Impaka z’urudaca kuri Twitter ku ngingo ya 100 mu Itegeko Nshinga

25 8-12-2016 - saa 21:00, Deus Ntakirutimana

Abantu batandukanye bateye impaka kuri Twitter zishingiye ku ngingo ya 100 yo mu Itegeko Nshinga rya Repubulika y’u Rwanda ryo mu 2003 igena uko Perezida atorwa, bavuga ko uko ryavuguruwe mu 2015 bidahita bigaragaza uburyo atorwa.

Ingingo ya 100 mu Itegeko Nshinga ryo muri 2003 igira iti “Perezida wa Repubulika atorwa ku buryo butaziguye kandi mu ibanga. Uba Perezida ni uwarushije abandi amajwi.”

Igika cya kabiri cyo muri iyo ngingo yo mu Itegeko Nshinga ryavuguruwe muri 2015 cyo kigira iti “ Itegeko Ngenga rigenga amatora riteganya uburyo bwo gutanga kandidatire ku mwanya wa Perezida wa Repubulika, uko itora rikorwa, ibarura ry’amajwi, uburyo bwo gukemura impaka zivutse, gutangaza ibyavuye mu itora n’igihe ntarengwa cyo kubitangaza. Iryo tegeko ngenga riteganya n’ibindi bya ngombwa kugira ngo amatora atungane kandi akorwe mu mucyo.”

Impaka zishingiye kuba mu ryavuguruwe muri 2015 hadahita hagaragaramo uburyo perezida atorwa ziriwe zicicikana hagati y’abantu batandukanye ku mbuga nkoranyambaga nka Twitter na Whatsapp.

Mu byiciro bitandukanye by’abanyamakuru n’abakora akandi kazi harimo bamwe bavugaga ko iyo ngingo ya 100 yima abaturage uburenganzira bwo kwitorera Perezida wa Repubulika.

Uwitwa Bob Mugabe yavuze ko abantu batoye Itegeko Nshinga mu 2015 batoye ibinyuranye n’uburenganzira bwabo bwo kwihitiramo Perezida wa Repubulika.

Yakomeje avuga ko Itegeko Nshinga ririho rigena ko Perezida wa Repubulika adatorwa mu buryo buziguye.

Ambasaderi w’u Rwanda mu Bubiligi, Nduhungirehe Olivier yamusubije ko ubwo burenganzira bwo kwitorera Perezida wa Repubulika mu buryo butaziguye buhari, ndetse ko bwerekanwa n’Itegeko Nshinga mu gika cya kabiri no mu ngingo ya 80 y’Itegeko Ngenga rigenga amatora mu Rwanda.

Iyi ngingo igena uburyo itorwa rya Perezida wa Repubulika rikorwamo igira iti “Perezida wa Repubulika atorwa mu buryo butaziguye kandi mu ibanga. Itora rya Perezida wa Repubulika rikorwa hatorwa izina rimwe kandi mu cyiciro kimwe cy’itora, uwarushije abandi amajwi ni we uba Perezida wa Repubulika. Iyo aba mbere babiri banganyije amajwi, amatora asubirwamo kuri abo bakandida gusa mu gihe kitarenze ukwezi.”

Nduhungirehe yakomeje avuga ko Komisiyo y’Igihugu y’Amatora yemeza ko ibiri mu Itegeko Nshinga bisobanutse kandi ko abaturage batakumiriwe mu matora cyangwa ngo bamburwe uburenganzira bwabo bwo kwitorera umukuru w’Igihugu bumva ubabereye.

Mu kiganiro IGIHE yagiranye n’Umunyamabanga Nshingwabikirwa w’iyi komisiyo Munyaneza Charles yagaragaje agaciro iryo tegeko rigenga itora ryongerewe.

Ati“ Iyo ngingo ya 100 mu Itegeko Nshinga ivuga igihe itora ribera, ntabwo ivuga abatora Perezida, biratandukanye.Iryo tegeko ngenga rigenga itora rivugwa mu itegeko Nshinga rirahari ni ryo rigena uburyo amatora akorwamo.”
Munyaneza yakomeje avuga ko mu Itegeko Nshinga hatajyamo ibintu byose, ko hashyirwamo amahame (Principes) shingiro agena ibintu bitandukanye.

Ati “Si itegeko rigenga itora gusa,ubwo unagiye no mu bindi wasanga hari amategeko yandi agenda ateganywa n’iryo Tegeko Nshinga.”

Yakomeje avuga ko kuvugurura Itegeko Nshinga bitari ibya manda gusa harimo no kuryandika neza, no gushyiramo ibyangombwa bigomba kujyamo noneho ibindi bikajya mu mategeko cyangwa amategeko ngenga yihariye.

Ati “Itegeko Nshinga ntabwo ryajyamo buri kantu kose. Nta kuntu Itegeko Nshinga ryajyamo ngo amatora akorwa gutya, bigenda gutya, iryo ntabwo ryaba rikiri Itegeko Nshinga.”

“Itegeko ngenga riri hejuru, ubundi itegeko ry’amatora ryavugaga ko ari itegeko risanzwe, none ubu ejobundi Itegeko Nshinga rivuguruwe riteganya ko rya tegeko risanzwe ry’amatora riba itegeko ngenga ngo rigire uburemere bwaryo. Abarihinduye rikava ku itegeko risanzwe rikajya kuri ngenga ibyo byose byari byatekerejweho.”

