IGIHE

Mapping Report ni icyuka: Isesengura rya Senateri Mupenzi nyuma yo gusoma igitabo ‘La Traversée’

0 18-11-2021 - saa 15:35, IGIHE

La Traversée ni igitabo kitamenyekanye cyane kubera ibihe cyasohotsemo birimo itangazwa rya Raporo Duclert na Raporo Muse zivuga ku ruhare rw’u Bufaransa mu mateka yagejeje u Rwanda kuri Jenoside yakorewe Abatutsi.

Icyo gitabo cyaje mu gihe cy’inkuru z’urugendo rwa Perezida Emmanuel Macron mu Rwanda, rwazahuye umubano w’ibihugu byombi nyuma y’imyaka myinshi birebana ay’ingwe.

La Traversée ni igitabo cy’umunyamakuru w’Umufaransa Patrick de Saint-Exupéry, ufite ubunararibonye mu gukora inkuru zicukumbuye. Yakoreye ibinyamakuru bikomeye birimo Le Figaro, ari nabyo byatumye ubwo Jenoside yakorerwaga Abatutsi yabaga, agera mu Rwanda akibonera imbonankubone ubugome yakoranywe.

Patrick de Saint-Exupéry ni we munyamakuru watumye François Mitterrand wayoboraga u Bufaransa mu 1994, yinyuramo agashyira ukuri kwe hanze, k’uburyo atemera Jenoside yakorewe Abatutsi.

Yabivuze mu Ugushyingo 1994 hashize amezi ane Jenoside ihagaritswe, mu nama ya 18 yahuje u Bufaransa n’ibihugu bya Afurika bikoresha Igifaransa yabereye muri Biarritz.

Patrick de Saint-Exupéry yabajije Mitterrand icyo avuga kuri Jenoside yabaye mu Rwanda, undi amusubiza agira ati “Muravuga iyihe Jenoside, muravuga iriya Abahutu bakoreye Abatutsi cyangwa iyo Abatutsi bakoreye Abahutu?”

Ubuhakanyi bwa Mitterrand bwabaye nk’umuriro mu gihuru, uba umutaka ukomeye utwikira abanzi b’ubuyobozi u Rwanda n’abandi bafite ipfunwe ry’uruhare rwabo muri Jenoside yakorewe Abatutsi.

Amagambo ya Mitterrand ni nayo atangira igitabo cya Patrick de Saint-Exupéry, aho avuga ko ikinyoma cya Jenoside yakorewe Abahutu, cyatangiriye mu biro bya Mitterrand.

Senateri Mupenzi George ni umwe mu basomye igitabo La Traversée, kugira ngo amenye ukuri kw’ikinyoma kimaze imyaka isaga 27 cyanabaye inkomoko ya raporo ya Loni yo mu 2010 itaragiye hanze, yiswe ‘Mapping Report’

Ni raporo iri mu mujyo w’amagambo ya Mitterrand w’uko Ingabo za FPR Inkotanyi hari Abahutu n’Abanye-Congo basaga miliyoni eshatu ziciye muri Congo, bagasaba ko nabyo byitwa Jenoside.

Inkuru bijyanye: Nta Jenoside yakorewe Abahutu, Itwikwa ry’umurambo wa Habyarimana, Opération Turquoise - Ikiganiro na Saint-Exupéry

Mu rugendo rugoye Patrick de Saint-Exupéry yakoze ahereye mu Rwanda, agakomereza mu mashyamba ya Congo aho impunzi z’Abanyarwanda ziganjemo abari bamaze gukora Jenoside zanyuze zihunga, kugeza za Kisangani na Kinshasa, rwasojwe abuze ibimenyetso bya Jenoside yakorewe Abahutu.

Inzira impunzi z'Abanyarwanda zanyuzemo zijya muri Congo, ari nayo umwanditsi Patrick de Saint-Exupéry ashaka kumenya ukuri kuri Jenoside yakorewe Abahutu ivugwa

Mupenzi mu kiganiro ‘Impamba y’Ubumenyi’ cyatambutse kuri Televiziyo Rwanda ku wa Kabiri, yavuze ko ukuri kw’igitabo La Traversée, kugaragarira mu buhamya burimo bw’Abanyarwanda bahoze ari impunzi muri Congo.

Bwunganirwa n’ubw’Abanye-Congo baganiriye bari bahari ubwo impunzi z’Abanyarwanda zageraga muri icyo gihugu kugeza zihavuye.

Ati “Abo yaganiriye nabo ni abantu bajijutse, ni abapadiri, abashakashatsi n’abandi bose bavuga rikumvikana. Ni abantu bo kwizerwa, aho umuntu akubwira ati ‘igihe iki n’iki byari bimeze gutya’. Ahapfiriye abantu, abishwe n’inzara n’inyota byose barabivuga.”

