Imwe mu myanzuro ikomeye yagiye ifatirwa mu nama y’Umushyikirano guhera mu 2003

5 14-12-2016 - saa 12:26, Deus Ntakirutimana

Kuva mu myaka 13 ishize, Abanyarwanda b’ingeri zitandukanye bitabira Inama y’igihugu y’Umushyikirano igiye kuba ku nshuro ya 14, guhera kuwa Kane no kuwa Gatanu tariki 15 na 16 Ukuboza 2016.

Iyi nama ngarukamwaka iteganywa n’Itegeko Nshinga ryo mu 2003 mu ngingo ya 168, ikaba urubuga ruha Abanyarwanda uburyo bwo kujya impaka ku byerekeye Igihugu, Ubuyobozi bw’ibanze n’ubumwe bw’Abanyarwanda, iya mbere ikaba yarabaye kuwa 28 Kamena 2003.

Kuva icyo gihe habonetse uburyo Abanyarwanda bahurira hamwe bakavuguta umuti w’ibibazo bibugarije, ubu bimwe bikaba bimaze kwigizwayo cyangwa se biri mu nzira zo kurangira burundu, harimo nka Nyakatsi, kudakurikirana abakekwaho Jenoside n’ibindi.

Hari umusanzu ukomeye umaze guturuka ku myanzuro y’Umushyikirano

Kwishakamo ibisubizo

Kimwe mu mbuto zeze ku Umushyikirano harimo ishyirwaho ry’ikigega gihurizwamo amafaranga akoreshwa mu iterambere ry’igihugu atari imisoro, ‘National Solidality Fund’ cyiswe Ikigega Agaciro.

Ikigega Agaciro Development Fund cyakomotse ku mwanzuro wafatiwe mu Nama y’Umushyikirano ya 9 yabaye ku matariki ya 15-16 Ukuboza 2011.

Kuwa 16 Kanama 2012 mbere y’uko Ikigega Agaciro gitangizwa ku mugaragaro, John Rwangombwa wari Minisitiri w’Imari n’Igenamigambi, yavuze ko muri iyo gahunda Abanyarwanda bari mu gihugu n’abatuye mu mahanga bagombaga gutanga umusanzu wo kubaka igihugu ku bushake.

Ni mu gihe ibihugu bimwe by’abaterankunga b’u Rwanda bari batangiye kuzihagarika, aho cyabereye Agaciro kikaba kimaze kugeramo miliyari 38 yatanzwe n’Abanyarwanda ku bushake, anashorwamo imari akabyara andi.

Abarokotse Jenoside baragobotswe

Abarokotse Jenoside yakorewe Abatutsi batishoboye na bo babashije kongera gusubizwa icyizere bandikwaho inzu zabo nyuma yo kuzubakirwa ariko badafite icyizere ko bazazigumana. Nubwo ari bo zabaga zubakiwe ariko zari zanditse kuri leta.

Icyo gikorwa ntigisigana na “One Dollar Campaign’, gahunda yafashwe nko gutanga idolari rimwe ryafasha mu kubonera amacumbi abarokotse Jenoside bari bagifite ikibazo cyo kutagira aho bakinga umusaya, havamo inyubako yagenewe imfubyi za Jenoside yubatse mu Mujyi wa Kigali.

Muri One Dollar Campaign hakusanyijwe miliyari na miliyoni 700 z’amafaranga y’u Rwanda yo kubakira imfubyi za jenoside yakorewe Abatutsi mu 1994.

Icyo gitekerezo cyakomotse ku Banyarwanda bo muri Diaspora byo bikaba byarafashije mu gushyira mu bikorwa umwanzuro wari ugamije gufasha abarokotse jenoside batishoboye. Iyo nyubako y’ibyumba 48 icumbikiye impfubyi hafi 200 zagaruye icyizere cyo kubaho.

Nyakatsi n’akotsi kayo byagiye burundu

Inama ya 8 y’Umushyikirano yabaye tariki ya 20-21 Ukuboza 2010 yafashe imwe mu myanzuro irimo guca burundu nyakatsi, izo zikaba zari inzu zisakaje ibyatsi kuva kera cyane, zitari zijyanye n’u Rwanda rushya.

Nyuma yo kuvana nyakatsi mu isakaro ry’inzu z’Abanyarwanda, hakurikiweho ubukangurambaga bwo kurandura nyakatsi y’uburiri, aho Abanyarwanda bararaga ku byatsi n’imisambi, abenshi bamaze kwigurira matora.

Umuco wo kubika mu ihembe uragerejwe

Inama ya 6 y’umushyikirano yabaye hagati ya 18-19 Ukuboza 2008, hafatiwemo umwanzuro uganisha ku kwimakaza umuco wo kuzigama no kugabanya imyenda byatumye hashyirwaho Koperative zo kuzigama no kugurizanya (Savings and Credit Cooperatives-SACCO) mu Mirenge yose uko ari 416.

