Jeannette Kagame yagarutse ku ruhare rwa Imbuto Foundation mu iterambere ry’abagore

24 6-12-2016 - saa 21:51, IGIHE

Mu kiganiro cy’imbonekarimwe Madamu Jeannette Kagame yagiranye n’ ikinyamakuru FORBES WOMAN AFRICA cyandika ku mugore w’Umunyafurika kigenewe Ukuboza 2016 na Mutarama 2017, yagarutse ku buzima bw’Umudamu w’Umukuru w’Igihugu, aho avuga by’umwihariko ku Rwanda nk’igihugu gitera intambwe mu guteza imbere uburinganire.

Madamu Jeannette Kagame yagarutse ku iterambere ry’urubyiruko n’abagore mu Rwanda, nk’umwe mu bagira uruhare mu guteza imbere ibyo byiciro bitakunze kwitabwaho.

Ibikorwa bye ahanini binyura mu muryango Imbuto Foundation umaze imyaka 15. Muri byo hari nka gahunda ya 12+ igenewe abana bafite hagati y’imyaka 10 na 12, bamara amezi 10 bahabwa ubumenyi ku buzima bw’imyororokere, imibanire, imiyoborere no kwiteza imbere.

Madamu Jeannette Kagame yaje kugirana ikiganiro n’umunyamakuru wa FORBES WOMAN AFRICA wari witegereje urukundo n’urugwiro Abaturage bo mu Karere ka Rulindo bamwakiranye n’uko yegereye abana bicaye mu ishuri bahana ibitekerezo akaza no kubibwira, agakomereza mu muganda ngarukakwezi kuwa 29 Ukwakira 2016.

IGIHE yafashemo zimwe mu ngingo z’ingenzi zikubiye mu bibazo n’ibisubizo:

Umunyamakuru: Twabonye uburyo abantu bakwishimiye bakwita Mama. Umaze imyaka 16 uri Umudamu wa Perezida wa Repubulika, ibi wabigezeho gute?

Madamu J.Kagame:Navuga ko ari uguhora iteka ugirira abandi uko nawe wifuza ko bakugirira… Nta kuntu umuntu yakwicara ngo arebere ntatange umusanzu mu guhindura imibereho y’abaturage.”

Umunyamakuru:Akenshi hari imyumvire y’uko Abadamu b’Abakuru b’Ibihugu batagaragara cyane. Bitandukanye nawe kuko umaze gukorera byinshi abari barahejwe barimo abagore n’urubyiruko by’umwihariko. Ibi ngibi mubishobozwa n’iki?

Madamu J.Kagame: Abadamu b’Abakuru b’Ibihugu natwe tugira ibyiyumviro, sibyo? [aseka], mbere na mbere turi abantu… Buri wese muri twe yagiye abigerageza, akegera abantu bakeneye kwitabwaho...Nanjye naje kubona amahirwe mfite arimo kuba mpura bya hafi n’abari mu nzego zifata ibyemezo, nsanga ntayapfusha ubusa ngo nicare niturize ntayabyaje umusaruro.”

Umunyamakuru: Mufite gahunda nyinshi zongerera ubushobozi urubyiruko; musanga bazagira uruhe ruhare mu guteza imbere ubukungu bw’u Rwanda?

Madamu J.Kagame: Ubusanzwe kuba bagize igice kinini cy’abaturage, u Rwanda rukwiye kubibyazamo umusaruro, kandi nibabasha kwihangira imirimo, bakikorera ntibirirwe bashakisha akazi, twumva bizadufasha kugera vuba ku nzozi zacu zo kuba igihugu gifite ubukungu bugeze ku rugero rwiza.”

Umunyamakuru: Wiyumva ute iyo uri mu ruhame abantu bakwereka ko bakwishimiye mu buryo budasanzwe?

Madamu J.Kagame: Niyumvisha ko baba banyitura ibyo nanjye nkora [aseka]. Ni ibintu binezeza iyo abantu batangirira ku bitekerezo bito ariko wasubiza amaso inyuma aho tuvuye mu myaka 22 ishize ugasanga...Abo tuganira mpora mbabwira ko aribo ubwabo bagomba gutuma imibereho yabo iba myiza, gahoro gahoro bakabona ko bakeneye kwagura ibyo bakora kugira ngo babashe kwihaza ,bityo ibyo turi kubona ni uko guhindura imyumvire aribyo byatuma tugera kubyo twifuza.

