Umusirikare wari muri ‘Opération Turquoise’ yahamije ko u Bufaransa bwashyigikiye nkana abakoze Jenoside

8 24-03-2018 - saa 18:01, IGIHE

Rtd Lieutenant Colonel Guillaume Ancel, wari mu Rwanda mu gihe cya Jenoside yakorewe Abatutsi muri Mata 1994, yahamije ko intego nyamukuru ya ‘Operation Turquoise’, atari ukurokora ubuzima bw’inzirakarengane zicwaga ahubwo yari ugushyigikira Guverinoma yakoze Jenoside.

Hashize imyaka ine Ancel avuze ko ingabo z’u Bufaransa zari muri ‘Opération Turquoise’ mu Rwanda zahaye intwaro Leta yakoze Jenoside, ikaza no kuzihungana mu nkambi zo muri Zaïre, aho yisuganyirizaga ishaka kugaruka gutera igihugu.

Mu kiganiro yagiranye na IGIHE, Ancel, yatangaje ko habayeho ukutumvikana hagati y’ingabo zari muri Operation Turquoise kuko hari impande ebyiri; urwo gutabara abicwaga n’urwo gukingira ikibaba abakoze Jenoside. Gusa ngo ukuri kw’ibyabaga ni uko kwari ugutegura urugamba rwo kurwanya ingabo za FPR no kugumisha ku butegetsi abari baburiho.

Yakomeje avuga ko yaguye mu rujijo kuko babwirwaga ko bagiye kubungabunga uburenganzira bw’ikiremwamuntu, ariko nyuma akaza gusoma zimwe mu nyandiko zagizwe ibanga zamuhamirije ko u Bufaransa bwari buzi neza ko abo bushyigikiye ari abakoze Jenosideri.

Yagize ati “Byaje kumbabaza ubwo nasomaga inyandiko zerekanaga ko mu ntangiriro za Gicurasi 1994, urwego rw’ubutasi rw’u Bufaransa rwari ruzi ko Guverinoma bashyigikiye ari yo yakoraga Jenoside.”

Ancel avuga ko kuva Opération Turquoise yatangira bakomeje kugendera ku kinyoma gikomeye cyihishe inyuma ya politiki, akifuza ko u Bufaransa bugaragaza inyandiko z’ibanga z’umubano wabwo na Guverinoma yakoze Jenoside ndetse no bukemera uruhare rwose bwayigizemo.

Mu gitabo Ancel aherutse gusohora yise ‘‘Rwanda, la Fin du Silence’’ yavuze muri Nyakanga, mu nkambi y’impunzi muri Zaïre, yabonye u Bufaransa buha intwaro ingabo za Leta kandi bwari buzi ko bakoze Jenoside ndetse hakabaho gukimbirana mu gihe havugwaga ku kwambura intwaro ingabo zakoze Jenoside.

Kuyobya uburari kwa Alain Juppé

Bamwe mu bategetsi b’u Bufaransa, barimo uwari Minisitiri w’Ububanyi n’Amahanga wabwo mu gihe cya Jenoside, Alain Juppé, bumvikana cyane bahakana, bakanapfobya Jenoside ndetse bagashimangira ko Operation Turquoise yakoze ibyo yagombaga gukora.

Ancel avuga ko aya magambo ya Alain Juppé, ari ibinyoma no gushaka kuyobya uburari ku bushake ngo bikureho igisebo cy’icyasha cya Jenoside bafite.

Avuga kandi ko impamvu Abafaransa batambuye intwaro abajenosideri ndetse bakashakira inzira ibajyana muri Repubulika Iharanira Demokarasi ya Congo, ari uko bari bafatanyije mu mugambi wo kurwanya ingabo zari iza FPR.

‘Opération Turquoise’ ni ubutumwa ingabo 2500 z’u Bufaransa zoherejwemo mu Rwanda nyuma y’umwanzuro w’Akanama ka Loni gashinzwe umutekano, wo ku wa 22 Kamena 1994. Intego yari ‘uguhagarika ubwicanyi’. Izi ngabo zakoreraga hafi n’umupaka w’u Rwanda na Zaïre mu duce twa Cyangugu, Kibuye na Gikongoro.

Rtd Lieutenant Colonel Guillaume Ancel asuhuzanya n’umunyamakuru wa IGIHE mu Bubiligi, Karirima Aimable Ngarambe
Rtd Lieutenant Colonel Guillaume Ancel mu kiganiro n’umunyamakuru wa IGIHE mu Bubiligi, Karirima Aimable Ngarambe
Kwamamaza
Kwamamaza

Izindi nkuru wasoma

278 26 16-10-2018
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Rigawezi Leonard 2018-05-26 08:25:11

uyu mugabo rwose nakomereze aho kuko ntamuntu ukina Yandika nibyiza kuri njyewe courage.

2
kansime-enidi 2018-05-11 08:48:42

Andika hano—mbase-jonosade-yatangena—efuperi

3
YEAH 2018-03-25 21:01:31

ARIKO IKI MUTWEREKA NTIKIRI MUBATWICIYE KO NDAYE WO MURI SENEGAL YITANZE AGAPFANA NABACU UYUWE YAKOZE IKI? ISESEME GUSA.

4
KA 2018-03-25 20:56:23

IGIHE KUKI MUNIGA IBITEKEREZO BYACU NIBWO BUNYAMWUGA MWAVUMBUYE?

5
uwizeye 2018-03-24 22:50:27

ko numva avuga nk’aho we atari ahari kandi ntatujijishe ipeta rye ni rinini umusirikari mukuru navuge ibyo yakoze ikindi niba yiyizeye nasabe ko haba urubanza azabe umushinja niba bitabaye ibyo nareke kudutesha umutwe

6
David 2018-03-24 22:25:54

mwaramutse else birashoboka ko yaza murwanda agatanga ubuhamya kobyo yabonesheje amaso yeah?

7
kiki 2018-03-24 15:11:23

mwitonde uyu muzungu bishobora kuba bitangiye kwivanga mu mutwe!!

8
Habineza 2018-03-24 13:43:36

Erega ngwino mu Rwanda utubwire birambuye ukuntu wagiye utanga amabwiriza cg wahagalikiye ugufatwa kw’abagore ku ngufu.No kwandika igitabo si bibi kuko wanditse n’ikindi ukubutse mu butumwa bw’amahoro mucyahoze cyitwa Yougoslavie.Ubuhamya bw’uyu mugabo burakenewe imbonankubone.

Kwamamaza