IGIHE

PL yijeje ab’i Nyamasheke guteza imbere kohereza mu mahanga ikawa n’icyayi bihera

1 20-08-2018 - saa 19:44, Akimana Erneste

Abakandida 80 b’Ishyaka riharanira ukwishyira ukizana kwa buri muntu (PL), bijeje abaturage b’Akarere ka Nyamasheke ko nibabatora bazaharanira iterambere ry’ubuhinzi bw’ibihingwa ngengabukungu, ku buryo kazamenyekana ku rwego mpuzamahanga.

Iri shyaka ririmo kwitegura guhatana mu matora ateganyijwe ku wa 2 nzeri ku banyarwanda bari hanze y’igihugu no ku wa 3 Nzeri 2018 ku bari imbere mu Rwanda.

Akarere ka Nyamasheke ni kamwe mu turere duhingwamo ikawa n’icyayi. Kuri iki cyumweru abakandida ba PL biyamamarije ku kibuga cya Kirambo mu Murenge wa Kanjongo, bavuga ko bazaharanira iterambere ry’ibi bihingwa.

Perezida wa PL, Mukabalisa Donatille, yavuze ko muri Nyamasheke bazateza imbere ubuhinzi cyane cyane bw’ibihingwa ngengabukungu kandi bakigisha abaturage kubyaza umusaruro ubutaka buto.

Yagize ati “Nk’akarere k’ubuhinzi icyo dushaka ni ugushyira imbere no kongera imbaraga mu birebana n’ubuhinzi butanga umusaruro mwinshi urenze uwo twabonaga.”

PL ivuga ko Nyamasheke ari akarere kera ariko usanga abaturage batazi gukoresha ifumbire, guhinga imbuto z’indobanure akenshi bakavanga n’ibihingwa.

Iri shyaka risanzwe rifite abadepite mu nteko ishinga amategeko, ryijeje ko rizakora ubuvugizi hagashakwa abashakashatsi biga neza imbuto ibereye Akarere ka Nyamasheke ndetse hakabaho amahugurwa yo kwigisha abaturage gukoresha neza ubutaka.

Mukabalisa avuga ko bazaharanira ko icyayi n’ikawa bya Nyamasheke byandika izina ku rwego mpuzamahanga, ku buryo hazajya hasohoka ibyanditseho ko byakorewe Nyamasheke bikamamara mu mahanga buri wese akavayo atekereza kubireba.

Umwe mu barwanashyaka ba PL, Nsabimana Prosper bavuga ko biteze impinduka kuri iri shyaka mu buhinzi, binyuze mu kubavuganira bakabona ifumbire.

Ati “Abadepite ba PL tubitezeho ko bazadukorera ubuvugizi ku buryo tuzajya tubona ifumbire ndetse no guhugurwa ku buryo bwo gufata ubutaka neza tububyaza umusaruro.”

PL ryashinzwe tariki ya 14 Nyakanga 1991, kuva ryashingwa ryakomejekugirauruhare mu kubaka igihugu, ryimakaza kandi rikomeza guharanira ko amahame shingiro yaryo ariyo ukwishyira ukizana, ubutabera n’amajyambere akomeza gushingirwaho.

Perezida wa PL Mukabalisa yijeje ab'i Nyamasheke impinduka mu buhinzi
Abayobozi batandukanye ba PL baje kugeza imigabo n'imigambi ku baturage
Abarwanashyaka ba PL biteze byinshi ku bakandida babo
Urutonde rw'abakandida ba PL bahatanira kuba Abadepite
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
rugero 2018-08-21 23:49:07

Ubundise bisanzwe bitoherezwayo kk ariko RPF yabacukije ko arinkibyo tukazareba power zanyu mashyakamwe.

Kwamamaza