Nk’uko byagiye bikorwa n’ibigo bitandukanye ku Isi hose mu kwizihiza icyumweru cyahariwe serivisi nziza, Canal+ Rwanda na yo yageneye impano zitandukanye abanyamahirwe mu bakiriya babo.

Icyumweru cyo kwita ku bakiliya cyatangiye tariki 4 Ukwakira kikazasozwa tariki 8 Ukwakira 2021, Insanganyamatsiko y’uyu mwaka ikaba igira iti “Imbaraga za serivisi.”

Mu rwego rwo gushimangira iyi nsanganyamatsiko, CANAL+ Rwanda yatanze impano zinyuranye ku banyamahirwe mu bakiliya bayo bagana amaduka yayo aherereye mu Mujyi wa Kigali ndetse inaboneraho kuganira na bo yumva ibyifuzo byabo.

Jules Wanda, Umuyobozi w’ishami rishinzwe kwamamaza no gufata neza abakiliya muri CANAL+ Rwanda, yavuze ko icyumweru cyahariwe kwita ku bakiriya ari umwanya mwiza wo kumva ibyifuzo byabo no kubashimira ubudahemuka bwabo.

Yagize ati “Muri iki cyumweru cyo kwita ku bakiliya, ni amahirwe kuri twe yo kubashimira ubudahemuka bwabo. Ni igihe cyiza kandi cyo kumva ibyifuzo byabo, kugira ngo turusheho kunoza serivisi tubaha, tugendeye ku byifuzo bagaragaje.”

Umuyobozi mukuru wa CANAL+ Rwanda, Sophie TCHATCHOUA na we yaboneyeho gushimira abakozi ba CANAL+ ndetse abibutsa ko kwita ku bakiliya no gutanga serivisi zinoze bigomba kuza ku isonga.

Ati, “Muri CANAL+ Rwanda, gutanga serivisi zinoze ku bakiliya ni yo ntego yacu ya mbere. Ibi tubikora twifashishije gahunda zinyuranye tubagezaho duhereye ku mashene yacu meza arimo ay’imikino, imyidagaduro na shene z’abana zose babona mu ndimi eshatu ari zo Igifaransa, Ikinyarwanda n’Icyongereza. Iki cyumweru ni icyo kubitura kuko ntibahwema kutubera ab’imena. Ariko kandi ni n’uburyo bwo kubegera birushijeho aho baherereye hose.”

Mu ntangiriro z’uku kwezi k‘Ukwakira 2021, CANAL+ yumvishe ubusabe bw’abakiliya bayo bari bamaze igihe basaba amashene y’Icyongereza, izana ifatabuguzi rishya ririho 15, arimo n’ay’imikino nka SuperSport ifite Premier League na La Liga yari amaze iminsi asabwa n’abatari bake.

Canal+ Rwanda yifatanyije n’Isi yose mu kwizihiza icyumweru cyahariwe serivisi
Canal+Rwanda yageneye abakiliya bayo impano zitandukanye
Umuyobozi mukuru wa CANAL+ Rwanda, Sophie TCHATCHOUA yibukije abakozi ba Canal+ Rwanda ko kwita ku bakiliya no gutanga serivisi zinoze bigomba kuza ku isonga


Kwamamaza

2009 - 2021 ©. All rights reserved