IGIHE

Umubano n’u Rwanda na Azerbaijan, Kagame muri AU, ubufatanye mu Kwibuka: Ikiganiro na Amb. Abdullayev

0 17-03-2019 - saa 14:33, Rabbi Malo Umucunguzi

Inama y’Abaminisitiri yo ku wa 26 Gicurasi 2017 ni yo yemeje ko Elman Abdullayev ahagararira igihugu cye cya Azerbaijan mu Rwanda ku rwego rwa Ambasaderi, afite icyicaro i Addis Ababa muri Ethiopie.

Uyu mugabo yahise aba ambasaderi wa mbere w’icyo gihugu mu Rwanda, yiha intego yo kugeza umubano w’ibihugu byombi ku rundi rwego.

Mu rugendo yagiriye mu Rwanda nyuma y’imyaka hafi ibiri muri izi nshingano, Ambasaderi Abdullayev yabwiye IGIHE ko hari byinshi bimaze gukorwa mu bufatanye bw’ibihugu byombi ndetse binyuze no mu Muryango wa Afurika Yunze Ubumwe, aho iki gihugu giherereye hagati y’u Burayi na Aziya gifitemo intebe nk’indorerezi.

Iki gihugu nubwo gifite ubuso bwa km2 86,600 buruta cyane u Rwanda, gifite abaturage batarenga miliyoni 10.

IGIHE: Ni iki cyakunyuze mu byo wabonye mu Rwanda?

Amb. Abdullayev: Ubwa mbere mpagera hari mu 2017, nashimishijwe cyane n’iterambere igihugu kigezeho kuko nk’igihugu cyanyuze mu bibazo bikomeye mu mateka, cyabashije kugera ku rwego rw’umutekano uhamye, iterambere ndetse u Rwanda rumaze kuba igihugu gihagaze neza ku rwego mpuzamahanga.

U Rwanda ni igihugu cyiza, nagiye nza i Kigali mu nshingano nka Ambasaderi wa Azerbaijan mu Rwanda, ariko mfite na gahunda yo gusura ibice bitandukanye by’igihugu.

IGIHE: Umubano hagati y’ibihugu byombi uhagaze ute?

Amb. Abdullayev: Hari amahirwe menshi ahari, mu ruzinduko rwanjye mu Rwanda nahuye n’abayobozi batandukanye mu nzego zinyuranye barimo Minisiteri y’Ububanyi n’Amahanga, Ikigo cy’Igihugu cy’Iterambere (RDB), RwandAir, twaganiriye uburyo bw’imikoranire kandi ndatekereza ko hari icyizere cyinshi cy’ubufatanye.

Azerbaijan ni igihugu giteye imbere mu nzego zitandukanye haba mu iterambere ry’ubukungu, ubukerargendo, iterambere ry’ibikorwa remezo, Azerbaijan imaze kuba icyerekezo cya ba mukerarugendo mu karere, hari byinshi twasangira n’u Rwanda.

Ikindi inzego zirimo amahirwe cyane navuga nko gutunganya umusaruro w’ibikomoka ku buhinzi, mu bwikorezi naho Azerbaijan irimo kugerageza guteza imbere ibijyanye n’inzira z’ibicuruzwa byacu na serivisi, u Rwanda aho ruherereye ni ingenzi cyane ku buryo rwaba inzira nziza yadufasha kugera ku masoko ya Afurika y’Iburasirazuba no hagati.

IGIHE :Twitege abashoramari benshi bo muri Azerbaijan bazashora imari mu Rwanda?

Amb. Abdullayev: Nta kabuza! Inshingano zacu nk’abahagarariye guverinoma zacu ni ukureba amahirwe n’inzego zishobora gufasha abikorera. Abashoramari barimo kwiga isoko, bareba ibintu bakora, kandi amahirwe y’ibi bihugu mu ishoramari ni menshi.

