IGIHE

Umushinga w’Itegeko Nshinga rivuguruye wahaye umwihariko Perezida uzatorwa mu 2017

0 29-10-2015 - saa 20:22, Rabbi Malo Umucunguzi

Umushinga w’ Itegeko Nshinga rivuguruye wamaze gutorwa n’Abadepite, uteganya ko Umukuru w’Igihugu wese uzatorwa mu 2017, azahabwa imyaka irindwi ndetse akazaba anemerewe kongera kuyobora izinda manda ebyiri z’imyaka itanu buri imwe.

Nyuma yo gutora umushinga w’iryo tegeko Nshinga, Perezida w’Inteko Ishinga Amategeko Umutwe w’Abadepite, Donatille Mukabalisa yahaye ikiganiro abanyamakuru, bamubaza niba Perezida Kagame yemererwa n’iri tegeko Nshinga riri gutegurwa kuyobora kugera muri 2034, asubiza ko ’aramutse abishatse nta tegeko ribimubuza.’

Nkuko bigaragara mu ngingo ya 172 y’ Itegeko Nshinga rivuguruye riri gutegurwa, Perezida uzatorwa muri manda itaha (mu 2017) azatorerwa manda y’imyaka irindwi, nyuma yayo hakazakurikizwa ibiteganywa n’ingingo ya 101, ivuga ko “Perezida wa Repubulika atorerwa manda y’imyaka itanu (5). Ashobora kongera gutorerwa indi manda imwe.”

Umushinga w’ivugururwa ry’ Itegeko Nshinga watowe n’Abadepite kuri uyu wa Kane tariki 29 Ukwakira 2015, ukaba utegereje kunonosorwa n’Abasenateri.

Abajijwe niba iri tegeko ritaravuguruwe kubera Perezida Kagame gusa, Mukabalisa, yavuze ko Itegeko Nshinga ritavuguruwe kubera umuntu umwe.

Yakomeje agira ati "Imyaka 7 ntabwo twayishyiriyeho Perezida Kagame wenyine kuko ntaranavugako aziyamamaza […] Ntabwo abantu bakora Itegeko Nshinga barikorera umuntu. Twagerageje gukora Itegeko Nshinga rizaramba tutazongera gusubiramo.”

Depite Mukabalisa yavuze ko abaturage basabye ko Itegeko Nshinga rivugururwa ariko ntirifungurire buri wese, uretse ko ngo bitari gushoboka ko umuntu wenyine akorerwa Itegeko Nshinga.

Nyuma y’uko Abadepite batoye umushinga w’ ivugurura ry’Itegeko Nshinga, ugomba koherezwa muri Sena nayo ikawusuzuma.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza