Umuhanzi uri mu bazamukanye ingoga mu ruhando rw’umuziki w’indirimbo zihimbaza Imana, Sinzabyibagirwa Jean de Dieu [Jado Sinza], yateguye igitaramo azanamurikiramo album ye ya mbere nyuma y’amezi agera kuri 11 atangiye ivugabutumwa rinyuze mu ndirimbo.

Jado Sinza azwi cyane mu ndirimbo ‘Nabaho’ ari nayo yitiriye album ye ya mbere y’amajwi izaba igizwe n’indirimbo icyenda zirimo iyitwa ’Golgotha’, ’Wagize neza’ n’izindi.

Iki gitaramo kizabera ku Gisozi kuri Dove Hotel Kigali, ku ya 5 Ugushyingo 2017 kuva saa cyenda z’umugoroba, aho kucyinjiramo bizaba ari ubuntu.

Uyu musore w’imyaka 22 yatangiye kuririmba akiri muto; ahera muri Korali y’Ishuri ryo ku Cyumweru yitwa ‘Gift Choir’, kuri ubu ni umuririmbyi wa Siloamu yo muri ADEPR Kumukenke ndetse anabarizwa mu itsinda rya New Melody ribumbiye hamwe abaturuka mu madini n’amatorero atandukanye.

Jado Sinza, izina rimaze kumenywa na benshi by’umwihariko abihebeye umuziki w’indirimbo zihimbaza Imana, yateguye igitaramo yise ‘Nabaho Live Concert’, aho azaba amurika album ye ya mbere.

Mu kiganiro yagiranye na IGIHE, Sinzabyibagirwa Jean de Dieu, yatangaje ko ari mu bihe byo kwegerana n’Imana ngo igitaramo cye kizagende neza.

Yagize ati “Ndi mu myiteguro ya nyuma y’igitaramo haba mu gusubiramo indirimbo ndetse no gukomeza gusengera igikorwa. Ndabona bigenda neza ku buryo umunsi w’igitaramo uzagera byose biri ku murongo. Ndi gusenga Imana uko nshoboye kugira ngo Izigaragaze kuri uriya munsi kuko ni igikorwa kiri ku mutima wanjye.”

Sinzabyibagirwa Jean de Dieu uzwi nka Sinza yatangiye kuririmba akiri muto

Jado Sinza watangiye urugendo rwo kuririmba ku giti cye muri uyu mwaka yashimangiye ko kumurika album ari inzozi yagize kuva mu buto bwe.

Yagize ati “Ibi ni ibintu byari bindi ku mutima mbimaranye igihe kirekire. Natangiye uyu mwaka mbitekerezaho mu buryo bwagutse ariko muri rusange igitekerezo nakigize kuva kera. Nari nihaye intego ko uyu mwaka uzarangira muritse album yanjye kandi nizeye ko Imana igiye gusohoza umugambi wayo.”

Muri iki gitaramo, Jado Sinza azaba agaragiwe n’Umuramyi Bosco Nshuti uzwi mu ndirimbo ‘Ibyo Ntunze’; Korali Silowamu ndetse na New Melody, aba bombi babarizwamo; mu gihe ijambo ry’Imana rizigishwa na Pasiteri Claude Rudasingwa.

Jado Sinza yarangije amashuri yisumbuye muri Computer Electronic, arateganya no gukomeza gushaka ubumenyi bwisumbuyeho mu bijyanye n’umuziki.

Jado Sinza yamenyekanye cyane mu ndirimbo 'Nabaho' yanitiriye album ye
New Melody yatumiwe muri iki gitaramo cyiswe 'Nabaho Live Concert'
Jado Sinza azafatanya na Nshuti Bosco (uwa kabiri uturutse ibumoso) baririmbana muri Korali Siloamu
Umuhanzi Jado Sinza azahurira na Nshuti Bosco, New Melody na Korali Siloamu mu gitaramo azamurikamo album ye yise ‘Nabaho’

Reba hano indirimbo ‘Nabaho’, Jado Sinza yitiriye album ye

Amafoto: Niyonzima Moïse


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved