FPR Inkotanyi yatoye mu turere abazayihagararira mu matora y’abadepite

5 9-06-2018 - saa 18:33, Thamimu Hakizimana

Umuryango wa FPR Inkotanyi ukomeje gushakisha abakandida bazawuhagararira mu matora y’abadepite ateganyijwe muri Nzeri 2018, kuri uyu wa Gatandatu yabereye ku rwego rw’akarere.

Hamwe mu ho IGIHE yakurikiranye aya matora mu Mujyi wa Kigali, yabonye abakandida 20 baturutse mu mirenge bivuga ibigwi n’icyo bazakora baramutse batowe, nyuma abanyamuryango barenga 700 bahitamo bane bazazamuka ku rwego rw’akarere.

Abo bane barimo abagore babiri n’abagabo babiri batowe bazashyikirizwa umuryango ku rwego rw’igihugu, ukazemezamo urutonde ntakuka rw’abazawuhagararira mu matora rusange y’abadepite. Ibi ni nako byagiye bigenda no mu tundi turere mu ntara zose.

Mu batorewe muri Nyarugenge, barimo Barikana Eugène na Mukabagwiza Edda bari basanzwe ari abadepite, biyongereyeho Gafaranga Brigitte na Mucyo Lambert.

Mu Karere ka Rulindo ho mu cyiciro cy’abagabo hatowe Pasiteri Nzeyimana Jean Vedaste usanzwe ari Umunyamabanga Nshingwabikorwa w’Umurenge guhera mu 2006 ubu akaba ayobora Umurenge wa Mbogo, na Bikino Jean Marie Vianney usanzwe ari umukozi ushinzwe gusesengura inguzanyo muri BPR Part of Atlas Mara.

Mu cyiciro cy’abagore hatowe Akimpaye Christine usanzwe ari umuyobozi ushinzwe abakozi muri Minisiteri y’Impunzi no kurwanya Ibiza na Murebwayire Alphonsine usanzwe ari umwarimu kazi umaze imyaka 14 muri aka kazi.

Aba bose bijeje ko nibaramuka babashije gukomeza mu matora bakazasohoka ku rutonde rw’abadepite b’Umuryango FPR Inkotanyi, “bazashyira imbere kumvikanisha ibitekerezo by’abaturage kuko abadepite ari intumwa za rubanda”.

Mu Karere ka Huye abatowe ni Niyitegeka Finifrida, Ruhakana Albert, Murekatete Alphonsine na Birikumana Assoumani.

Kuri gahunda y’amatora y’abadepite, Komisiyo y’Igihugu y’Amatora yatangaje ko izatangira kwakira kandidatire ku wa 12- 25 Nyakanga 2018; kwiyamamaza bigatangira ku wa 13 Kanama kugeza ku wa 1 Nzeri 2018.

Amatora ateganyijwe ku wa 2 Nzeri 2018 ku banyarwanda batuye muri Diaspora naho abari imbere mu gihugu bazazindukira mu matora ku wa 3 Nzeri 2018.

Muri manda y’imyaka itanu ishize Umuryango wa FPR Inkotanyi wari uhagarariwe mu Nteko Ishinga Amategeko n’abadepite 31 mu ntebe 53 zihatanirwa n’imitwe ya politiki.

Inteko Ishinga Amategeko, Umutwe w’Abadepite, ugizwe n’imyanya 80 ariko ihatanirwa n’imitwe ya politiki ni 53, indi 24 igenewe abagore, ibiri igenewe urubyiruko, undi usigaye ukajyamo uhagarariye abafite ubumuga.

Uretse abiyamamaza banyuze ku iturufu y’imitwe ya politiki, abigenga bemererwa kwiyamamaza. Basabwa kugira nibura amajwi 5% kugira ngo babone intebe mu nteko ariko muri manda iri kugana ku musozo nta n’umwe wabashije kuyabona.

Itegeko rigenga amatora rivuga ko ushobora gutorerwa umwanya w’ubudepite ari Umunyarwanda wese wujuje nibura imyaka 21 y’amavuko, w’inyangamugayo, utarazitiwe n’imwe mu nzitizi ziteganywa mu ngingo ya 11 n’iya 49.

Ingingo ya 11 y’ Itegeko rigenga amatora ivuga ko utemerewe kwiyandikisha ku ilisiti y’itora ari uwambuwe n’inkiko zibifitiye ububasha uburenganzira bwo gutora akaba atarahanagurwaho ubwo busembwa cyangwa ngo ahabwe imbabazi zemewe n’amategeko.

Undi ni uwakatiwe burundu kubera icyaha cy’ubwicanyi n’ubuhotozi; uwakatiwe burundu kubera icyaha cya jenoside cyangwa ibyaha byibasiye inyokomuntu mu rwego rwa mbere n’urwa kabiri nk’uko biteganywa mu ngingo ya 76 y’itegeko ngenga n° 16/2004 ryo ku wa 16/6/2004 rigena imiterere, ububasha n’imikorere by’Inkiko Gacaca zishinzwe gukurikirana no gucira imanza abakoze ibyaha bya jenoside n’ibindi byibasiye inyokomuntu byakozwe hagati y’itariki ya mbere Ukwakira 1990 n’iya 31 Ukuboza 1994.

Uwireze akiyemerera icyaha cya jenoside cyangwa ibyaha byibasiye inyokomuntu bimushyira mu rwego rwa mbere; uwahamwe n’icyaha cyo gusambanya abana; uwahamwe n’icyaha cyo gusambanya ku gahato; umuntu ufunze ndetse n’impunzi.

Na ho ingingo ya 49 ivuga ko umuntu wamburwa mu buryo budahoraho uburenganzira bwo gutora no gutorwa ari ufunzwe by’agateganyo hubahirizwa amategeko y’imiburanishirize y’imanza nshinjabyaha; ufunzwe mu rwego rw’irangizagihano; umuntu ufite uburwayi bwo mu mutwe cyangwa ushobora guhungabanya umudendezo w’abaturage.

Abanyamuryango ba FPR Inkotanyi barenga 700 muri Nyarugenge bitabiriye igikorwa cyo gutora abazavamo abazayihagararira mu matora y'abadepite
Abakandida bane batorewe mu Karere ka Nyarugenge
Abanyamuryango ba FPR Inkotanyi muri Gasabo
Abayobozi ba FPR Inkontanyi muri Gasabo
Uduseke twashyirwagamo amajwi

Amafoto yaranze ibikorwa by’amatora mu Karere ka Rulindo

Mu bikorwa byo kubara amajwi
Sina Gerard, umwe mu banyamuryango ba FPR Inkotanyi
Umwe mu bari basanzwe mu Nteko Ishinga Amategeko hamwe n'Umuyobozi w'Akarere ka Rulindo, Kayiranga Emmanuel

Abatowe mu Karere ka Huye

Murekatete Alphonsine nawe ari mu bakandida bazahagararira Akarere ka Huye
Niyitegeka Finifrida yatowe n'amajwi 620
Ruhakana Albert nawe ari mu bakandida batanzwe n'abanyamuryango ba FPR Inkotanyi mu Karere ka Huye

Amafoto na Video: Cyuzuzo Rodrigue

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
kariza 2018-07-13 04:40:43

ni byiza pee ariko Barikana nye mbona yagombaga guhindurirwa imirimo kuba depite wapi ntabwo ari shapu kabisa

2
Rwiza 2018-06-11 06:09:22

Imana ihe umugisha ishyaka dukunda ryacu RPF. ikintu nakunze nukuntu abari basanzwemo batabaye benshi bongeye gutorwa ibi n’ibintu byiza cyane. Ariko abo muzahitamo kujya mu nteko muzashishoze.nka Nyarugenge rwose harimo ikibazo GAFARANGA Brigitte rwose afite amatiku menshi.muzashishoze mubaze amateka ye aho yigisha i Mburabuturo muyahoze yitwa SFB nibo bazabaha details zose.

3
Lionne 2018-06-11 03:34:56

Mu Ngororero habaye iki se?

4
John 2018-06-09 22:36:36

Mwaramutse banyamuryango.
Twishimiye aho byagenze neza, ariko tunenga aho byagenze nabi kuko bigayisha umuryango Wacu dukunda. Ibyabaye mu NGORORERO ni "agahomamunywa". Cyakora turasaba inzego zibishinzwe kubikurikirana kuko birababaje.

5
Kalinamaryo 2018-06-09 16:32:28

Ufite azongererwa

Kwamamaza