SACCO yafashije abaturage kubona aho babika amafaranga yabo bajyaga babikwa mu ihembe akaba yakwangirika, ndetse izo koperative zabafashije kuguza amafaranga bakiteza imbere.Muri Gicurasi 2015 yari imaze kugira abanyamuryango basaga miliyoni eshatu.

Kuvogerwa kw’Ikinyarwanda

Hatangijwe kandi Inteko y’Ururimi n’Umuco bitewe n’umwanzuro wafatiwe muri iyo nama yo muri 2010, ubu igenda irengera ururimi rw’Ikinyarwanda ndetse n’umuco w’Abanyarwanda ngo bidacika. Ndetse muri 2015 Ururimi rw’Ikinyarwanda rwongeye kurengerwa, hemezwa ko cyajya kigishwa no muri kaminuza.

Perezida Kagame ubwo yari ayoboye Inama y'Umushyikirano ya 2015

Uburezi bwarimakajwe, abana b’u Rwanda bigira Ubuntu imyaka 12

Mu 2010 hafashwe umwanzuro wo gutegura gahunda y’uburezi bw’imyaka 9 na 12, yamaze gutanga umusaruro kuko umubare w’abarangiza amashuri yisumbuye wikubye inshuro nyinshi, bitewe n’uko batakigorwa no kubona amafaranga y’ishuri ahubwo bigira ubuntu.

Iyo gahunda yakemuye ikibazo cyari gikomereye umuryango nyarwanda cy’abana bataga ishuri n’abayacikirizaga, ahanini hagatangwa impamvu z’amikoro make, ariko uyu munsi barigira ubuntu.

Abakekwagaho kugira uruhare muri Jenoside bidegembyaga

Hafashwe imyanzuro irimo iyibanda ku gukumira Jenoside no kwita ku mibereho y’abarokotse Jenoside yakorewe Abatutsi, no gukomeza gukorana n’ibihugu by’amahanga kugira ngo byohereze mu Rwanda abakoze jenoside cyangwa se bikaba byabacira imanza.

Ni umwanzuro udashobora guhita ushyirwa mu bikorwa ngo birangire, ariko intambwe iterwa irivugira kuko hari benshi bagenda boherezwa, abaheruka bakaba Dr Leon Mugesera, Jean Claude Seyoboka, Jean Baptiste Mugimba na Jean Claude Iyamuremye, Dr Leopold Munyakazi n’abandi.

Abacikaga TIG bigiwe imigambi

Mu mushyikirano wabaye hagati ya tariki ya 10-11 Ukuboza 2009 hafashwe imyanzuro yo kongera imbaraga mu mirimo nsimburagifungo ifitiye igihugu akamaro (TIG) yaje gutuma igihugu cyunguka ibikorwa bitandukanye n’ abakoze ibyaha bagashyira mu bikorwa ibihano bahawe bamara kubisoza bagafungurwa ku bari bafunze.

Icyo gihe hagaragaraga umubare munini w’abatoroka iyo mirimo ariko aho binogejwe byatumye igihugu kidahomba amafaranga agera kuri miliyari.

Girinka

Gahunda ya Girinka yatangijwe mu 2006, ifite intego nyamukuru yo kurwanya imirire mibi mu bana no kuzamura ubukungu bw’imiryango ikennye, bigakorwa imiryango itifashije ihabwa inka, zabyara bakoroza abaturanyi.

Gusa hari aho wasangaga itangwa ry’inka ridakorwa mu mucyo, hamwe abasanzwe bafite ubushobozi bwo kuba bakwigurira inka na bo bari mu bazihawe muri iyo gahunda igenewe abatishoboye.

Inama y'Igihugu y'Umushyikirano yitabirwa n'abayobozi mu nzego zitandukanye

Icyo kibazo cyagaragajwe mu Nama y’Igihugu y’Umushyikirano yabaye mu mwaka wa 2009 nyuma ariko kiza gukemurwa hifashishijwe gahunda yo kugaruza inka zari zarahawe abatazikwiye, gahunda yatumye hahita hagaruzwa inka 20 123 mu zigera ku 20 532 zari zarahawe abatazikwiye, maze zongera gutangwa ku miryango ikennye.

Imihigo y’uturere

Inama ya 4 yabaye ku matariki ya 18-19 Ukuboza 2006, hasuzumiwe hamwe aho igihugu cyari kigeze muri gahunda y’ubumwe n’ubwiyunge bw’Abanyarwanda no gusuzuma ibibazo by’ingutu bibangamiye iyo gahunda.

Hasuzumwe ibijyanye n’Imihigo y’uturere no kuyesa ndetse n’ishyirwa mu bikorwa ry’Icyerekezo 2020, cyane cyane ku birebana n’ubwiyongere bukabije bw’abaturage n’ingaruka zabwo ku bidukikije.

