari ishusho y’abasirikare barwanyije Jenoside.

Aho byabereye hari hashyizwe igisharagate cy’ihema ricitse ku mpande. Aho iryo hema ryatwikiraga naho hari hato, kuko ritageraga hose aho abanyacyubahiro bari bicaye.

Nta bantu benshi bari bitabiriye ibyo birori byayobowe na Colonel Theoneste Lizinde wari umusangiza w’amagambo. Ni ibirori byaciye kuri Radio Muhabura uwo munsi yari yabaye Radio Rwanda kuko studio zari zimaze kuva mu Kaniga ka Byumba igeze ku murambi wa Nyarugenge ahahoze Radio Rwanda n’ibiro bya ORINFOR.

Itangazamakuru mpuzamahanga ntiryabyitabiriye cyane kuko inkuru ishyushye kuri bo yari mu nkambi z’impunzi muri Tanzania, i Burundi na cyane cyane Zaire (Repubulika Iharanira Demokarasi ya Congo ubu). Igihugu cyari cyitabiriye ibyo birori ni Uganda, gihagarariwe na Minisitiri w’Intebe George Cosmas Adyebo.

Kutitabirwa n’abantu benshi barimo n’abanyarwanda si ubushake buke. Cyari ikibazo gituruka ahanini ku kwihugiraho kwa benshi. Abari mu gihugu benshi bari bacyishakisha batarigeraho ngo bibone aho bari n’aho babarizwa.

Guverinoma yagiyeho hari abacitse ku icumu benshi bibazaga niba bariho koko. Nyuma y’amezi arenga atatu bugarijwe n’urupfu, kuba bariho, bahumeka bakarya bakaganira bakagenda, byari igitangaza kurusha kuba ari ukuri.

Muri Kigali ubwaho, abari bahari bari bake. Uretse abaharokorewe n’Inkotanyi bavaga mu nkambi zitandukanye zirimo i Ndera na Kabuga ka Kigali, abari i Byumba na bake bari batangiye kuva i Rwamagana, i Gahini na Nyamata abandi bake ni abari barahungutse bava mu bihugu by’abaturanyi.

Ubwo buke, ubukene, kwiheba, ibyishimo birutwa n’agahinda mu bantu, byari bivanze n’ishyaka n’ubushake bwo kubaho no kwubaka u Rwanda rushya ruzira ubugome bwari bumaze guhekura igihugu.

Ntibyoroshye kuvuga cyangwa gusobanura uko u Rwanda rwari rumeze. Igihugu cyari cyuzuye umunuko w’abazize Jenoside yakorewe Abatutsi. Amaso n’amazuru by’abantu byari byaragize indi miterere. Abantu bari bamaze kumenyera kubona no kunukirwa imirambo myinshi yashengutse icyanamye ku gasozi kuko itari ifite gihamba. Abenshi mu bari mu Rwanda kunukirwa byari byarashize kuko ubwonko bwari bwarabyakiriye.

Hari henshi nko mu mifunzo hatagerwaga kubera ko hari hacyihishe interahamwe kandi zikaba zakwica abahonotse. Izo nterahamwe zikiyongeraho imbwa zari zimaze kumenyera kurya abantu. Abasirikare b’Inkotanyi bakarwana ku mutekano w’abantu bageragezaga kwishakisha, bakanarasa imbwa zabonye amafunguro mu bishwe zinashaka abazima.

Ibice by’u Rwanda nyuma ya Jenoside

Guverinoma yarahiye u Rwanda rwaracitsemo ibice. Hari u Rwanda rw’abari bamaze gutsembwa ariko mu buzima bw’abatari abicanyi bakiriho. Nirwo Rwanda mpereyeho kuko iyo urwo Rwanda rw’abishwe bazira icyo bari cyo rwibagirana, urw’abakiriho ariko biraye rwari kuzima.

