IGIHE

Ingabo z’Abafaransa zavuze imyato Opération Turquoise yakingiye ikibaba abajenosideri

12 16-06-2019 - saa 11:18, IGIHE

Mu gihe u Bufaransa n’u Rwanda biri mu bikorwa byo kuzahura umubano umaze imyaka urimo agatotsi, Ingabo z’Abafaransa zari muri Opération Turquoise mu 1994, zashimwe mu gihe iki gikorwa zajemo kinengwa ko cyakingiye ikibaba abari bamaze gukora Jenoside.

Ku wa 22 Kamena mu 1994, Loni ibisabwe n’u Bufaransa yafashe umwanzuro No 929 ubwemerera kohereza ingabo zabwo mu Rwanda mu cyiswe “Opération Turquoise”, yafatwaga nk’igamije ibikorwa by’ubutabazi ku bari mu kaga.

Izi ngabo zagiye muri “Zone Turquoise” yari igice kigizwe n’ahahoze Perefegitura za Cyangugu, Gikongoro na Kibuye ari naho hiciwe Abatutsi benshi nyuma yo gutabwa n’ingabo z’Abafaransa mu maboko y’Interahamwe.

Abafaransa baje mu Rwanda bitwaje intwaro za karahabutaka bisa naho biteguye kurwana inkundura. Bari bitwaje indege z’intambara zirenga 30 abasirikare 2500, kandi byari bizwi ko icyo gihugu cyari gifitanye umubano mwiza na leta yari iriho yaba iy’abatazi n’iyari yarayibanjirije zarimo zica Abatutsi uruhondogo.

Ku wa 14 Kamena 2019, i Paris habereye umuhango wakoze mu buryo bwa rwihishwa wo gushimira abasirikare bari muri iki gikorwa mu Rwanda.

Mu kiganiro cyahejwemo itangazamakuru, Minisitiri w’Ingabo w’u Bufaransa, Florence Parly, yavuze ijambo ashima abahoze muri Opération Turquoise.

Jeune Afrique yatangaje ko inyandiko yashyizeho umukono kuri uwo munsi igaragaza amakuru yatanze. Igira iti “Ku wa 7 Mata, Perezida wa Repubulika yatangaje ko iyo tariki izaba umunsi wo kwibuka Jenoside yakorewe Abatutsi mu Bufaransa. Hari n’ubushake bwo guha ijambo abagabo n’abagore bari aho icyo kibi cyabereye.’’

Yananditse ko hakwiye gushimwa no guha icyubahiro abanyuze muri Opération Turquoise.

Ni ubutumwa bwakiriwe neza n’abarimo abari ku rutonde rw’abasirikare 22, amateka agaragaza uruhare rwabo muri Jenoside yakorewe Abatutsi, haba mu kuyitegura, kuyikora cyangwa mu kugambana ariko babyihunza.

Muri bo ni Général Erik de Stabenrath, wayoboye Opération Turquoise ku Gikongoro kuva tariki ya 16 Nyakanga kugeza 22 Kanama 1994.

Yagize ati “Nishimiye cyane kuko bwa mbere numvise umunyapolitiki ashyigikira Opération Turquoise.’’

Bamwe mu basirikare bari muri Opération Turquoise bemeye kuvugisha ukuri, bagaragaza ko icyari cyabazanye mu Rwanda atari ibikorwa by’ubutabazi ndetse ko nta n’icyo bakoze ngo abatutsi badakomeza kwicwa.

Rtd. Lieutenant Colonel Guillaume Ancel na we wari mu Rwanda mu gihe cya Jenoside yakorewe Abatutsi mu 1994, yakunze guhamya ko intego nyamukuru ya ‘Opération Turquoise’, atari ukurokora ubuzima bw’inzirakarengane zicwaga ahubwo yari ugushyigikira Guverinoma yakoze Jenoside.

Ancel yanagaragaje ko ingabo z’u Bufaransa zahaye intwaro Leta yakoze Jenoside, ikaza no kuzihungana mu nkambi zo muri Zaïre, aho yisuganyirizaga ishaka kugaruka gutera igihugu cyari cyafashwe na FPR Inkotanyi.

Ubuhamya bw’abarokokeye mu Bisesero aho Ingabo z’Abafaransa zari bugaragaza ko Abafaransa bari bafite umugambi wo gufasha Guverinoma yakoze Jenoside gutsemba Abatutsi no kuyiharurira inzira ngo ibashe guhunga ingabo za FPR-Inkotanyi zahagarikaga Jenoside.

Bavuga ko batakambiye Ingabo z’u Bufaransa ngo zibakure mu maboko y’Interahamwe n’abasirikare bari bamaze kubicamo abarenga ibihumbi 40, ziterera agati mu ryinyo kugeza ubwo abandi barenga 4000 bishwe mu minsi itatu gusa.

Ishimwe ryaturiwe ku ngabo zahoze muri ‘Opération Turquoise’ ryanakiriwe neza n’Umugaba Mukuru w’Ingabo, Général François Gérard Marie Lecointre.

Uyu yari capitaine mu ngabo zirwanira mu mazi, akaba mu gihe cya Jenoside yari ashinzwe Segiteri ya Gisovu, imwe mu zari zigize iyahoze ari Perefegitura ya Kibuye.

Yagize ati “Ni ubwa mbere umuyobozi mu gisirikare turi ku rwego rumwe, afashe ijambo mu kiganiro nk’iki.’’

Abasirikare bakuru bayoboye Turquoise i Cyangugu, Kibuye na Gikongoro bashinjwa ibyaha bikomeye byakozwe muri icyo gihe. Nka Jean-Claude Lafourcade yari Umuyobozi w’Ikirenga w’Ingabo z’Abafaransa zari muri Turquoise kuva tariki 22 Kamena kugeza 22 Kanama 1994.

Inyandiko ya CNLG ku ruhare rw’Abasirikare b’u Bufaransa muri Jenoside yakorewe Abatutsi, igaragaza ko muri Turquoise, iyo hataba ubufatanye bw’abasirikare b’Abafaransa bari bayobowe na Gen. Lafourcade, ibyaha byakorewe ahahoze ari Cyangugu, Kibuye no ku Gikongoro bitari kuba.

Ivuga ko ibyo byaha byashyigikiwe mu buryo bw’ibikoresho nk’intwaro, imodoka zitwara abantu n’ibintu ndetse n’amavuta (carburant) yazo byose bitangwa n’abasirikare b’Abafaransa. Nyamara, inshingano Loni yari yahaye Turquoise yashimangiraga ko “ari ubufasha buhabwa abantu kandi nta kurobanura”.

Nko mu nkambi ya Murambi, abasirikare b’Abafaransa bayicungaga, babazaga ubwoko buri wese uyinjiyemo.

Imbere mu nkambi, CNLG yavuze ko bashyiraga hamwe abarokotse jenoside, abasirikare ba FAR ndetse n’Interahamwe zari zimaze gukora jenoside.

Ibi byahaye Interahamwe umwanya wo gukomeza ubwicanyi nyamara byaravugwaga ko ari ahantu hagenewe kugoboka abantu. Abanyamakuru b’abanyamahanga bahigereye kuva muri Nyakanga kugeza muri Kanama 1994 bavuze ukuntu abarokotse bageramiwe n’ubwicanyi bwakorwaga n’Interahamwe. Ubwicanyi, gusambanya ku ngufu byakorerwaga aho Lieutenant-Colonel Eric De Stabenrath wayoboraga aka gace yari atuye.

Abasirikare b'Abafaransa bagize uruhare mu gutoza interahamwe zakarabye inkaba
Usibye gutoza Interahamwe, Abasirikare b'Abafaransa bagize n'uruhare kuri za bariyeri mu bikorwa byo gufata abitwaga ibyitso
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Cacou 2019-06-19 05:23:54

@Mico !! Hari ibyo umuntu avuga yitonze umuntu akanareba Niba ari igihe kiza cyo kuvuga ibintu nkibyo cyane iyo ari ibintu biteye isoni. Ndikubitekerezaho mbona ariyo maherezo. Thanks for advice

2
Mico 2019-06-17 11:04:41

Cacou niba warahohotewe nkuko ubivuga ukaba ufite nubwenge nubushobozi bwo kuza kubivuga hano mu kinyamakuru andikira CNLG igutere inkunga ujyane ikirego cyawe mu nkiko zabafaransa uzarenganurwa cyangwa wandikire Ibuka Ziri hirya no hino i burayi.

3
Mico 2019-06-17 11:04:41

Cacou niba warahohotewe nkuko ubivuga ukaba ufite nubwenge nubushobozi bwo kuza kubivuga hano mu kinyamakuru andikira CNLG igutere inkunga ujyane ikirego cyawe mu nkiko zabafaransa uzarenganurwa cyangwa wandikire Ibuka Ziri hirya no hino i burayi.

4
Egoko 2019-06-16 21:41:37

Umuntu ubwenge ajye yitondera ibinyamakuru

5
musoni 2019-06-16 07:35:58

Ngewe narokokeye mu nkambi ya Nyarushishi. Nge nabagenzi bange hari ubuhamya twatanga ku bafaransa.

6
dot 2019-06-16 07:25:31

Igihe.com, muri rusange nkunda inkuru mwandika. Ariko nk’abanyamakuru ntekereza ko muri bo mukwiye kumenya ko ifoto yifashishijwe mu nkuru umuntu ashobora kuyivugisha icyo ashatse, ndavuga sous-titre...

7
Rutakamize 2019-06-16 07:15:00

Mujye mushyiraho izina ry’umwanditsi w’inkuru bityo umuntu ashobora kumubaza ibiazo bimwe na bimwe. Kimwe na wa wundi wanditse inkuru ngo Ingabire ari gukoresha inama ashaka umutwe wabahutu yonjiza mu ntambara. Ikinyamakuru nk’iki bidutera impungenge.

8
umwari vestine 2019-06-16 06:52:28

Andika hanoabafaransa barahemutse

9
veve 2019-06-16 06:49:59

Muraho abafaransa nabagome

10
Cacou 2019-06-16 06:47:48

Jye sinagira icyo mvuga banankoreye ibyamfurambi. Kuburyo njya nshaka kwitabaza ubutabera kuko narahohotewe ubu nabuze aho nahera ngo mpabwe indishyi !! Kandi ngo bari baje kuturinda interahamwe da !! Hari igihe nazatinyuka ngatobora nkavuga kuko ndambiwe gukomeza kubika ibanga ribi !!!

Paji: 1 | 2  

Kwamamaza