Nk’urugero Azerbaijan ni igihugu kiri mu biteye imbere mu karere iherereyemo, twateye imbere mu gutunganya umusaruro w’ibikomoka ku buhinzi, turi kimwe mu bihugu by’imbere mu kohereza ibikomoka ku buhinzi mu baturanyi bacu ndetse na kure yaho, aho dukorana ubucuruzi cyane n’Umuryango w’Ubumwe bw’u Burayi, tugemurira amasoko menshi ibicuruzwa byinshi.

Urundi rwego ni urujyanye n’imiti, navuga ko hari amahirwe menshi y’ishoramari, ariko turifuza kubanza kureba ayo mahirwe yose y’ishoramari. Ni nabyo turimo kuganiraho na RDB. Twemeranyije ishyirwaho rya gahunda y’ibikorwa yafasha mu gukora ishoramari hano.

Gusa ndifuza guhera ku gushimangira umubano wacu mu bya politiki kuko niwo shingiro ry’ibindi bikorwa byose bishoboka hagati y’ibihugu byombi, wo ni mwiza kugeza ubu kandi twizera ko uzaba umusingi wo kubakiraho ibindi bikorwa.

Ambasaderi Elman Abdullayev yavuze ko Azerbaijan yiteguye kugirana ubufatanye n’u Rwanda mu ngeri zitandukanye

IGIHE : Hari ibyaba bimaze gukorwa mu gihe gito umubano umaze?

Amb. Abdullayev : Umubano wa Azerbaijan n’u Rwanda navuga ko watangiye mu 2017, ni umubano ukiri muto, ni njye ambasaderi wa Mbere wa Azerbaijan mu Rwanda, ariko icyanshimishije ni uko ibihugu byombi bisa n’ibihuje mu buryo twumva ibintu by’ingenzi.

Hamaze kubaho ingendo hagati y’abayobozi b’ibihugu byombi, navuga uruzinduko rwa Madamu Jeannette Kagame muri Azerbaijan muri Gicurasi 2017 yitabiriye inama mpuzamahanga, twagize itsinda ry’abakozi mu by’ubumenyi bw’ikirere baje hano mu nama ya Transform Africa mu mwaka ushize, iryo tsinda ryanakiriwe na Perezida w’u Rwanda tuganira ku bufatanye mu ikoranabuhanga, ibikorwa remezo n’ibindi.

Navuga ko tumaze igihe tugerageza gutegura ingendo zitandukanye kandi turi gukorana bya hafi na bagenzi bacu mu Rwanda ngo hategurwe n’izindi ngendo n’ibiganiro ku bayobozi bacu, kuko kugenderanirana hagati y’abayobozi no guhura hagati yabo ni ingenzi mu guteza imbere umubano w’ibihugu byombi.

IGIHE : Kuki mubona u Rwanda nk’umufatanyabikorwa?

Amb. Abdullayev : U Rwanda na Azerbaijan dufite icyerekezo cy’imbere heza no kugeza ibihugu byacu ku rundi rwego kandi umunsi umwe tuzagera ku rwego rw’ibihugu bikize.

Uyu munsi Azerbaijan ibarirwa mu bihugu bifite ubukungu buciriritse, ubu turakataje kandi ubu bufatanye ni ingenzi. Tuzakomeza gukora cyane kandi mu bufatanye n’u Rwanda, ubufatanye bwacu buzagera kure kuko ibishoboka byose birahari, umusingi wo kubakiraho urahari.

IGIHE : Mwavuze ku mubano mu bya politiki uhagaze neza. Twitege ingendo z’abakuru b’ibihugu ku mpande zombi?

Amb. Abdullayev : Yego rwose. Ingendo z’abakuru b’ibihugu ni ikintu gikomeye mu mubano wose umeze neza, turimo kuganira na bagenzi bacu bo mu Rwanda ku gutegura ingendo z’abayobozi mu gihe kiri imbere.

Mu kiganiro na Minisitiri w’Ububanyi n’Amahanga nanamushimiye inshingano muheruka gusoza zo kuyobora Umuryango wa Afurika Yunze Ubumwe. Azerbaijan n’u Rwanda navuga ko bahagaze neza ku rwego mpuzamahanga.

IGIHE : Mwabashije kwitegereza uko u Rwanda rwitwaye ku buyobozi bwa AU?

