Abakandida b’Abadepite bashyiriweho imipaka batagomba kurenga mu kwiyamamaza

2 8-08-2018 - saa 20:52, Mathias Hitimana

Nyuma yo kwemeza abakandida 521 bazahatanira kwinjira mu Nteko Ishinga Amategeko, Komisiyo y’Igihugu y’Amatora (NEC) yahuye nabo, ibabwira kuzubahiriza amabwiriza agenga kwiyamamaza, bakirinda gusebanya n’amacakubiri.

Kuri uyu wa Gatatu, Perezida w’iyi Komisiyo, Prof Kalisa Mbanda, yahuye n’abahagararaiye imitwe ya poltiki yatanze abakandida; abakandida bigenga; abakandida b’abagore n’ab’urubyiruko, abibutsa imyitwarire igomba kubaranga mu gihe cyo kwiyamamaza kizatangira ku wa 13 Kanama kikageza ku wa 1 Nzeri 2017.

Yagize ati “Kubahiriza umuco nyarwanda ushaka ko icyo dukora cyose tugikora mu rukundo rw’igihugu. Ni ukuvuga ko ibyo dukora byose bikwiriye kugenda bishyira hamwe byubaka igihugu cyacu”.

Yakomeje agira ati “Twibukiranya ko kwiyamamaza ari ukwivuga ibigwi, ni ukwivuga ubushobozi ntabwo ari ukuvuga icyo undi adashoboye, ntabwo ari ukuvuga icyo undi atabasha gukorera u Rwanda, ni ukuvuga ko dukwiriye kwiyamamaza twitaka uko dushaka atabasha tukiyamaza tudasebanya, tukiyamamaza tudatera imvururu, tukiyamaza tudatera amacakubiri mu banyarwanda.”

Ku byerekeye uburyo abakandida bazifashisha, amabwiriza ya komisiyo y’amatora agena ko umukandida ashobora gukoresha amatangazo amanitse, ibitambaro byanditseho, gutanga amabaruwa cyangwa inyandiko zigenewe abantu benshi, iteraniro, inama mbwirwaruhame cyangwa ikiganiro, itangazamakuru rikoresha inyandiko, amajwi cyangwa amajwi n’amashusho, ikoranabuhanga mu itumanaho, ihererekanyamakuru n’ubundi buryo bwose butanyuranyije n’amategeko.

Abakandida babujijwe gushyira ibyapa ku mashuri, amavuriro, ku biti by’amashanyarazi. Hamwe mu ho babujijwe Prof. Mbanda yabwiye itangazamakuru ko bigamije kurengera abahakoresha.

Yagize ati “Hari ahantu haba haragenewe izindi ntego; nko mu mashuri ni aho abana bigira, bakeneye amahoro kugira ngo bige, hari ibitaro, insengero, ni ibintu biba byaragenewe izindi gahunda abantu bashaka gukora politiki batagomba kwivangamo kugira abantu babone amahoro y’ibyo bakora.”

Komisiyo y’amatora ifite inshingano zo gukora ku buryo abakandida ku giti cyabo, imitwe ya politiki n’amashyirahamwe y’imitwe ya politiki biri mu ihiganwa, bihabwa uburenganzira bungana bwo gukoresha itangazamakuru rya Leta.

Abakandida bitabiriye inama ya NEC, bagaragaza ko basobanukiwe n’imipaka batagomba kurenga mu gihe gikomeye abanyagihugu baba bategereje abakandida.

Umwe mu bakandida bigenga, Salim Elissam Ntibanyendera, yabwiye IGIHE ko hari byinshi atari azi neza yungukiye muri iyi nama birimo nk’ahantu hemewe ho kumanika ibyapa.

Ati” Bimwe nari mbizi ari ko hari ibyo nungukiye hano; nko kumanika ibyapa ntabwo nari nzi ko ku nsengero bibujijwe batubwiye n’impamvu. Nko kwa muganga batubwiye ko abantu baba baje kwivuza kandi koko ni byo. Batwemereye kumanika nko ku mazu ya leta, ku mazu y’abantu bwite wabisabye, ku mazu yacu bwite, aho hantu hose abantu ushaka kubona wababona nta kibazo.”