Ku ikubitiro mu Mushyikirano wabaye hagati ya tariki 27-28 Ukuboza 2007, uturere twa Nyagatare na Musanze twahembwe nk’uturere tubimburiye utundi mu kwesa imihigo, gahunda yatangijwe mu mwaka wa 2006.

Kuva icyo gihe uturere twatangiye kurushanwa mu gukorera neza abaturage biduhesha umwanya w’imbere.

Nkombo yakuwe mu bwigunge

Ikirwa cya Nkombo cyavanywe mu bwigunge, nkuko byagenwe n’umwanzuro wa 14 wafatiwe mu Nama y’Igihugu y’ Umushyikirano yabaye ku matariki ya 15 na 16 Ukuboza 2011, wasabaga ko hakorwa uburyo abatuye ku kirwa cya Nkombo bazajya bahahirana n’abaturanyi babo bo mu yindi mirenge no mu tundi turere tw’Igihugu.

Byaje gushyirwa mu bikorwa maze abatuye Nkombo bahabwa ubwato bwabavanye mu bwigunge, batangira kugenderanira n’ibice bitandukanye by’igihugu ndetse no muri uno mwaka Perezida Paul Kagame yabemereye ubundi bwato bakaba bamushimira ko yabavanye mu icuraburindi bahozemo byatumaga bibaza niba batuye mu Rwanda.

Amazina apfobya Abanyarwanda

Muri 2013 hafashwe umwanzuro wo guca amazina yapfobyaga Abanyarwanda, yifashishwaga mu byiciro by’ubudehe arimo abahanya, abadirigi n’abatindi nyakujya….

Muri uwo mwanzuro Minisiteri y’Ubutegetsi bw’Igihugu yasabwe gusuzuma neza ibyiciro by’Ubudehe abaturage barimo, buri wese agahabwa icyo akwiriye. Ibyiciro byaje kugirwa bine bivanwamo ya mazina yatumaga bamwe bahunga icyiciro kijyanye n’amikoro bafite kubera amazina bavugaga ko abapfobya.

Kuri uyu wa Kane tariki tariki 15 Ukuboza, hagiye gutangira indi nama y’Umushyikirano igiye kuba ku nshuro ya 14, na ho byitezwe ko hazafatirwamoindi myanzuro irebana n’ubuzima bw’Abanyarwanda.

Yitabirwa n’abagize Guverinoma, abagize Inteko Ishinga Amategeko, abahagarariye Abanyarwanda baba mu mahanga, abayobozi bo mu nzego z’ibanze, abanyamakuru, abahagarariye ibihugu byabo n’imiryango mpuzamahanga ndetse n’abandi Perezida wa Repubulika yatumira.

Ni igikorwa Abanyarwanda bakurikirana binyuze mu bitangazamakuru binyuranye, ndetse bakagira n’umwanya wo gutanga ibitekerezo bifashishije ubutumwa bugufi kuri telefoni cyangwa bagakoresha imbuga nkoranyambaga.

Perezida wa Sena, Bernard Makuza(Ibumoso), Perezida Kagame, Minisitiri w'Intebe, Anastase Murekezi na Perezida w'Urukiko rw'Ikirenga, Sam Rugege mu Nama y'Umushyikirano ya 13
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
damascenne 2016-12-19 23:02:48

no coment

2
Fred 2016-12-15 03:37:02

Badufashe bafate icyemezo cyuko imikoreshereze y’igishushanyo mbonera cy’umujyi (master plan) yanozwa ntawe ihutaje. kuko haraho umuturage atemererwa gukoresha ubutaka bwe busibaye kubera ko umuhanda uteganijwe uzafata kukibanza cye metero nke (1,2,..), kandi wenda uwo muhanda udateganijwe kubakwa mu gihe cya vuba

3
Kagabo 2016-12-14 11:27:44

Nudakura amaboko mumifuka ntuzarya. Uzahora imbaraga zogukora uzikoresha kuganya abandi bariho bigira.

4
Amina 2016-12-14 11:22:16

Jyewe ndifuzako byaba byiza inama nkiyo y umushyikirano y’a kwiga kuburyo buri campany yose yaba nibura ifite abantu bafite amashuri bize imyuga kuko mbona nubwo imyuga tuyiga ataritwe tuyikora ahubwo ikorwamo nababikora ntabumenyi kuko usanga amategeko y’ urwanda atareberera abafundi nkuko mubaganga bikorwamo nababyize No muri technique zose muhindure itegeko maze company zihe akazi a ababyize.gusa.

5
fkaaa 2016-12-14 06:15:41

ubu bazige uko badukiza inzara nubushomeri naho ibindi bizaze uburaha kko nibyo bibabaje kurusha ibindi

Kwamamaza