Nyuma y’aho ibikorwa by’ubuhinzi bw’umuceri bya Coproriz Ntende byagutse bikabyara ishoramari mu byo kwakira no gucumbikira abantu, ubuyobozi bwayo buvuga ko byatangiye gutanga umusaruro no kuzana impinduka zifatika mu gace iherereyemo.

Coproriz Ntende (Cooperative de Promotion des Riziculteurs de Ntende) ni koperative yashinzwe mu 2003 yibanda ku gihingwa cy’umuceri, ikaba yaragiye yaguka haba mu bwinshi bw’abanyamuryango n’umusaruro.

Mu mpera z’umwaka wa 2017 yatashye ku mugaragaro hoteli n’ibindi bikorwa byo kwakira abantu birimo amacumbi yo ku rwego rwiyubashye, aciriritse n’ahendutse; restaurant n’akabari, ibyumba by’inama, amahugurwa n’ubukwe.

Coproriz Ntende ikorera mu Murenge wa Rugarama w’Akarere ka Gatsibo hagati y’Umujyi wa Nyagatare na Kayonza ari na ho abakoreraga muri aka gace basabwaga kwerekeza igihe babaga bakeneye serivisi itanga.

Umuyobozi ushinzwe ibikorwa by’ishoramari, Karangwa James, yatangaje ko biga uyu mushinga bashingiye ku bibazo byari bifitwe na benshi ikaba ari yo mpamvu ugenda neza.

Yagize ati “ Twahereye ku cyumba cy’inama n’ubukwe, abatugannye bakabura aho biyakirira biduha igitekerezo cyo kubaka restaurant n’akabari gato. Byatumye restaurant iganwa kuko umushinga wizwe hashingiwe ku byo abantu bakeneye.”

“Nyuma abantu bakoreraga ubukwe n’amahugurwa hano batugaragarije ko bajya kurara i Kayonza cyangwa i Nyagatare. Twatekereje ko umushinga wacu wakwaguka tukagera ku gikorwa cy’amacumbi, aho abahakoreye bahakirirwa bakanaharara. Turishimira ko umushinga wunguka; ku kwezi hinjira hagati ya miliyoni esheshatu n’umunani z’amafaranga y’u Rwanda.”

Ibikorwa bya hoteli no kwakira abantu bisa n’aho ari umwihariko wa Coproriz Ntende ndetse ngo bimaze kwigarurira imitima y’abaturuka impande zose z’igihugu ndetse no hanze yacyo bajya gukorera muri Gatsibo.

Ni nako bizana impinduka muri aka gace nk’uko Perezida wa Coproriz Ntende, Rugwizangoga Elysée, yabivuze haba mu kwegereza serivisi abaturage bashakiraga kure no guhanga imirimo.

Ntende Hotel, igice kirimo amacumbi yo ku rwego rwa mbere
Ntende Hotel iherereye mu bice by'icyaro ariko imaze kuhateza imbere
Buri cyumba cyo mu macumbi yo ku rwego rwa mbere kiba gifite ibice bitatu birimo na 'Salon'
Ahaherereye amacumbi yo ku rwego rwa kabiri muri Ntende Hotel
Amacumbi yo ku rwego rwa gatatu (ahendutse kurusha ayandi ndetse afite ibyumba rusange)
Inzu yagenewe inama n'amahugurwa byakira abantu baringaniye
Icyumba cyagenewe inama n'amahugurwa ku bantu batari benshi
Ntende Hotel ifite n’akabari gafasha abakeneye ibinyobwa by’amoko yose
Restaurant iri mu bikurura abantu benshi muri aka gace
Icyumba cy'inama cyakira abantu besnhi icyarimwe
Icyumba gishobora kwakira inama, amahugurwa cyangwa ubukwe
Ikindi gice cyagenewe kwakira ubukwe

Amafoto: Niyonzima Moses


Kwamamaza

2009 - 2018 ©. All rights reserved