Amabwiriza ya NEC abuza abakandida biyamamaza gukoresha umutungo wa Leta aho waba uri hose, mu buryo bunyuranyije n’amategeko; gutuka cyangwa gusebya undi mukandida, mu buryo ubwo ari bwo bwose; gutanga impano, ruswa cyangwa kwakira ruswa; gushingira ku bwoko, ku isano-muzi, ku karere, ku idini no ku bundi buryo bwose bushingiye ku ivangura n’amacakubiri;

Ibindi bibujijwe ni ugukora cyangwa kuvuga icyahungabanya amahoro, ubumwe n’umutekano rusange by’Abanyarwanda; kwiyamamaza mu gihe kitagenwe n’amategeko n’amabwiriza agenga amatora; guca, kwangiza, gusibanganya ifoto y’undi mukandida n’ikindi cyose kimwamamaza; kwiyamamariza ahantu hatamenyeshejwe ubuyobozi nk’uko biteganywa n’amategeko n’amabwiriza; guhamagarira abaturage gukora igikorwa icyo ari cyo cyose n’imyifatire yose byatuma amatora atagenda neza.

Prof. Mbanda yibukije ko Itegeko Ngenga rigenga amatora hari ibihano biteganyirizwa uwarenga ku mabwiriza y’amatora.

Ingingo ya 173 y’iryo tegeko ngenga ivuga ko umuntu wese umanika amafoto, inyandiko cyangwa ukorera inama ahatabigenewe, aba akoze icyaha. Iyo abihamijwe n’urukiko, ahanishwa igihano cy’ihazabu y’amafaranga y’u Rwanda atari munsi ya 100,000 FRW ariko atarenze 300,000 FRW.

Umuntu wese utubahiriza ibindi biteganywa n’itegeko ngenga ku bijyanye no kwiyamamaza, ahanishwa igifungo kitari munsi y’umwaka umwe ariko kitarenze imyaka ibiri n’ihazabu y’amafaranga y’u Rwanda atari munsi ya miliyoni imwe ariko atarenze miliyoni ebyiri cyangwa kimwe gusa muri ibyo bihano.

Abakandida batanzwe n’imitwe ya politiki hemewe 302 barimo aba FPR-Inkotanyi n’imitwe bifatanyije, aba PL, PSD, Green Party na PS-Imberakuri. Mu byiciro byihariye, abakandida b’urubyiruko ni 26; ab’abafite ubumuga ni 10 naho abahatanira guhagararira abagore ni 179.

Perezida wa Komisiyo y'igihugu y'amatora, Prof Kalisa Mbanda avuga ko uzarenga amabwiriza agenga ukwiyamamaza azabihanirwa
Umwe mu bakandida bigenga, Salim Elissam Ntibanyendera yishimiye ibiganiro bahawe na NEC
Bamwe mu bakandida bitabiriye ibiganiro na NEC
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
kukj 2018-08-09 07:36:21

nibyo koko perezida avuze ibiribyo umuturage arataka niyoyabamokurenga akabura umuyobozihafi bigate kugera munkiko hanyu ma kavugako begereye abatura bagashaka akamenyetso gato ngifoto cyagwa yogentera ku, igare cya moto agakoshereza inama mugasa ntere kumugi umuturage urimucyaro ndabimenye kandi mucyaro inkangu ziriguteranya abaturage nabana barwaye bwaki cyakwa kutabaryanakwiga baragira amatunko

2
lg 2018-08-09 01:05:53

ubwo baraje kwiyamamaza nibirangira bicare.bati umusoro wubutaka winzu tuwukube incuro icumi kuko utowe, ahita yibagirwa uko umuturage abaye ho nyamara bakibagirwa ayo binjizaga.mbere yo kuba bo! nuwari mwarimu biba birangiye hehe ni giturage, nuko babaye ho "izo ntumwa za rubanda! !rubanda bavugira bazongera kubabona amatora ageze! ! winjiye milioni ku kwezi wamenya ute ko hari utinjiza na bitanu !aliko agomba gusora uko byagenda kose ngo umushahara uboneke!!

Kwamamaza