Umunyamakuru: Ni iyihe ntambwe itahiwe guterwa mu guteza imbere urubyiruko n’abagore?

Madamu J.Kagame: Ntekereza ko abagore bakwiye kubyaza umusaruro aya mahirwe bagakomeza kuzamuka.

Umunyamakuru: Uri umwe mu batangije umuryango w’Abadamu b’abakuru b’ibihugu bya Afurika uharanira kurwanya Virusi itera Sida mu 2002?

Madamu J.Kagame: Ubu turi kwita cyane ku kurandura ubwandu buhererekanywa hagati y’umwana n’umubyeyi n’andi moko ya za kanseri zibasira abagore, twareba ku gihugu cyacu, harimo kanseri y’inkondo y’umura tukaba tunishimira ibimaze kugerwaho kugeza uyu munsi. Abakobwa bose bato bahawe urukingo rwa kanseri y’inkondo y’umura, tukizera ko ari bumwe mu buryo bwo guhashya kanseri.

Umunyamakuru: Bihagaze bite ibirebana no kugeza serivisi z’imari ku bagore bo mu byaro badakorana n’ibigo by’imari?

Madamu J.Kagame:Abagore bagiye bishyira hamwe mu makoperative atandukanye, ubu bari kugerageza gukorana na bimwe mu bigo by’imari byorohereza abagore kugirango bibegere babyaze inyungu serivisi bitanga... Kandi bagaragaje ko bashobora kwishyura neza inguzanyo kurusha uko bimeze ku bagabo.

Umunyamakuru: Uri umuyobozi w’ikirenga wa Imbuto Foundation na Unity Club, ukaba Umudamu w’Umukuru w’Igihugu, ukagira n’Umuryango, ibi hari ingorane bigutera kubihuza byose?

Madamu J.Kagame: Kugira ubuzima buri hamwe kandi butekanye, umuntu agomba kuba mu gihugu cyita ku baturage bacyo, bityo rero ntabwo nari kumva meze neza byuzuye ntagira uruhare muri ibyo byose.

Umunyamakuru: Ujya ubona umwanya wo kwiyitaho. Numvise ko ukunda gusoma cyane?

Madamu J.Kagame: Nkunda gusoma ibitabo bigaruka ku mateka y’abantu, ubu ndimo gusoma igitabo cyitwa Là où le soleil disparaît cy’umuhanzi w’Umunyarwanda n’Umunya-Canada, witwa Corneille na Petit Pays cya Gaël Faye, Umunyarwanda n’Umufaransa uririmba injyana ya Hip Hop.

Umunyamakuru: Ni iki gihishe mu myaka 15 iri imbere ya Imbuto Foundation?

Madamu J.Kagame:Turacyakorana n’Ubuyobozi bwacu ku byo duteganya, ariko mu by’ukuri turashaka gusigasira ibyo twagezeho, tugakomeza kubaka icyizere muri urwo rubyiruko no kubumvisha ko bakwiye kuba mu mwanya bagomba kuba barimo muri sosiyete. Muri make ni ukugira inzozi bashobora kugeraho, ari nabyo dutegereje.

Umunyamakuru: Biba bimeze bite gukorana na Perezida wa Repubulika?

Madamu J.Kagame: Nkomeza kumwitegereza ubundi nkagerageza kumva intego afite, nkamufasha kubyoroshya kugira ngo hagire intambwe iterwa.

Umunyamakuru: Dusoza ni ubuhe butumwa wagenera abakobwa muri Afurika?

Madamu J.Kagame: Ni ukumva ko bashoboye kandi bakigiramo icyizere ko baramutse bitaye ku nzozi bafite, byanze bikunze bazazigeraho; ntabwo buri gihe biba byoroshye ariko niba bafite ukwiyemeza bazabigeraho. Hari nubwo rimwe na rimwe abantu badashaka kubibafashamo, bagomba gukora ibishoboka byose bakagera ku ntego bihaye.

Ikiganiro kirambuye Madamu Jeannette Kagame yagiranye na FORBES WOMAN AFRICA wabasha kukibona mu nimero yagenewe Ukuboza 2016 na Mutarama 2017 igurwa mu nzu z’ibitabo cyangwa hifashishijwe internet, aho usabwa gukora download ya Application ya Forbes Woman Africa muri Playstore ku bakoresha Android.

Madamu Jeannette Kagame akomeje kuba ku isonga mu guteza imbere uburinganire budahwema guhesha u Rwanda amanota, ubu igihugu kikaba kimaze kuba intangarugero harebwa uruhare abaturage bashobora kugira mu kwiyubakira igihugu.

Madamu Jennette Kagame yavuze ko abakobwa bo muri Afurika bagomba gukora ibishoboka byose bakagera ku nteho bihaye
Bamwe mu bana b'abakobwa baterwa inkunga na Imbuto Foundation
Kwamamaza
Kwamamaza

Izindi nkuru wasoma

400 27 16-10-2018
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3  

1
Mary 2016-12-09 05:19:18

First Lady wacu no muri interview humilité agira umuntu arayibonamo peeee...uyu mubyeyi njye nabuze amagambo akwiye yo kumuvuga uko mwiyumvamo, birandenga iyo nandika nkuku amarira aba agwa pe...Imfura ntizashize pe!!! Banyarwanda uyu mugisha dufite wo kugira President Kagame na First Lady beza gutya, b’intangarugero, badahwema kudushakira ikiza, dore iterambere ni ryose, n’ibitaragerwaho ntibituma bagoheka barashakisha ngo bikemuke...ubu koko twabanganya iki? Mana warakoze kuba warabaduhaye waturokoye bugira kabiri...wenda President wacu yari kuturokora ariko uru Rwanda ntirwiyubake, trauma ndetse n’ibisazi bikatwiraramo ariko ntiwabikunze warabaduhaye kuko wari uziko bazaduhoza amarira none babigezeho....Turabakundaaaaaaa tubasabiye imigishaaaaa yoseeeee utanga!!!!!

2
Makobwa 2016-12-08 03:35:36

Biranshimishije kubona ibikorwa bya first lady byarambutse umupaka bikamenyekana n’ahandi. Ikiza burigihe kiriyamamaza.

3
jeanne 2016-12-07 12:16:32

mama Rwanda , turagukuuuuuuunda Imana ijye ihora ishimwe yo ya kuduhaye , abari n’abategarugori twe by’umwihariko ni karusho nukuri , ibyo udukorera umunsi kuwundi tuba tubona ari ibitangaza umunsi kuwundi rwose

4
BTS 2016-12-07 07:02:38

Erega buriya akenshi, umuntu ashaka ukwari. Perezida kagame Paul ntiyaba intwari intore kw’isonga ngo abane n’ikigwari. Ikindi, first lady, ntabutindi agira. N’umunyempuhwe. Urunva se yananirwa iki? Reka ahubwo nanjye nzatere inkunga imbuto, maze izamure abagore n’urubyiruko. Ahubwo bagabo b’irwanda nimuze dutere inkunga imbuto, ubundi abagore bacu n’abana bacu batumbagire. Kuzamuka kwabo niryo shema ry ’Umugabo.

Bravo First lady!!!!! Imana izakurinde

5
kangaroo 2016-12-07 05:34:26

So classy

6
Ikuzo 2016-12-07 04:43:20

Abanyarwanda turashimira Mdamu Jeannette Kagame.

7
Doreen 2016-12-07 04:42:24

Mu myaka igera ku 10, Imbuto Foundation irangajwe imbere na Madamu Jeannette Kagame yateje imbvere cyane cyane umwana w’ umukobwa kandi atanasize inyuma umuryango nyarwanda muri rusange

8
Lilian 2016-12-07 04:40:48

Ntekereza ko Madamu Jeannette Kagame nawe ari umugisha abanyarwanda babonye muri uru rugendo rw’ iterambere turi kandi nizera ntashidikanya ko azakomeza guherakeza abari n’ abategarugori mu itrerambere

9
muyiramye 2016-12-07 04:38:56

Uyu mubyeyi rwose ni urugero rwiza kandi abanyarwandakazi bage bamufatiraho uruhgero

10
jean 2016-12-07 04:37:47

Muri ino myaka, uruhare rwa First Lady wacu mu guteza imbere umuryango nyarwanda rwabaye runini kuburyo numva rwose, nabimushimira

Paji: 1 | 2 | 3  

Kwamamaza