Amb. Abdullayev : Azerbaijan ni igihugu cyakiriwe nk’indorerezi muri AU, twakurikiranye cyane akazi gakomeye u Rwanda rwakoze ruyoboye umuryango. Navuga ko umusanzu wa Perezida Kagame mu mavugurura muri AU cyangwa izindi nzego nk’ubucuruzi, ubwikorezi n’ibindi, izi nzego u Rwanda rwatanzemo umusanzu kandi ni ingenzi cyane ku hazaza ha Afurika.
IGIHE : Wasuye urwibutso rwa Jenoside rwa Kigali. Ni ibihe bitekerezo wagize ukimara kurusura?

Amb. Abdullayev : Maze gusura urwibutso inshuro ebyiri, buri gihe nuzura agahinda kandi burya u Rwanda na Azerbaijan bihuje amateka ababaje.

Ubwo nasuraga urwibutso i Kigali, nkitegereza aya mateka mabi yaranze igihugu, icyanje mu mutwe ni uburyo abaturage bacu bahuritse, mu gihe natwe twibuka Jenoside yakorewe aba-Hodjali ku wa 26 Gashyantare. Uyu wari umujyi muto, aho abawutuye bibasiwe na Armenia. Mu kwitegereza amateka y’u Rwanda numva neza uburyo abanyarwanda bababaye kuko ubuzima nk’uko twabuciyemo.

Dukwiye guharanira ngo ibi byaha ntibizasubire ukundi. Dushobora gufatanya kugira ngo nk’ibihugu dusangiye akababaro, dusangiye ibihe bikomeye twanyuzemo mu mateka, kuko bisa n’aho ibihe byo Kwibuka ku bihugu byombi bikurikirana.

IGIHE : Ni iki ibihugu byakora kugira ngo abahakana ayo mateka bakumirwe?

Amb. Abdullayev : Dukeneye kumvikanisha ubukana bwabyo ku rwego rw’uturere no ku rwego mpuzamahanga, ku buryo buri wese agira uruhare mu kubikumira. Ikindi ni uko abagize uruhare mu byaha nk’ibyo baba bagomba guhanwa.

Dukwiye gukora ibishoboka kugira ngo umuryango mpuzamahanga wumve neza ibyabaye binemerwe haba mu bijyanye n’amategeko, politiki, ku buryo hakorwa ibishoboka n’ababigizemo uruhare bose bakagezwa imbere y’inkiko.

Ambasaderi Elman Abdullayev yavuze ko mu gihe cya vuba abakuru b’ibihugu byombi bashobora kugenderanirana

IGIHE Hari ibyagiye bigarukwaho ku buryo Afurika ihagarariwe ku rwego mpuzamahanga nko mu kanama ka Loni gashinzwe umutekano. Mutekereza iki kuba yagiramo nayo umwanya uhoraho?

Amb. Abdullayev : Aho Azerbaijan ihagaze harasobanutse iyo bigeze ku mavugurura mu Muryango w’Abibumbye. Duhamya ko imikorere y’uyu muryango ikwiye kuvugururwa.

Azerbaijan yahutajwe na Armenie, akanama ka Loni gatora imyanzuro ine isaba ko Armenie iva ku butaka bwa Azerbaijan, ariko Armenie ntiyigeze yubaha iyo myanzuro.

Uyu munsi tubona igisa n’impu ebyiri ku Isi, rimwe na rimwe imyanzuro itorwa no muri UNSC ishyirwa mu bikorwa mu minota 20, umunsi umwe, mu gihe gito gishoboka, ariko indi igafata imyaka n’ibinyacumi. Nko ku gihugu cyacu, umwanzuro wemejwe mu 1993 nturashyirwa mu bikorwa kugeza n’uyu munsi.

Kuba hari imyanzuro imwe idashyirwa mu bikorwa, ibyo ubwabyo bigaragaza ko hari ibikwiye kuvugururwa. Ibice bikwiye guhagararirwa kimwe n’amajwi y’ibihugu bito akumvikana, hakabaho kuringanira hatitawe ngo ni igihugu kinini cyangwa gito.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza