IGIHE

Perezida Kagame yakiriye intumwa ya Tshisekedi mbere y’uruzinduko rwe i Kigali

4 13-03-2019 - saa 09:42, Rabbi Malo Umucunguzi

Perezida Paul Kagame yakiriye Vital Kamerhe uyobora ibiro bya Perezida mushya wa Repubulika Iharanira Demokarasi ya Congo, Felix Tshisekedi, bagirana ibiganiro byibanze ku kunoza umubano w’ibihugu byombi, bibera mu Kigo cy’imyitozo cya gisirikare cya Gabiro mu Karere ka Gatsibo.

Muri ibyo biganiro hanagarutswe ku ngendo z’abakuru b’ibihugu, nk’umusaruro uzakomoka ku mibanire myiza ibihugu byombi bifitanye.

Mu kiganiro na Minisitiri w’Ububanyi n’amahanga w’u Rwanda, Dr Richard Sezibera, yabwiye IGIHE ko uruzinduko rwa Perezida Tsisekedi i Kigali ruteganywa mu minsi ya vuba.

Ati "[Kamerhe] yaraje, ibiganiro byari uburyo bwo gukomeza kugira umubano mwiza hagati ya y’u Rwanda na RDC, ni cyo cy’ingenzi. Ubwo muri uko gutsura umubano no kuwukomeza, n’ingendo z’abakuru b’ibihugu nazo zizashoboka.”

Yakomeje agira ati “Perezida (Tshisekedi) nawe azasura u Rwanda kandi narusura igihugu kizamwakira neza. Ni vuba, byashoboka ko bizaba mu gihe cy’inama y’abayobozi b’ibigo (CEO Summit) izaba muri uku kwezi.”

Iyo nama izwi nka 2019 Africa CEO Forum iteganyijwe ku wa 25-26 Werurwe 2019 muri Kigali Convention Centre, ikazahuriza hamwe abayobozi bakomeye mu nzego za leta n’abikorera bagera ku 1,500, baganira uburyo bwo guteza imbere ubucuruzi muri Afurika.

Perezidansi ya RDC nayo yifashishije Twitter yatangaje ko Vital Kamerhe yari i Kigali “ku wa Kabiri tariki 12 Werurwe 2019, ashyiriye ubutumwa bwa Perezida Félix-A. Tshisekedi mugenzi we w’u Rwanda, P. Kagame, ashimangira ubushake bwe mu kugarura amahoro arambye mu Burasirazuba bw’igihugu.”

Perezida Kagame aheruka kugirana ibiganiro na Félix Tshisekedi muri Gashyantare uyu mwaka, byibanze ku mubano w’ibihugu byombi, ubwo bahuriraga muri Ethiopie ku munsi wa kabiri w’Inteko rusange ya 32 y’Umuryango wa Afurika Yunze Ubumwe, AU.

Perezida Félix Antoine Tshilombo Tshisekedi w’imyaka 55, ku wa 20 Mutarama 2019 nibwo Urukiko rurinda Itegeko Nshinga muri RDC rwemeje ko yatsinze amatora ya Perezida yabaye ku wa 30 Ukuboza 2018, rutesha agaciro ikirego cyatanzwe na Martin Fayulu wavugaga ko ari we watsinze.

Tshisekedi yitezweho byinshi kuko yatowe mu gihe hashize imyaka isaga 20 amashyamba ya RDC yarahindutse indiri y’ibikorwa bigamije guhungabanya umutekano w’u Rwanda.

Mu mpera za Mutarama 2019, Ubushinjacyaha bw’u Rwanda bwatanze impapuro nshya zisaba itabwa muri yombi rya Kayumba Nyamwasa n’abandi bayobozi bari ku ruhembe rw’umutwe w’abarwanyi uzwi nka P5 cyangwa RNC, wisuganyiriza mu mashyamba ya RDC ugamije guhungabanya umutekano w’u Rwanda.

RDC kandi ni nayo ikoreramo umutwe wa FDLR, umaze imyaka myinshi ugambirira hungabanya umutekano w’u Rwanda, ugizwe na benshi bagize uruhare muri Jenoside yakorewe abatutsi mu 1994.

Muri manda ye y’imyaka itanu, Perezida Tshisekedi yitezweho kuzahura umubano w’igihugu cye n’u Rwanda no kongera imbaraga mu kwambura intwaro aba barwanyi bamaze igihe bica abaturage mu burasirazuba bwa RDC.

Perezida Paul Kagame, yakiriye Vital Kamerhe uyobora ibiro bya Perezida mushya wa Repubulika Iharanira Demokarasi ya Congo
Yamushyikirije ubutumwa bwa mugenzi we
Perezida Kagame yahawe n'impano
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Rugango Eugene 2019-03-27 01:41:22

nibyizako urwanda rugerwa kdi rugasurwa

2
Augustin uwimanishaka 2019-03-14 00:06:19

Turabyishimiye cyane kurwanda na DRC Byakomeza kwagura umubano mwiza ariko birinda icyatuma basubiranamo byahato nahato! cyane cyane mubiganiro bazagirana bazibande kubuhahirane bwimbande zombi mubaturage bakoresha imipaka kndi abanyarwanda bisange muri DRC Na bakongomani bisange mu Rwdanda Ntidushaka kumva tena nkibihugu nkontibivuga rumwe bitewe nimbamvu runaka! Murakoze bazagire ibiganiro byiza kndi byubaka!

3
Theo 2019-03-13 15:59:04

Imana itugarurire imitima y’abaturanyi bacu dukundane kuko ntacyo dupfa .

4
Stephen 2019-03-13 06:13:22

Gutsura umubano na RDC ni byiza cyane kuko gukorana nayo hagamije iterambere binyuze muri politiki y’ubuhahirane n’umbwumvikane bizazamura umubano ushyingiye k’ubucuruzi ndenga mipaka habe urujya n’uruza rw’abaturage n’abayobozi ahubwo ibicuruzwa twajyanaga Uganda ndabona bigiye kubona amasoko ahandi hagutse (RDC, Kenya, TZ, Congo Brazzaville, Gabon, South Sudan) naho abo kwa ba mutama na ssebo baracyatandukanya politiki n’ubushabitsi ukwabyo kandi byombi bimeze nk’impanga zikorera hamwe byose. Soyez le bienvenu au pays de mille Collines Son Excellence Félix Tshitshi nouveau président élu démocratiquement.

Kwamamaza