Minisitiri w’Intebe, Anastase Murekezi yasabye ko ubusumbane bugaragara hagati y’abagabo n’abagore muri siporo ku rwego rw’isi bwashyirwaho iherezo nk’uko bigenda bikorwa mu zindi nzego.

Ubwo yafunguraga inama mpuzamahanga iteraniye i Kigali yiga ku iterambere ry’abagore muri siporo, yateguwe na komite olempike ya Afurika ifatanyije n’iya Aziya kuri uyu wa 8 Kanama 2017, Minisitiri w’Intebe yasabye ko abitabiriye iyo nama baba ba ambasaderi kuri za guverinoma zose abagore bakagira imyanya ikomeye muri siporo nk’uko bayigira mu zindi ngeri.

Yagize ati “Turacyabona ubusumbane hagati y’abagore n’abagabo mu rwego rwa siporo n’imikino, imibare ya 2017, yasohowe na Komite mpuzamahanga ya Olempike, igaragaza ko impuzandengo y’abagore mu Nteko rusange y’iyo komite ari 17%, ikagira na 20% muri komite nyobozi. Ibi bigomba guhinduka, kandi impinduka ikava muri mwe mwese hano.”

Yongeyeho ko ibyo bikwiye guhera cyane cyane ku bategetsi bo ku mugabane wa Afurika na Aziya bagahagarika imikorere nk’iyo “ bakamenya ko abagore bashoboye, abagabo n’abagore bagafatwa kimwe, mu nzego zose kandi igihe cyose.”

Ati “Ndasaba mwebwe mwese mwaje hano, gusaba za guverinoma za Afurika na Aziya guteza imbere umugore mu buyobozi bwa siporo.”

Yavuze ko u Rwanda rwiteguye gushyira mu bikorwa ibyifuzo nama bizava muri iri huriro.

Yanasabye abagore kurushaho guteza imbere ubumenyi bwabo mu miyoborere, kugira ngo bazabashe guhangana mu myanya y’ubuyobozi muri siporo, bakaba abafasha urubyiruko rushaka kwinjira mu mirimo ya siporo.

Perezida wa Komite Olempike y’u Burundi akaba n’Umuyobozi muri Komite mpuzamahanga Olempike mu bagore, Lydia Nsekera, yavuze ko icyatumye bateganya iyo nama ari ukugira ngo abagore nabo bibone mu buyobozi bwa siporo kandi n’abagabo babahe umwanya.

Yagize ati “Muri Komite Olempike ku rwego mpuzamahanga twavuze ko kugeza mu 2020 tuzaba twaragejeje 30% by’abagore bazaba bayobora mu nzego zo hejuru z’umupira w’amagaru, ubu dufite 22% gusa ariko dukeneye abagore, murabizi ko mu bintu byose ahatari umugore haba ingorane nyinshi. Murabizi kandi ko ku isi abagore ari benshi, tuje kubwira abagore rero nabo tuti ‘harageze, muri mu nteko zishinga amategeko, muri mu zindi nzego za politiki, muri no mu mashyirahamwe, nimuze no muri siporo.’”

Biteganyijwe ko muri iyo nama mpuzamahanga y’iminsi itatu ku iterambere ry’abagore muri siporo, abayitabira bazarebera hamwe uburyo abagore nabo bajya mu nzego zifata ibyemezo muri uru rwego. Ni inama yateguwe na komite olempike ya Afurika ifatanyije n’iya Aziya, ikazitabirwa n’abayobozi bakuru mu mashyirahamwe yose y’imikino ku rwego rw’isi baturuka mu bihugu 100.

Impamvu y’inama ku iterambere ry’abagore isobanurwa no kuba muri Komite olempike z’ibihugu bigera kuri 54 muri Afurika abagore bayobora izo komite batarenga batanu, naho muri Aziya, muri komite olempike zigera kuri 41, imwe gusa ni yo iyoborwa n’umugore.

Minisitiri w’Intebe yasabye ko ubusumbane bugaragara hagati y’abagabo n’abagore muri siporo bwashyirwaho iherezo
Minisitiri w'Umuco na Siporo, Uwacu Julienne yahaye ikaze abashyitsi
Perezida wa komite olempike y'u Burundi akaba n'umuyobozi muri komite olempike mpuzamahanga mu bagore, Lydia Nsekera
Minisitiri w'Intebe yavuze ko u Rwanda rwiteguye gushyira mu bikorwa ibyifuzo nama bizava muri iri huriro
Bamwe mu bitabiriye iyi nama mpuzamahanga


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved