IGIHE

Korali Rehoboth yakunzwe muri “Ntiyaryama Twashira” yateguye igitaramo izamurikiramo album nshya

1 21-06-2019 - saa 15:07, Muvunyi Arsène

Korali Rehoboth ikorera umurimo w’Imana mu Itorero rya ADEPR yateguye igitaramo gikomeye yise “Akira ishimwe” gifite intego yo gushima Imana kubera imirimo n’ibitangaza yakoze mu myaka 20 imaze ibayeho.

Rehoboth ni korali yamenyekanye cyane mu ndirimbo yitwa “Ntiyaryama Twashira”, yakundaga gucurangwa cyane muri gahunda y’indirimbo zasabwe kuri Radio Rwanda.

Umwaka wa 2019, ni uwa 20 iyi korali imaze iri mu muziki wo guhimbaza Imana. Mu kwizihiza iyi ntambwe yateye, yateguye igitaramo yise “Akira ishimwe.”

Iki gitaramo kizabera kuri ADEPR Rukiri ya Kabiri ahazwi nka Rehoboth kuri Good Year (Godiyari) mu Mujyi wa Kigali, ku Cyumweru tariki 23 Kamena 2019.

Cyatumiwemo abahanzi batandukanye barimo umuryamyi wanditse ibigwi Simon Kabera n’umunyempano Nsabimana Gisèle Precious uri mu bazamukanye ingoga mu Itorero rya ADEPR.

Abazacyitabira bazagaburirwa ijambo ry’Imana na Rev. Pasteur Masumbuko Josué.

Umuyobozi wa Korali Rehoboth, Niyitegeka Antoine, yabwiye IGIHE ko iki giterane kizahurirana no kumurika album yayo ya kane y’amashusho yiswe ‘‘Akira Amashimwe.”

Yagize ati “Ni umwanya mwiza wo gutaramana n’abantu bose bafite amashimwe y’ibyo Imana yabakoreye.’’

Akira Ishimwe Live Concert izatangira saa munani z’amanywa kugeza saa moya z’umugoroba, kuyinjiramo ni ubuntu.

Korali Rehoboth yashyize ahagaragara album yayo ya mbere mu 2000 “Ntiyaryama twashira”, ari nayo yatumye imenyekana cyane; iya kabiri yagiye ahabona mu 2003 yitwa “Ubwiza bw’Imana”, iya gatatu yo mu 2010 yitwa “Isezerano Ntirisaza.”

Reba hano indirimbo “Ntiyaryama twashira” ya Rehoboth yo muri ADEPR

Umunyempano Nsabimana Gisèle Precious ari mu bahanzi batumiwe muri iki gitaramo
Rev. Pasteur Masumbuko Josué ni uzigisha ijambo ry'Imana
Korali Rehoboth yakunzwe muri “Ntiyaryama Twashira” yateguye igitaramo izamurikiramo album nshya
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Eliel 2019-07-15 22:31:00

Imana ibashyigikire

Kwamamaza