U Rwanda rwanzuye kutavugurura amasezerano y’imikoranire na Human Rights Watch

19 6-03-2018 - saa 11:42, Mathias Hitimana

Nyuma y’igihe kinini u Rwanda rudacana uwaka na Human Rights Watch (HRW), umuryango uharanira uburenganzira bwa muntu, kubera raporo irutangazaho, amasezerano y’imikoranire yageze ku ndunduro.

Muri Nyakanga 2017, uyu muryango wasohoye raporo ku Rwanda wise “All Thieves must be killed”, bisobanuye ngo “Abajura bose bagomba kwicwa”; ishinja inzego z’umutekano ko zishe abaturage bagera kuri 37 mu Burengerazuba bw’u Rwanda kuva muri Mata 2016.

Komisiyo y’Igihugu y’Uburenganzira bwa Muntu yaje gusohora raporo yerekana ko HRW yavuze ko hari abantu bishwe nyamara bakiriho. Itangazamakuru ryeretswe bamwe mu bavugwa muri iyo raporo bakiriho n’abandi bahamya ko bagenzi babo bakiriho ndetse ko abapfuye bazize indwara bitari ukwicwa.

Iyo raporo ya HRW yazamuye uburakari ku ruhande rw’u Rwanda, maze mu Ukwakira 2017 abadepite baganira na Perezida wa Komisiyo y’Igihugu y’Uburenganzira bwa Muntu, Nirere Madeleine, abahamirije ko raporo ya HRW yuzuyemo ibinyoma.

Mu myanzuro Inteko Ishinga Amategeko yashyikirije Guverinoma, harimo uwayisabaga ‘kongera gusuzuma amasezerano y’imikoranire na Human Rights Watch, ku buryo ibikorwa bigayitse bikomeje kuyiranga mu guharabika isura y’u Rwanda n’Abanyarwanda bitakomeza gukorwa hashingiwe cyangwa hitwajwe ayo masezerano atanakurikizwa’. Guverinoma yahawe iminsi 30 kuba yagaragaje icyo yabikozeho.

Mu kiganiro cyihariye na IGIHE, Ukuriye Ishami rya Minisiteri y’Ubutabera rishinzwe ubufatanye mu butabera mpuzamahanga, Umurungi Providence, yatangaje ko ibyo Inteko Ishinga Amategeko yasabaga byakozwe, isubizwa mu ibaruwa iyimenyesha icyemezo cyo kutazavugurura amasezerano na HRW.

Amasezerano u Rwanda rwari rufitanye na HRW yari yarasinywe ku wa 29 Kamena 2016 arangira ku wa 29 Werurwe 2017.

Murungi yagize ati “Icyemezo cyafashwe ni uko Guverinoma yasanze nta mpamvu yo kongera kuvugurura ayo masezerano, bishingiye ku mikoranire n’imikorere n’ubundi yari yabanjirije amasezerano yari acyuye igihe. Ibikorwa bya HRW twasanze nta burenganzira bwa muntu birengera ahubwo bifite impamvu zihishe za politiki aho kuba iz’uburenganzira bwa muntu.”

Ikindi kandi raporo ya HRW yo muri Nyakanga 2017 yasohotse n’ubundi nta cyangombwa cyo gukorera mu Rwanda ifite.

Minisiteri y’Ubutabera ivuga ko hafashwe icyo cyemezo cyo kutavugurura ayo masezerano ariko n’ubundi nta baruwa HRW yari yandika isaba kuyongera. Ariko ngo hari amakuru ifite ko abantu bayo bagenda baca muri za Ambasade, bashaka ko zayifasha akongerwa.

Amasezerano HRW yagiye yica, yavugaga ko mu gihe iri gukora raporo yajya ibanza kuganira na Minsiiteri y’Ubutabera ku kintu ibonye kitagenda mu kubahiriza uburenganzira bwa muntu mbere yo kuyitangaza.

Mu gihe HRW nta mikoranire n’u Rwanda, Guverinoma yamenyesheje Inteko ko hari indi miryango itegamiye kuri leta yita ku burenganzira bwa muntu izakomeza gukorana nayo.

Ese u Rwanda ruzajyana mu nkiko HRW?

Mu bitekerezo byatanzwe nyuma ya raporo yerekanaga ko hari abantu bapfuye nyamara bakiriho, harimo no kuba HRW yagezwa mu nkiko.

Kuri iki kirebana n’ubutabera, Murungi yagize ati “Twaje gusanga atari ngombwa, kwaba ari ukuyiha ingufu tugiye mu manza nayo.”

Akomeza avuga ko abashyizwe muri iyo raporo ko bapfuye nyamara bakiriho begerwa bagahumurizwa.

