Nyuma yo kuzuza ibyiciro bibiri by’inzu zigezweho ndetse nyinshi muri zo zikaba zaramaze kugurwa, Ikigo DND Developers Ltd, kiratangaza ko kigiye gutangira kubaka izigenewe abakeneye iziciriritse.

DND Developers Ltd ni Sosiyete y’Ubwubatsi ikorera mu Rwanda, yashinzwe mu 2015 ifite intego yo guteza imbere igihugu, ibinyujije mu guhindura ibijyanye n’imiturire.

Mu kiganiro na IGIHE, Umuyobozi Mukuru wa DND Developers Ltd, Eng. Daniel Mehari, yavuze ko mu gihe icyiciro cya mbere cy’izi nzu ziherereye Nyarutarama zamaze kugurwa, ndetse n’iziherutse kuzura aba mbere barazegukanye, ubu bari gutegura umushinga wo gutangira kubaka izindi ziciriritse.

Yagize ati “Twatangiye kuvugana n’ibigo bitandukanye kugira ngo twubakire abakozi babyo inzu zihendutse, kugeza ubu tumaze kuganira n’ibigo bigera kuri bine. Ikindi kandi dufite na gahunda yo gutangira icyiciro cya gatatu cy’umushinga wacu, aho tuzubaka izindi nzu nziza ariko zihendutse.”

Eng. Mehari avuga ko bitarenze uyu mwaka aribwo bazatangira kubaka izi nzu zizaba zigurwa hagati ya miliyoni 25-40 z’amafaranga y’u Rwanda.

Yanagarutse kandi ku nzu 12 zigerekeranye baherutse kuzuza i Nyarutarama zirimo izifite ibyumba bibiri na bitatu, avuga ko uretse izamaze kugurwa, banashyizeho uburyo bwo korohereza ababyifuza kwishyura.

Ati “Dutanga uburyo bwo kwishyura mu byiciro mu gihe kitarenze amezi atandatu. Uwifuza kwishyura mu gihe kirenzeho, icyo dukora ni ukumuhuza na banki dukorana nazo zikaba zamuha inguzanyo.”

Izi nzu zubatswe mu buryo bugezweho (apartments), ziherereye i Nyarutarama ku muhanda KG314 st. Zigurishwa hagati ya miliyoni 60-70 z’amafaranga y’u Rwanda.

Imibare iherutse gushyirwa ahagaragara n’Ikigo cy’Igihugu gishinzwe Imyubakire (RHA) igaragaza ko kugira ngo intego ya 35% by’abantu bagomba kuba batuye mu mijyi kandi batuye neza igerweho; hakenewe inzu ibihumbi 560 zirimo n’iziciriritse bitarenze mu 2020.

RHA ivuga ko inzu ziciriritse ari izigenewe abantu binjiza amafaranga ari hagati y’ibihumbi 50 na 900 y’u Rwanda buri kwezi. Inzu zivugwa zigomba kuba zigizwe n’ibyumba bitarenze bitatu kandi zifite agaciro katari hejuru ya miliyoni 30Frw. Ikindi ni uko inzu iciriritse ari iyo umuntu yagakwiye gukodesha amafaranga atarenze 30% y’ayo yinjiza buri kwezi.

Aba mbere batangiye kwigurira zimwe mu nzu 12 zubatswe na DND i Nyarutarama
Imiterere y'ibikoni by'inzu za DND
Inzu za DND ni gutya zimeze imbere
Inzu zubatswe na DND zirahendutse ugereranyije n'uko izindi zubatse aho ziherereye zihagaze
Izi nzu zubatswe zigerekeranye zirimo izifite ibyumba bitatu ndetse na bibiri
Nyuma y'izi nzu, DND Developers, irateganya kubaka inzu ziciriritse kandi nziza
Zifite ubwiherero n'ubwogero bigezweho
Zifitemo n'uburyo bwo gushyushya amazi yo kwiyuhagira
DND Developers irateganya gutangira icyiciro cya gatatu kizaba kigizwe n'inzu ziciriritse

[email protected]


Kwamamaza

2009 - 2018 ©. All rights reserved