Muri icyo gitabo, abatangabuhamya ntibahakana ko hari impunzi zaguye muri Congo gusa berekana ko hari abishwe n’indwara n’umunaniro mu mashyamba ya Congo, abishwe n’Interahamwe n’abasirikare ba Ex Far iyo babaga hari ibyo batumvikanyeho.

Hari n’abaguye mu mirwano kuko bari bari kumwe n’ingabo zifite intwaro, zasakirana n’izindi hagapfa abantu. Hari kandi abandi bagiye bagera mu duce runaka twa Congo, bakahaguma bagatura.

Senateri Mupenzi avuga ko hari n’aho impunzi zageze aho zikicana hagati yazo. Ati “Abari impunzi [muri ayo mashyamba] bavuga ko hari aho bageze bakabona indi sura ya Jenoside. Ntabwo icyo gihe batekerezaga ko bakiri bamwe, batangiye kwibonamo Abanye-Nduga, bibonamo ababeshyi, babonamo abafite amazuru maremare, abananutse n’ibindi.”

“Abasirikare bari bafite za grenade ku buryo iyo bageraga ahantu bakabona hari abashaka gusubira mu Rwanda, baraziteraga kugira ngo babatere ubwoba.”

Senateri Mupenzi yemeza ko igitabo ''La Traversée' ari impano ikomeye yahawe Abanyarwanda

Mu gihe inkuru zakwirakwijwe zivuga ko hari Abahutu biciwe mu mashyamba ya Congo, Senateri Mupenzi avuga ko bitumvikana ukurikije ubuhamya bw’abaganiriye na Patrick de Saint-Exupéry, bacyuwe n’Ingabo za FPR Inkotanyi.

Yagarutse ku buhamya bwa Marie Rose Inkotanyi zasanze mu mashyamba, zikamutabarira umugabo wari urembye ndetse zikamusaba kuzana n’izindi mpunzi zigacyurwa mu ndege zikagezwa mu Rwanda. Muri icyo gihe hacyuwe impunzi zisaga miliyoni ebyiri.

Senateri Mupenzi yavuze ko ukuri kwa La Traversée kwamukoze ku mutima, akiyemeza kukumenyekanisha kuko icyo gitabo ari umutungo ukomeye ku Banyarwanda.

Ati “Icyanshituye ni ukuntu umuntu w’umunyamahanga afite umuhate wo kubeshyuza ikinyoma, akemera akaza akagenda n’amaguru, akagenda kuri moto, mu ishyamba imibu ikamurya, inzara ikenda kumwica ariko kugira ngo amenye ukuri kw’ibyabaye muri ririya shyamba.”

“Urumva kugira ngo ukureho icyo gihu, umenye ibyebereye i Goma, Walikale, Kisangani, ku muntu utari Umunyarwanda, akemera agakurikira ya nzira kugira ngo amenye ukuri kw’ibyo bamubeshyaga, ni ibintu bikomeye.”

Senateri Mupenzi avuga ko iki gitabo ari nk’impano u Rwanda rwahawe akurikije akayabo Loni yatanze kugira ngo hakorwe Mapping Report igoreka amateka.

Ati “Ubaze amafaranga Loni yatanze kugira ngo bakore Mapping Report, ashobora kuba ari miliyoni ebyiri z’amadolari. Rero umwanditsi iki gitabo yakiduhaye nk’impano, reka tuzagisome tugikundishe abantu. Iki ni icyo wakwita amashirakinyoma.”

Mu mboni ze, Senateri Mupenzi yavuze ko ibimenyetso simusiga bishingiye ku icukumbura n’ubuhamya bw’ababaye muri ayo mateka, bigaragaza ko “Mapping report ari icyuka” cyakwirakwijwe n’abambari ba Mitterrand barimo Hubert Védrine wahoze ari Umunyamabanga mukuru we, abanditsi nka Pierre Péan wabaye inzobere ku Rwanda atararukandagiyemo n’abandi bashingira ku mpamvu za politiki n’urwango bafitiye u Rwanda.

La Traversée kandi igaruka ku murage mubi w’ubwicanyi impunzi z’Abanyarwanda zasize aho zagiye ziba muri Congo.

Igitabo gikurikirana intambwe ku yindi aho impunzi z’Abanyarwanda zanyuze ubwo zahungaga mu 1994, aho zagiye ziba, imva z’abagiye bapfa zigihari n’icyo bagiye bazira n’ibindi.

Inkuru bijyanye: Nta Védrine nta Bagosora: Patrick de Saint Exupéry yashwishurije abavuga ko mu Rwanda habaye Jenoside ebyiri

Patrick de Saint-Exupéry ni umunyamakuru wiboneye n'amaso ye ubugome Jenoside yakorewe Abatutsi yakoranywe
Igitabo ‘La Traversée’ gishingiye ku buhamya bw'Abanyarwanda babaye impunzi muri Congo bagaruka ku buzima babayemo muri icyo gihugu
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza