Ku nshuro ya mbere i Kigali hagiye kubera iserukiramuco ‘Turkish Food Festival’ rigamije kumvisha Abanyarwanda n’abagenderera Umujyi wa Kigali uburyohe bw’amafunguro ateguye ku buryo bumenyerewe muri Turikiya.

Ni iserukiramuco rizasusurutswa n’abahanzi bo muri Turikiya mu njyana zimenyerewe i Ankara, Umurwa Mukuru w’iki gihugu, rikazamara iminsi ine uhereye ku wa Kane, ribera muri Kigali Marriott Hotel buri mugoroba guhera i saa moya.

Turkish Food Festival yateguwe na Kigali Marriott ku bufatanye na kompanyi y’indege Turkish Airlines n’ambasade ya Turikiya mu Rwanda.

Byitezwe ko ambasaderi wa Turikiya mu Rwanda, Mehmet Karaca, azitabira iri serukiramuco hamwe n’abandi banyacyubahiro batandukanye.

IGIHE yaganiriye n’abatetsi b’Abanya-Turikiya basanzwe bakorera Istanbul Marriott Sisli, Ismail Keklikci na Samet Yildiz, bamaze iminsi ibiri i Kigali bitegura kuzagabura ibiryoshye bikomoka iwabo maze basobanura amwe mu mafunguro abantu bakwitega azava mu gikoni cyabo.

Keklikci umaze imyaka 13 mu kazi ko gutegura amafunguro yasobanuye ko gutegura ayo mafunguro bisaba gukomatanya imitegurirre itandukanye irimo iyo mu bihugu byo ku Nyanja ya Méditerranée, iby’Abarabu n’u Bugiriki.

Yagize ati “Twazaniye Abanyarwanda ibiryoshye byo muri Turikiya. Tuzagabura amafunguro atandukanye arimo yitwa ‘mezze, borek, manti. Amafunguro yacu agizwe n’inkoko, ifi, salade, beef kebabs, kofte n’ibindi byinshi. Dufite na desserts nka lokum yamamaye ku isi hose. Tuzanye ikawa n’icyayi by’umwimerere ku buryo abazagera hano bose bazaryoherwa.”

Keklikci yakanguriye uzitabira iri serukiramuco wese kutazibagirwa kurya ‘kuru fasulye’, ifunguro rikunzwe cyane muri Turikiya riba rigizwe n’ibintu byinshi harimo ibishyimbo, inyama, ibirunge n’imboga zitandukanye.

Ni ibirori bizagaramo imyambarire ikomoka muri Ottoman n’imirimbo imenyerewe muri Istanbul, umujyi ukomeye muri Turikiya ndetse usurwa n’Abakerarugendo benshi cyane baturutse ku isi hose.

Keklikci ati “Ntituje kumurika amafunguro y’iwacu gusa ahubwo tuje no kwereka Abanyarwanda ibindi byiza bikomoka muri Turikiya.”

Abitabira ibi birori basabwa kwishyura amafaranga 25,000 ubundi bagahabwa ibyo kurya no kunywa bumva n’umuziki kuva ku wa Kane kugera ku Cyumweru.

Indyo yitwa 'The Candy coconut cube'
Ikawa ikomoka muri Turikiya izagaragara muri iri serukiramuco
Samet Yildiz (ibumoso) na Ismail Keklikci, abatetsi bo muri Istanbul Marriott Sisli,bari i Kigali aho biteguye kugabura indyo zo muri Turikiya


Kwamamaza

2009 - 2017 ©. All rights reserved