Hari u Rwanda rw’abarimo Inkotanyi rugerageza kwubaka urundi Rwanda rutari urwa Parmehutu na Hutu-Pawa yari irekereje mu rundi Rwanda rwimukiye mu nkambi zo mu bihugu duturanye, ndetse n’abari mu gace kari mu kwaha kw’abafaransa kitwa “Zone Turquoise”. Uru Rwanda rwarubakitse, kuko nyuma yo gusenywa kw’inkambi batangiranye urugendo.

Hari u Rwanda rw’abanyarwanda ariko batumva neza ibyabaye mu gihugu cyabo. Muri abo hari abatahukaga, cyane cyane abakiri bato, babona urupfu rwibasiye u Rwanda ubwiza bw’igihugu cyabo babwiwe bakabubura. Ubu iyo myumvire yarahindutse.

Mu matariki nk’aya igihugu cyagiraga ijoro rifite umwijima mwinshi kubera ibyakibayemo, n’amanywa akagira umwijima kandi izuba ryaka. Si umwijima waterwaga no kuba nta mashanyarazi n’amazi byari bihari. Ni icuraburindi ryazanwaga na politiki y’ubugome yari imaze gutsindwa ariko itaranogoka. Ubu umucyo waratamuruye u Rwanda rufite umucyo unasagurira ahandi.

Ba ‘mbarubukeye’ bari barabaye benshi kubera amateka yabo ya kera n’aya vuba. Hari abana b’imfubyi batabarika hakiyongeraho abafite ibikomere by’umubiri bigaragara n’ibikomere bitagaragara. Ntawe ukira burundu igikomere cyo gusigara umeze nk’igiti gikokoye, ariko icyizere cyo kubaho kandi neza cyaragarutse.

Hari abacitse ku icumu bari bacyihishe batazi ko ubuzima bwaganje urupfu. Hari umugabo w’inshuti yajye wamenye ko abicanyi batakiri ku butegetsi mu Ukwakira 1994 kandi ari mu mujyi wa Kigali. Ubu nta munyarwanda wacitse ku icumu ucyihisha cyangwa ngo agende yububa. Uretse n’uwacitse ku icumu, utari mu cyiciro cy aba Kabuga Félicien wese nta munyarwanda wihisha.

Umutwaro w’Inkotanyi

Ibyo bibazo by’inzitane byose byari ku mutwe w’abayobozi b’Inkotanyi kuko uburwayi bw’igihugu butavurwa n’abaganga ba CHUK cyangwa Faycal, ahubwo burebwa n’abanyapolitiki n’ingabo.

Icyo gihe, mu myaka 25 ishize, u Rwanda rwari kuzima iyo hataba ingabo z’Inkotanyi. Nibo bagiraga amavuriro mu bushobozi buke bwayo. Abasirikare b’Inkotanyi ni bo barindaga umutekano w’abantu n’ibyabo bagafasha no mu itumanaho ryabo kuko nta telefone zabagaho. Urangisha uwo yabuze yiyambazaga Inkotanyi.

Inkotanyi zarwanaga ku gushakira amafunguro n’amacumbi abahunguka bava mu mahanga n’abavanywe mu byabo n’intambara na Jenoside. Inkotanyi zikarwana n’abajenosideri batigeze bava ku izima bagikubita agatoki ku kandi, ku rundi ruhande zirwanya abashaka kwihorera kubera Jenoside.

Inkotanyi zigaharanira kubaka u Rwanda rwa bose, uhereye ku kugarura mu ngabo za Habyarimana zari zimaze gutsindwa ariko zifitiye icyizere Inkotanyi. Icyo cyizere kikaba cyarabaye intango yo kubaka ingabo z’igihugu zikomeye.

Ibyo igihugu cy’u Rwanda cyagezeho mu myaka 25 byatewe na politiki itandukanye n’iya kera. Kuri uwo munsi w’iya 19 Nyakanga, asoza ijambo rye, Paul Kagame amaze kurahirira kuba Visi- Perezida na Minisitiri w’Ingabo yavuze ko ari inshingano ya buri wese kwibutsa n’abakoze amahano mu Rwanda bafite umwanya mu gihugu cyabo. Ati “Kandi dufite n’inshingano yo kubigisha, no kubahana bibaye ngombwa.”

Uko kwigisha no guhana birimo guca inkoni izamba byarakozwe. Ibyo bigatandukana na politiki zahozeho zo guheza no kwiyumvisha ko u Rwanda ari urwa bamwe gusa. Nta munyapolitiki wagwingiye mu mitekerereze no mu myumvire wabashaga kuvuga ko buri munyarwanda afite uburenganzira ku gihugu cye.

Muri iyo mbwirwaruhame Perezida Kagame yavuze ko ingabo yayoboraga kandi akiyoboye zari zigiye kwerekeza imbaraga zazo ku kuzamura imibereho y’abaturarwanda n’amajyambere. Ibyo nibyo byakozwe bafatanyije n’abandi banyarwanda.

Iyo usomye iyo mbwirwaruhame yavuzwe u Rwanda rukiri mu nzitane y’ibibazo, warangiza ukareba aho u Rwanda rugeze ubu, niho usobanukirwa icyo kugira ubuyobozi bufite icyerekezo mu mitekerereze bimara.

Ku itariki ya 14 Nyakanga 1994, Radiyo Mpuzamahanga y’Abafaransa (RFI) yagiranye ikiganiro na Faustin Twagiramungu. Muri icyo kiganiro, umunyamakuru Monique Mas yabajije Twagiramungu uburyo buzakoreshwa ngo abaturage bakurikiye leta y’abajenosideri batahe. Twagiramungu yamushubije ko igihugu kizakoresha radiyo, kubera ko ari bwo bwakoreshejwe na leta za mbere “kuroga ubwenge bw’abantu”.

Kurogora ubwo bwenge nicyo cyakozwe kuva iyo guverinoma ijyaho kugeza ubu. Imiterere y’ubwo burozi bw’ubwenge butera igwingira, n’ababutanze nibyo tuzakomerezaho.

Ubwanditsi: Iyi nyandiko ikubiyemo ubusesenguzi bw’Umushakashatsi kuri Jenoside, Tom Ndahiro.

Perezida Kagame yavuze ko ingabo yayoboraga kandi akiyoboye zari zigiye kwerekeza imbaraga zazo ku kuzamura imibereho y’abaturarwanda n’amajyambere
Perezida Bizimungu (ibumoso) na Visi Perezida Gen Maj Paul Kagame mu muhango wo kurahiza Guverinoma nshya tariki 19 Nyakanga 1994
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
mm 2019-07-21 06:18:30

Uriya musirikare wicaye inyuma ntiyaba ari MUDENGE wigeze kuyobora RURA?

2
Lory 2019-07-20 02:07:20

Ariko Seraphine yari icyuma di urareba uko yasaga ariya matariki nuriya mwaka !!!

3
Jonathan Nteziryayo 2019-07-19 23:35:31

rwose inkotanyi turabashimira mwadukuye ahaga.

4
Nishimwe Benitha 2019-07-19 16:23:37

Imana ijye yongera imigisha kubavandimwe batugejeje hano.
Biteye agahinda pe gusa imana irikumwe natwe.

5
Moses 2019-07-19 13:00:00

Mana Inkotanyi zarakoze zirakabyara zabyaje inka.
Nizirambe ingoma ibihumbiiiiiiiiiiiiiiiiiii

6
mutabazi Jackson 2019-07-19 12:25:14

iyi nkuru inteye agahinda kenshi gusa imana ikomeze kurinda u rwanda kdi imana uwagize uruhare wese mukuvana igihugu mwicuraburindi imana imuhe umugisha

Kwamamaza