IGIHE

#Kwibuka25: Korali Ukuboko kw’Iburyo yasohoye indirimbo ivuga ku mbabazi zihoraho

6 9-04-2019 - saa 20:10, Ishimwe Israel

Korali Ukuboko kw’Iburyo ikorera umurimo w’ivugabutumwa rinyuze mu ndirimbo muri Paruwase ya ADEPR Gatenga yashyize ahabona indirimbo ‘‘Umunyembabazi’’ ifite ubutumwa bushimangira ko Imana itanga imbabazi ku bayicumuyeho.

Indirimbo ‘Umunyembabazi’ yagiye hanze mu gihe Abanyarwanda n’Isi bifatanyije mu bikorwa byo kwibuka ku nshuro ya 25 Jenoside yakorewe Abatutsi mu 1994, yahitanye abarenga miliyoni.

Kuva Jenoside ihagaritswe na FPR Inkotanyi, amahanga atangazwa n’iterambere igihugu cyagezeho ariko by’umwihariko urugendo rw’ubumwe n’ubwiyunge n’ubutwari bw’abiciwe babariye ababahekuye, bakabasiga ari ba nyakamwe.

Korali Ukuboko kw’Iburyo yakoze mu nganzo ihanga indirimbo ‘Umunyembabazi’ ivuga ko Imana ari inyebambe yirengagiza ibyaha ku bayiciriye bugufi.

Perezida wa Korali Ukuboko kw’Iburyo, Kwizera Seth, yabwiye IGIHE ko iyi ndirimbo ishimangira ko Abanyarwanda bakwiye kuzirikana ko bafitanye isano ikomeye y’ibibahuza kurusha ibibatanya.

Yagize ati “Abanyarwanda ntitwitwaye neza ndetse urukundo rwatubuzemo kugera ubwo habaye Jenoside yakorewe Abatutsi. Imana yacu yo igira ibambe yatubabarira ikaduha guhuza no kubaka igihugu mu bumwe. Abanyarwanda twite kubiduhuza, tubungabunge urukundo twacu. Ubumwe bwacu buturange.’’

Yavuze ko ubutumwa bashatse gutanga ari ubushishikariza abakoze Jenoside kwemera gusaba imbabazi abo biciye.

Yavuze ko “Iyi ndirimbo ahanini igamije kwigisha abantu umuco wo gusaba imbabazi. Ni ugukangurira abagize uruhare muri Jenoside kwemera icyaha no kwihana kuko ari kimwe mu byubaka ubumwe bwacu. Irakangurira abantu kwita ku biduhuza tukarenga ibidutanya amahoro akagwira mu Banyarwanda.’’

Kwizera avuga ko amakorali n’abahanzi bakwiye gutegura indirimbo zihumuriza abantu mu minsi yo kwibuka abazize Jenoside yakorewe Abatutsi.

Buri mwaka Korali Ukuboko kw’Iburyo yifatanya n’Itorero rya ADEPR Gatenga mu bikorwa byo gufasha no kuremera abacitse ku icumu batishoboye birimo kububakira.

Muri ibi bikorwa ku wa 12 Mata 2019 hateganyijwe umuhango wo kwibuka abazize Jenoside yakorewe Abatutsi basengeraga kuri ADEPR Gatenga, barimo n’abaririmbyi bayo batandatu bayiguyemo.

Korali Ukuboko kw’Iburyo yatangiye umurimo w’Imana mu 1989 ari iy’Abana b’Ishuri ryo ku Cyumweru. Mu 1998 yatangiye kwihimbira indirimbo, inahabwa izina n’ubuyobozi bw’itorero rya ADEPR Gatenga yitwa Ukuboko kw’Iburyo (rifite igisobanuro muri Zaburi 118:15-17).

Igizwe n’abaririmbyi 120 n’itsinda ry’inshuti zayo rihuriwemo n’abantu barenga 5000 bari mu bihugu bitandukanye.

Iyi korali yamenyekanye mu ndirimbo zirimo ‘Ikidendezi’, ‘Ibyiringiro by’ubuzima’, ‘Imitima yacu’, ‘Kulo’ n’izindi. Imaze kumurika album ebyiri ndetse iritegura gutangaza iya gatatu yitwa ‘Ikidendezi’.

Reba hano indirimbo “Umunyembabazi” ya Korali Ukuboko kw’Iburyo yo muri ADEPR Gatenga

Mu butumwa buyirimo, abaririmbyi basaba Abanyarwanda gukundana nk'uko Yesu yakunze abari mu Isi
Korali Ukuboko kw'Iburyo ikorera ivugabutumwa muri ADEPR Gatenga
Korali Ukuboko kw'Iburyo yasohoye amashusho y'indirimbo irimo ubutumwa busaba Imana imbabazi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Murebwayire Anne 2019-04-11 03:33:03

Murakoze nukuri kubwiyi ndirimbo, Nubwo nubundi musanzwe mutugezaho ibihangano byiza, ariko nakurikiranye amagambo ari muri iyi ndirimbo rwose ndabashimiye kandi Imana mukerera ntikiranirwa ngo yibagirwe imirimo, izabahemba rero. Abanyarwanda mureke turebe ku biduhuza turwanye ibidutanya nkuko Korali ukuboko kwiburyo yabiririmbye. Ndumva mpise nkumbura mu Gatenga pe.

2
Peter 2019-04-10 14:57:28

kolar ukuboko kwibury turayikunda ikomerezaho umurimo wayo wogusakaza ivugabutumw yesu abongelere umugisha murakoz

3
Manzi Johnson 2019-04-10 08:38:10

Korali Ukuboko kw’iburyo Imana nibahe imigisha myinshi kandi ikomeze kubagura nukuri. Mutanze umusanzu mwiza mukubaka igihugu cyacu cy’u Rwanda. Kandi iyi ndirimbo yanyu irimo mesage nziza pe. Nayumviseeeee mbese yewe Imana izabijyanire mu ijuru pe.

4
Bosco Amani 2019-04-10 02:45:27

Mbega indirimbo irimo inama nziza weee: Tubane duhuje satani abure inzira....Nukuri amahoro y’Imana nagwire muri twe pe. Be blessed Choir.

5
John 2019-04-10 01:03:54

Indirimbo nziza pe

6
Kalisa 2019-04-10 01:02:26

Yooo, Korali Ukuboko kw’iburyo, Imana ibahe umugisha mwinshi kubw’iyi ndirimbo.

Nibyo koko icyo dupfana kiruta icyo dupfa.

Kwamamaza