IGIHE

Muhanga: Abakandida-depite b’abagore bahize kurwanya ihohoterwa ryo mu ngo

0 1-09-2018 - saa 16:27, Akimana Jean de Dieu

Abagore 62 bahatanira guhagararira Intara y’Amajyepfo mu Nteko Ishinga amategeko, bijeje abaturage ubuvugizi ku bibazo bigisubiza inyuma umuryango nyarwanda, igihe bazaba babatoreye kuba abadepite.

Aba bagore bakomeje urugendo rwo kwiyamamaza, ku wa Kabiri w’iki cyumweru bari kuri Stade ya Muhanga, bizeza abaturage kurwanya ihohoterwa ryo mu ngo, bagaharanira guteza imbere imbere umuryango no kuzamura umugore.

Aba bakandida-depite kandi bijeje abaturage gushishikariza abagore kwitinyuka no gufasha leta mu bikorwa bitandukanye birimo ubuhinzi n’ubworozi bukozwe kinyamwuga.

Uwihoreye Jeanne yagize ati “Harimo gukora amategeko anyuze buri wese no kwimakaza uburinganire tubwigisha, kuko mbona ko hari ahakiri intege nke. Ubona ko hari abacyicana kuko baba batazi neza ko umutungo bagomba kuwurebera bombi nk’abashakanye.”

“Ikindi tugomba kwita ku buhinzi n’ubworozi kuko nibwo butunze benshi mu banyarwanda, bakabukora bazi neza ko buzabateza imbere.”

Uwanyirigira Consolée we yasabye abagize inteko itora kumuha icyizere akabatumikira.

Yakomeje agira ati "Mwebwe mumpe icyizere muntore mu Isi naho mu ijuru ho nzirwariza, ariko dukomeze gufatanya kugira ngo imishinga mito mito yacu tuyikore kandi munabone ubufasha bwo kugira ngo mukomeze kwikura mu bukene.”

“Ikindi nzakomeza gukora ubuvugizi ku bakobwa babyarira iwabo kuko bahora mu bwigunge ndetse ugasanga n’imiryango baturukamo ibatererrano ugasanga bitereye icyizere."

Mu bakandida-depite b’abagore mu Ntara y’Amajyepfo, abasaga 65% ni abarezi babikora kinyamwuga.

Undi mubare munini ni abaganga, aho bizeza kuzakomeza guharanira ko ubuvuzi bwagera kuri bose.

Muri aba bagore 62 bari kwiyamamaza mu Majyepfo, hazatorwamo abagore 6 bazahagararira iyi ntara mu Nteko Ishinga amategeko.

Mu cyiciro cy’abagore, mu ntara zose hakazaturuka abadepite 24 b’abagore bangana na 30% by’abagize Inteko Ishinga amategeko.

Amatora mu cyiciro cy’abagore ateganyijwe tariki 4 Nzeri 2018.

Abagize inteko itora bateze amatwi ibitekerezo by'abakandida depite
Abagore bashaka kujya mu nteko ishingamategeko kuri 30% mu ntara y'amajyepfo n'abayobozi batandukanye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza