Akarere ka Gasabo kagiye kubaka Umudugudu w’icyitegererezo wa miliyari 2,5 Frw

6 7-12-2016 - saa 20:13, Emma-Marie Umurerwa

Mu cyerekezo cy’u Rwanda cyo gutuza abaturage hafi y’aho babasha kubona ibikorwaremezo by’ibanze, Akarere ka Gasabo kagiye kubaka inzu 1441 zizaturwamo n’abo mu byiciro bitandukanye mu Mudugudu wa Rudakabukirwa mu Murenge wa Gikomero.

Uyu mudugudu uzatuzwamo abahoze mu manegeka, abacitse ku icumu rya jenoside yakorewe Abatutsi batishoboye, abo mu cyiciro cya mbere cy’ubudehe n’abandi bafite ubushobozi bwo kwiyubakira inzu zijyanye n’igishushanyo mbonera.

Ku buso bwa hegitari 81 niho hagiye kubakwa uyu mudugudu, mu Kagari ka Munini ahazatuzwa imiryango 144 za miliyari 2,5.

Nk’uko ubuyobozi bw’Akarere ka Gasabo bubitangaza, uzaba wuzuye neza mu mpera z’umwaka wa 2018, ariko ko ku ikubitiro hagiye kubakwa inzu enye zifatanye zifite agaciro ka miliyoni 35.

Usibye inzu zo guturamo hazubakwa n’ibyumba by’amashuri, igikumba cyo kororeramo, ibibuga by’imyidagaduro, ibigega bifata amazi y’imvura n’ibindi bikorwa remezo bitandukanye.

Kuri uyu wa 7 Ukuboza 2016 ubwo hatangizwaga igikorwa cyo kubaka uyu mudugudu, umuyobozi w’Akarere ka Gasabo, Rwamurangwa Stephen, yavuze ko abatisshoboye bazazihabwa ku buntu naho abishoboye baziyubakira ariko bakubahiriza igishushanyombonera.

Yagize ati “Abaturage bazagaragaza ko bafite ubushobozi bwo kwiyubakira bagomba kuzubahiriza ibijyanye n’igishushanyo mbonera muri uyu mudugudu. Uzagaragaza ko afite ubushobozi hari n’igihe tutazamusaba ikiguzi cy’ikibanza.”

Umunyamabanga wa Leta ushinzwe iterambere ry’abaturage muri Minisiteri y’Ubutegetsi bw’Igihugu, Vincent Munyeshyaka, yavuze ko uyu mudugudu atari uw’abatishoboye.

Yagize ati “Turasaba abaturage bishoboye bo muri uyu Murenge ndetse no mu Mirenge ituranye n’uyu kugirango baze hano bahabwe ibibanza ariko bubake inzu zujuje ibikenewe. Uyu si umudugudu w’abatishoboye ni umudugudu w’abantu bose.”

Leta y’u Rwanda muri gahunda yayo y’icyerekezo 2020 hateganyijwe ko ingo 70% zizaba zibarirwa mu mudugudu mu mwaka wa 2018. Akaba ari muri urwo rwego muri buri Karere hari kubakwa imidugudu ibiri y’icyitegererezo. Mu Karere ka Gasabo izubakwa mu Murenge wa Gikomero no mu wa Bumbogo.

Abayobozi bashyize ibuye ry'ifatizo ahazubakwa Umudugudu w'icyitegererezo
Abayobozi basobanurirwa uburyo uyu mudugudu uzaba wubatse
Abyobozi ku rwego rw'akarere ka Gasabo na Minaloc batangije igikorwa cyo kubaka umudugudu w'icyitegererezo mu Murenge wa Gikomero

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
[email protected] 2016-12-08 22:38:11

Iyi gahunda ninziza arikose ko bavuze ko gahunda arukubaka bajya hejuru babihinduye gute kuburyo zigiye gutwara ubutaka bungana gutya 81 nonese Kuki batatweretse igishushanyo mbonera cyayo mazu akindi bavuze ko umuntu ufite ubushobozi bwokwiyubacyira batazamugurisha ikibanza ntago basobanuye impamvu kubera iki atagura ikibanza nandi afite ubushobazi twebwe dufite make guhera kuri miriyoni eshatu tukajyayo tukava mubukode murakoze

2
Mambobado 2016-12-08 01:04:22

Ubu se harabura iki ngo abanyakigali baciriritse natwe baduhe aho dushobora kwiyubakira inzu za miliyoni eshanu kugeza ku icumi? Si uko habuze. Babishyiramo amananiza ngo dukodeshe amazu y’abanyabubasha, kandi ibiciro byabo tudashobora kubyigondera. Ugasanga dutuye mu manegeka, na bo amazu yabo atari make agahoraho ibyapa byanditseho ngo "House for rent/ Maison àlouer/ Inzu ikodeshwa".

3
bimawuwa 2016-12-07 13:23:09

Igishushanyo kiri hehe kugirango turebe uyo mudugudu uzatwara ako kayabo kose FRW .

4
Masobona 2016-12-07 12:58:45

Ubwo buri nzu izatwara 1,734,906 FRW. Muzite ikindi ibyo kuba icyitegererezo byo ntabyo mbona.

Kwamamaza