IGIHE

Uganda ihera he ihakana ko ikorana n’abashaka guhungabanya umutekano w’u Rwanda?

10 19-05-2019 - saa 11:56, Bukuru JC

Kuri uyu wa Gatanu Minisitiri w’Ububanyi n’Amahanga wa Uganda, Sam Kutesa, yongeye gutungura benshi atangaza ko igihugu cye nta we gicumbikiye cyangwa gikorana na we ushaka guhungabanya umutekano w’u Rwanda.

Yabivuze imbonankubone imbere y’abadipolomate b’abanyamahanga baba muri icyo gihugu, nyuma abisubiramo imbere ya kamera z’abanyamakuru baba ab’imbere mu gihugu na mpuzamahanga.

Uwo mugabo yavuze ko nta kibazo igihugu cye gifitanye n’u Rwanda, ko ikibazo ari u Rwanda rwafunze imipaka, rukabuza abaturage kwambuka.

Imvugo ya Kutesa yarakaje bamwe mu banyarwanda bakoresha imbuga nkoranyambaga zirimo na Twitter, maze bazifashisha bamugaragariza ibimenyetso simusiga byemeza ko igihugu cye kiri mu bikorwa bigamije guhungabanya umutekano w’u Rwanda.

Hashize imyaka isaga ibiri abanyarwanda bafatwa bagafungirwa mu bigo bya Gisirikare muri Uganda, bagatotezwa abagize amahirwe bakarekurwa ari intere bakajugunywa mu Rwanda.

Nta cyumweru gishira batajugunywe ku mupaka, ubuhamya bwabo bwagaragaye kenshi mu binyamakuru bitandukanye bivugira iyicarubozo bakorewe ubwo babaga bari mu buroko.

Kuba Kutesa yemeza ko igihugu cye nta we gikorana na we ushaka guhungabanya umutekano w’u Rwanda benshi babigaragaje nk’ikinyoma gikomeye no kwirengagiza ukuri no gukina ku mubyimba amagana y’abanyarwanda bafungiye ubusa muri icyo gihugu, bazizwa gusa ko banze kwifatanya n’umutwe w’iterabwoba wa Kayumba Nyamwasa, RNC, ufite intego zo guhungabanya umutekano mu Rwanda.

Perezida Yoweri Museveni ni we wiyemereye ko aherutse guhura na Charlotte Mukankusi umwe mu bashinzwe dipolomasi muri RNC ndetse nyuma byamenyekanye ko uwo mugore yahawe Pasiporo ya Uganda azajya yifashisha mu bikorwa byo gushakisha inkunga no kwamamaza RNC hirya no hino ku isi.

Abakoresha Twitter bibukije Minisitiri Kutesa ko Perezida Museveni adasiba guhura n’abayobora RNC ndetse by’ikimenyimenyi aherutse guhurira i Kampala na Kayumba Nyamwasa umuyobozi wa RNC, umutwe w’iterabwoba ubarizwa mu misozi ya Minembwe muri RDC no muri Uganda.

Ubwo yari muri Uganda, Kayumba yagaragaye i Kampala muri hotel ihenze ari kumwe n’abakomando bakomeye b’umutwe udasanzwe mu gisirikare cya Uganda uzwi nka SFC.

Mukankusi, Eugène Gasana, Tabaro,Ben Rutabana, Frank Ntwali n’abandi bayobozi muri RNC bahora i Kampala mu bikorwa byo gushakisha inkunga.

Uganda yahaye ubutaka bwisanzuye inyeshyamba za RNC bwo gukoreraho ibikorwa byabo. Ubwo butaka bukoreshwa nk’ibirindio byo kwinjirizamo abarwanyi bashya ndetse bugakoreshwa nk’ikibuga cy’imyitozo ya gisirikare.

Uganda yashinze ibinyamakuru bisaga 30 byo kuri internet bigamije gukwirakwiza icengezamatwara rigaragaza nabi isura y’u Rwanda. Ibyo binyamakuru byibasira ubudasiba Perezida Kagame na Guverinoma ye.

Ibyo bijyana no guha umwanya w’imbere abayobozi ba RNC mu binyamakuru bya Leta ya Uganda nka New Vision, maze bagaharabika abayobozi b’u Rwanda bigatinda.

Igihamya gikomeye ko Uganda ikorana n’abashaka guhungabanya umutekano w’u Rwanda cyagaragajwe na Raporo y’impuguke za Loni yasohotse mu Ukuboza umwaka ushize. Yerekanye ko Uganda n’u Burundi, ari indiri yo gushakiramo abajya mu mutwe wa gisirikare ukorera muri RDC, mu kizwi nka P5, irwanya u Rwanda, aho RNC na FDLR ari abayigize bo mu rwego rwo hejuru.