Uko amategeko y’u Rwanda arutana habanza Itegeko Nshinga rigakurikirwa n’Itegeko Ngenga, hakaza irisanzwe n’amategeko teka ndetse n’amabwiriza atandukanye.

Mu mateka y’u Rwanda Perezida aba uwatowe n’abaturage benshi, mu gihe mu bihugu nka Afurika y’Epfo, abadepite bitoramo Perezida, naho ahandi akaba uw’ishyaka ryatsinze amatora y’Inteko Ishinga Amategeko.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3  

1
Marthe 2016-12-14 08:04:20

Uyu Bob Mugabe abanze yihugure abone ajye abona kuvuga...ni nde se wabuza Abanyarwanda kwitorera President wacu, en plus iki gihe dufite President usobanutse...Bob we byagucanze.....hahaaaaa 2017 iradutindiye ahubwo ngo twitorere Muzehe wacu....Arabidukundire ahubwo.....RDV 2017

2
Nkundurwanda 2016-12-11 04:58:42

Ariko nkubu inkuru irimo hano ni iyihe?icyo mbonyemo ni ukumenya Bob Mugabe gusa.nawe ufite analyse hafi ya ntazo.

3
Rudakanukirwa 2016-12-10 22:52:26

baritiranya amtora azoguye nataziguye! Aziguye abaturage ntibamutoraho.Ataziguziguye baramwitorera
bashaka iki?

4
Murekezi Omar 2016-12-09 11:30:35

Kuki nta kintu kigisohoka mu binyamakuru hatajemo Nduhungirehe? Ibi mbyibajije yuko mbona aza muri files zitanamureba nk’urupfu rwa Karegeya. urugendo rwa Padiri Nahimana, ibyo itegeko nshinga riteganyaku matora n’ibindi. Uku kwivanga no kwishyira imbere guishe iki?

5
ellah 2016-12-09 05:38:41

nkeneye kurisoma mwambwira uko naribona niba rinishyurwa nabwo nakwishyura kuko kuvuga ibyo ntari nsoma namakosa thx

6
Kanyange 2016-12-09 05:17:04

Ntabwo Ibyo uyu mugabo yavuze biduhesha agaciro. Ntabwo itegeko nshinga ryari rikwiye gufata abanyagihugu biyamamariza umwanya umwe kuburyo butandukanye. Mwaba mwari gihe amategeko hehe Na he. Hariya yagaragara ubusa n’ amanyanga rwose. Na biriya biseke bajyanye kuri parlement njye byanteraga ikimwaro kabisa. Amafaranga azakoreshwa mumatora nayo ni menshi cyane. Kandi twese tuzi Ko Ari jeux. Kuki atakoreshwa mu kurangiza ’’ Warwayeryari’’, hanyuma president ahakomeza imihigo ye?

7
ukuri 2016-12-09 04:20:20

egoko, barayomba kbsa kdi ngo uwambay ikirezi ntamenya KO cyera.
He. Paul kagame is the best kbsa ushaka massacre asubire muri 1994
twe twiyubakir urwanda rwunz ubumwe

8
Rwasamurera 2016-12-09 03:40:25

Abantu batekereza nk’uwiyita Bernard na Mugemana mbona mufite ikibazo kirenze mu mitwe. Ni Mugemana we, iyo udasoma ntunumva radio NGO nibura ubone ishusho rubanda rugufi twishimira uko twitaweho n’imiyoborere y’igihugu cyacu kirangajwe imbere na Kagame Paul Wacu!? Niba ari ubugome bukuzuye mu mutwe utureke the ababona ibyiza tuzabihitamo.
Nawe wiyise Bernard: ukwiye kuba urenze injiji zose zabayeho. Amb. Nduhungirehe Olivier usibye ko ari n’umuyobozi washyizweho na Perezida w’u Rwanda Paul Kagame, Nduhungirehe ni n’umunyarwanda nk’abandi kandi ago yatanga igitekerezo cye akwiye kugitanga nta mbogamizi. Ni ko ye, wigeze wumva ko hari atuzuza inshingano ze Ku buryo wakwirirwa usakuza ago gusa? Simuvugira ariko nzi ko ari umunyarwanda nk’abandi kandi mu mwanya muke abona ajye adufasha gusubiza inyangabirama zirirwa zihishe hirya no hino Ku Isi.

9
emma 2016-12-09 02:19:28

nkabo bigira ibitangaza ngo bavugira leta n’abayirimo.Gasana wahoze UN arihe sinumva ngo gutaha mu gihugu Nduhungirehe nawe Niko ashobora kuba ari.bashatse bajya baceceka.

10
gigi 2016-12-09 01:03:18

Iyi nkuru ntakiyirimo!
Murarangaza abantu gusa. Ufite amatsiko yasomye ingingo zavuzwe mu Itegekonshinga rivuguruye aho gusoma ibipfuye bimurangaza gusa!
Bob arabarangaza namwe mugatesha abantu umwanya gusa!!!

Paji: 1 | 2 | 3  

Kwamamaza