Inteko Ishinga Amategeko yari yasabye Guverinoma gushakira abunganira abo raporo ya HRW ivuga ko bapfuye kandi bariho kugira ngo bayikurikirane mu nkiko kubera ko bahungabanyijwe (préjudice moral) n’ibinyoma bikubiye muri raporo yise “All Thieves must be killed”.
Raporo za Human Rights Watch zagiye zishoka zishinja u Rwanda kutubahiriza uburenganzira bwa muntu zaramaganywe, ndetse rukanagaragaza ko ushaka ukuri adakwiye kuzisoma.

Umuyobozi wa Human Rights Watch, Kenneth Roth

Indi nkuru wasoma : Agahinda n’urujijo ku bavuzwe muri Raporo ya Human Rights Watch

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
Marcus 2018-03-06 22:31:39

Ikibazo gihari ni uko tudakunda umuntu uvugisha ukuri ariko nziko hari abantu yagiye ivugira.Uzi kugirango I Gikondo kwa gacinya havugururwe? Byasabye ubuvugizi bwayo.ukuri kuraryana nta kundi.ariko kuvugwa ibyiza gusa nibyo bitumye inzego z’ibanze ziyanga amakuru mabi batinya ko nibatanga amabi beguzwa .twige kuvugisha ukuri .murakoze

2
Mahoro 2018-03-06 19:38:58

MWAKOZE MURAYASESA. HUMAN RIGHTS YARI IGIKORESHO CYABAKORONI BASHAKA KUDUSIGA ICYASHA. KDI NTAWUBARUSHA KURENGANYA ABATURAGE. BARANGIZA BAKANADUHA IMFASHANYO ZIRIMO UBUSHAKASHATSI BWABO NGO BAREBE UKO TURWARA. BARATWANGA BARAKATSINDWA NA RUREMA

3
Ntwali 2018-03-06 16:07:06

abo bagiye nka BBC birashekeje! ariko ubundi ubukoloni bw’abazunguuu. leta nayishima yirukanye n’ambasade y’abanyamerika n’abongereza igakiza abanyarwanda ubukoloni bwatujujubije! neocolonialism wee

4
Nshimiyimana Emmanuel 2018-03-06 14:37:15

Mwese izonimpaka zango tourwane ikizibatera tourakizi mutuze moushire akogapira kanyuhasi

5
kamanayo 2018-03-06 13:59:31

Nta mpanvu yo guta umwanya mu bidusenya kandi dufite byinshi byo kubaka bifitiye rubanda akamaro. Kimwe na HRW, na Radio VOA izahambirizwe kuko nayo ntikora itangazamakuru ahubwo ikora propagande y’abarwanya u Rwanda

6
Frank 2018-03-06 12:56:41

Good idea. No muri North Korea nta HRW ihaba

7
TOTAL 2018-03-06 12:51:07

Karega, urakoze kuri coment yawe. HRW icyo ikora ni ukwerekana aho uburenganzira ba muntu buhonyangwa. Haba muri afurika n’ahandi hose. Uzasome amaraporo atandukanye yayo uzasanga ntawe bakiingira ikibaba. Kuba guverinema zimwe na zimwe zanga zigafunga amatwi, ibyo ni akazi kazo, ariko HRW iba ayabyerekanye.
uyu munyamakuru ntiyatubwiye ko HRW yakoze contre enquête ikerekana ko abantu yavuze bapfuye ri byo koko, ko uriya ushinzwe uburenganzira bwa muntu mu Rwanda yavuze bitavuguruza na gato ibyo HRW yatangaje.
niba mubishaka mubirebe. Raporo za HRW mbona ari ukuri, ikibazo ni uko ivuga ibyo tudashaka kumva .
Bacane umubano nayo ariko ntibayibeshyere ko ivuga ibinyoma.

8
uwayo 2018-03-06 10:53:50

@mwemezi waba warasomye raporo zingahe za HRW cyangwa urasomerwa ese wambwira USA yaba ishyirwa ku mwanya wa kangahe numara kunsubiza urahita wumva icyo nashakaga kukubwira ariko kuko nziko Wenda nta bushobozi bwo gusoma ufite reka nkubwire ko USA itaza imbere muri raporo za HRW

9
Bimawuwa 2018-03-06 07:53:59

Ariko uyo muyobozi nawe arasekeje ngo bajyanye HRW mu nkiko byaba ari ukuyiha ingufu, ese nu kuyiha ingufu gute aribo baba bayirega cyereka ibyo barega bidafite nshingiro .

10
Mwemezi 2018-03-06 06:53:01

ariko ubundi kuki HRW itajya ivuga amakosa USA ikora? nuko se batayagira? uzi ukuntu bakorera torture uwo baketseho ko akorana na shabab cg na quaida? barangiza bakaza iwacu kutubeshyera nibyo tutakoze, umuntu ufashe uyu mwanzuro jye mumunyereke mugurire akantu kuko adukijije urubwa

Paji: 1 | 2  

Kwamamaza