Abari abayobozi ba FDLR barimo La Forge Bazeye wavugiraga uwo mutwe na Lt. Col. Abega wari ushinzwe iperereza mbere yo koherezwa mu Rwanda bari bafashwe n’ingabo za Congo bavuye muri Uganda mu biganiro byari bigamije ku bahuza na RNC ngo banoze umugambi wo guhungabanya u Rwanda.

Hejuru y’ibi bihamya, benshi bibaza impamvu Minisitiri Kutesa atinyuka akavuga ko ntaho igihugu cye gihuriye n’ibikorwa byo gufasha abashaka guhungabanya umutekano w’u Rwanda.

Minisitiri w’Ububanyi n’Amahanga wa Uganda, Sam Kutesa
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
S.S 2019-08-20 08:19:53

Birababaje kubona abatama nk’abo babesha bashaje

2
Nkurunziza George 2019-07-31 11:48:35

Uganda nireke kuyobya uburari ahubwo niyemere iganire na reta y,urwanda bashake igisubizo.

3
Dieudonne Hakizayezu 2019-07-22 00:26:35

Mbega abatavuga rumwe na Leta y’u Rwanda ntaho bagomba kuba, ntaho bagomba gutemberera, ntacyo bagomba kurya, ntibagomba kwivuza, etc...

Iyi myumvire yanyu imeze nk’iyo ku ngoma ya cyami!!!

4
Ndandambara Lena 2019-05-22 04:46:29

Aliko ntimugire ngo aba banya Uganda nugusaza bituma bakora ibi byose! Oya rwose, ahubwo n’ishyari bafitiye Urwanda bivanze n’ubugome n’ubutindi! Bnaniwe guteza igihugu cyabo imbere dore ko ari na kinini kandi gifite imitungo bagakomeza kudushotora tukabihorera.Bashatse basubiza amerwe mwisaho kuko ibyo bashaka gukora ntabwo Imana ishobora kubibemerera.
Ahasigaye, twe twikomereze kwiza imbere aliko tube na maso dda ejo shitani itazaduca murihumye!!

5
Idee Claire 2019-05-20 02:08:24

Arikonjyewe rwose ijyambabazwa nuyu musaza M7 ugiyegusaza yandura bikazarangi aguye ishyanga ese ubwo yibeshyako yasenya urwanda Rwabanyarwanda rwazutse hhhh ahubwo amezenkawawundi utema ishami yicyayeho nagendebuhoro bave mukwinyuraguramo uyumunsi yavuze ibi ejo Kutessa avuze ibindi umutima w’ishyari wa M7 wugabanye bitaribyo uzakorwa n’iso tukwasaho uriro aho ugirango nitwe uwoherejeho hamwe nibyo bisabo icyumbikiye Umubyeyi wamafuti wenze kumva pfa Akubiswe nabo yareze!!!! ndabikubwiye sindi umuraguzi uzabibona bikubaho.

6
Majoro 2019-05-19 15:46:30

Ariko izo nterahamwe nka Kayumba zigenda mu bihugu byose gute kandi twaratanze impapuro zo kubafata? ?uziko bazigize ibipapuro! !

7
Kumiro 2019-05-19 14:15:08

Ubuyobozi bwa Uganda burashaje no ku manywa y’Ihangu baratinyuka bakabeshya abadiplomate ku Nkuru bo bazi neza. Agahinda gusa. M7 yabuze aho akwirwa nyuma yo gushyigikira abo amaze kubona ko nta cyo bazageraho

8
Kurazikubone Jean 2019-05-19 11:40:09

Ikibazo ni kirekire pe! Abanyarwanda benshi bafashe ubwenegihugu bwa Uganda. ndetse no muri Leta yacu I Kigali harimo abagande benshi. Nonese Museveni azababuze kujya mu gihugu cyabo? Kayumba yategetse district muri Uganda. Bivuzeko afiteyo amasambu, abavandimwe n’ibindi. Kuki bamubuza kujya muri Uganda? Icyo njye nibaza: abavugako barwanya Kagame yuko bafite ibyo bapfuye mu mikorere yabo tutagizemo uruhare, twakwemeza guteko ari Urwanda barwanya? Ese abateye ubwoba Kagame ni abaterabwoba ku Rwanda? Tubanze dushishoze ibirimo kuba!

9
bimawuwa 2019-05-19 08:33:59

Hanyuma se abo badiplamate ntabwo bari bemerewe kubaza ngo bamubaze kubibazo biri kuvugwa hirya ni hino mubitangaza makuru ndetse nibimenyetso bigaragaza ko Uganda icumbikiye abashaka guhungabanya umutekano wu Rwanda . abo badiplomate babijijwe kubaza ngo bamenye icyihishe inyuma yo kubatumira bababwira kuri ibyo binyoma.

10
Mayira 2019-05-19 07:46:04

Ese buriya Museveni azanyura ku mupaka n’imodoka aje muri comwealth i Kigali?

Kwamamaza