IGIHE

Inzego za gisirikare ‘CMI na ISO’ zasabwe kugaragaza abanyarwanda zashimutiye muri Uganda

5 24-04-2019 - saa 13:31, IGIHE

Abanyamategeko ba bamwe mu banyarwanda bashimuswe bagafungirwa ahantu badashobora kugira uwo bavugana na we n’inzego z’umutekano muri Uganda, kuri uyu wa Mbere basohoye itangazo rigenewe abanyamakuru basaba ko bagaragazwa.

Gawaya Tegulle na Michael Aboneka, bahuriye muri Thomas and Michael Advocates, bahagarariye imiryango y’abanyarwanda bashimuswe, bagaragaje ko hari abanyarwanda batanu bashimuswe n’Urwego rw’Ubutasi mu gisirikare cya Uganda, CMI n’ Urwego rushinzwe umutekano imbere mu gihugu (ISO), basaba ko bagaragazwa aho bari.

Abanyarwanda benshi mu myaka ishize bakunze gushinja urwego rw’ubutasi kubakorera iyicarubozo, aho usanga Abanyarwanda barimo abagore bafite abana bato bakurwa mu modoka bakajya gufungwa bashinjwa kuba intasi.

Itangazo rigenewe abanyamakuru ry’abo bunganizi mu mategeko, rivugamo Rugorotsi Eric, washimuswe kuwa 25 Ukwakira 2018 na Twahirwa David washimuswe kuwa 15 Ukuboza. Aba bombi ngo bajyanywe na ISO.

Rugorotsi wari umucuruzi yafatiwe i Kampala yagiye kugura ibyuma by’ibinyabiziga kimwe na Twahirwa wari wagiye muri gahunda ze.

Undi Munyarwanda witwa Ntakirutimana Theoneste, wayoboraga Itorero ADEPR muri Uganda yafashwe kuwa 28 Werurwe na Asiimwe Apollinaire wafashwe kuwa 7 Mata. Bombi byagaragaye ko bashimuswe na CMI.

Nyuma yo gufatwa, nta mpapuro zibata muri yombi cyangwa indi nzira y’amategeko ikurikijwe, ibinyamakuru bimenyerewe mu gukwirakwiza icengezamatwara muri Uganda, byatangiye kwandika inkuru ko ‘bakorera u Rwanda’.

Itangazo ry’aba banyamategeko rinagaruka kuri Gasana Deus, wavunjaga amafaranga wafashwe ku wa 3 Mata 2019 na ISO.

Aba banyarwanda bose bashimuswe bashyizwe ahantu hatazwi aho badashobora kugerwaho n’imiryango yabo cyangwa abanyamategeko babo.

Nk’uko abanyarwanda bagiye bahonoka gereza zo muri Uganda babivuga, Guverinoma ya Museveni ikomeje ubushotoranyi ku Rwanda ibinyujije no mu gufunga abanyarwanda b’abasivili.

Bimaze kugaragara ko abakorera CMI bakorana bya hafi n’umutwe w’iterabwoba wa RNC, urwanya u Rwanda mu gushaka abarwanyi b’uyu mutwe mu nkambi cyangwa imijyi irimo abanyarwanda, kandi byose bakabikora ku mabwiriza n’uruhushya rw’abayobozi bo hejuru mu butegetsi bwa Uganda.

Uku gushaka abarwanyi kandi binakorwa mu bundi buryo aho CMI ishimuta abanyarwanda ibashinja kuba intasi z’u Rwanda, ikabakorera iyicarubozo ndetse ikabafungira mu nzu zitazwi, kugeza bemeye kujya muri RNC.

Abakorewe ubwo bunyamaswa ariko bakinangira kujya muri RNC bagakomeza gufungwa igihe runaka. Hari bamwe barekurwa bakajugunywa ku muhanda cyangwa ku mupaka runaka ndetse bamwe bakerekana ibimenyetso ku mubiri by’iyicarubozo bakorewe.

Guverinoma y’u Rwanda ibarura abanyarwanda babarirwa mu 1000 bafungiye muri gereza zitandukanye cyangwa ahandi hantu ariko batemerewe kugira uwo bavugana cyangwa ubabona.

Iri tangazo rinenga uburyo gushimuta abanyarwanda byagizwe akamenyero. Ibi bikaba bihamya ibyo u Rwanda rudahwema kunenga aho binyuze mu nyandiko ya Ambasade yarwo i Kampala, rwamaganye ibyo gufata abanyarwanda binyuranye n’amategeko, kubafunga bitemewe ndetse no gukorera iyicarubozo abasivili.

Ibi byatumye u Rwanda rufata icyemezo mu kwezi gushize cyo kugira inama abaturage barwo yo kutajya muri Uganda.

Abanyamategeko Tegulle na Aboneka berekanye uko CMI na ISO basuzugura amabwiriza y’urukiko. Izi nzego zimaze gusuzugura inyandiko eshatu zizisaba kugaragaza no kujyana mu nkiko abakekwaho ibyaha zafashe ndetse zikanga no kubarekura, hakibazwa niba amategeko muri Uganda agikurikizwa.

Aba banyamategeko kandi basaba abaturage guhaguruka bakavuganira inzirakarengane z’ubutabera bucagase. Banahishuye kandi ko gutabwa muri yombi kuri bamwe gushobora kuba kwihishwe inyuma n’abantu runaka bahiga abanyarwanda.

Basabye inzego z’umutekano n’ubushinjacyaha guha abakiliya babo umunsi wo kuburana niba hari ibimenyetso bafite. Bavuga ko gukomeza gufunga abakiliya babo ari uguhonyora amategeko mpuzamahanga n’aya Uganda.

Bati “Dushingiye ku biheruka kuba, hari ubwo abatawe muri yombi barekurwa barakorewe iyicarubozo rikaze, ku buryo biba bigoye no kongera kubamenya”.

“Turahamagarira abagiraneza bose muri Uganda ndetse no mu miryango mpuzamahanga kwamagana ibi byaha byibasiye inyokomuntu”.

Abanyarwanda benshi bamaze gushimutirwa mu Mujyi wa Kampala bazira amaherere
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kigingi 2019-05-20 12:54:26

Niba barafunzwe iminsi itagerengeje iyo amategeko yemera nta kibazo kirimo kuko baba bari gukorwaho iperereza.

2
Bizahinduka 2019-05-15 20:02:08

Yewe ga aha

3
Dieudonne Hakizayezu 2019-05-09 07:41:11

Abanyarwanda bafungiye muri Uganda ngo baregwa gukorera ibikorwa by’ubutasi ku butaka bwa Uganda.

Ese kuva batangira gufatwa no kwirukanwa muri Uganda umutekano waho wariyongereye koko? Nta bategetsi bakiraswa na bodaboda hato na hato?

Niba umutekano waragarutse
kuva wafatwa nibakarabee zibarye nyine, m’ubutasi niko bigenda, iyo ufashwe bagukanira urugukwiye.

Niba kandi umutekano utaragarutse nibaturekurire abana batahe kuko ubwo sibo batezaga umutekano muke.

4
Kagano 2019-04-24 10:06:39

Nta nzego zubutasi zidashimuta nonese Mutabazi yigejeje i Kigali? Dushobora kuba aritwe twaberetse uko bashimuta abantu. Bya bindi by’uwiba ahetse.

5
yago 2019-04-24 07:06:13

arkomushakaikimugihucyabandi

Kwamamaza