IGIHE

Itariki yo gutangira Igisibo gitagatifu cy’ukwezi kwa Ramadhan yamenyekanye

1 5-05-2019 - saa 13:08, IGIHE

Ubuyobozi bukuru bw’Umuryango w’Abayisilamu mu Rwanda (RMC) bwatangaje ko igisibo cy’ukwezi kwa Ramadhan kizatangira ku wa Mbere, tariki ya 6 Gicurasi 2019.

Ni ubutumwa bukubiye mu itangazo ryo ku wa 3 Gicurasi 2019, ryashyizweho umukono na Mufti w’u Rwanda, Sheikh Hitimana Salim.

Rigira riti “Ubuyobozi bwa RMC bunejejwe no kumenyesha Abayisilamu bose n’Abanyarwanda muri rusange ko igisibo gitagatifu cy’ukwezi kwa Rmadhan kizatangira ku wa 6/5/2019.’’

Igisibo ni rimwe mu mahame atanu y’Idini ya Islam. Risaba abayoboke baryo kwigomwa amafunguro n’ibinyobwa mu bihe bisanzwe, kwirinda imibonano mpuzabitsina n’abo bashakanye n’ibindi bijyanye no kwishimisha. Gusa bemerewe gufata ifunguro izuba rirenze no mu rukerera.

Gusiba si ukureka ibyo kurya no kunywa gusa ahubwo ni no kwirinda amagambo yo gusebanya, gutongana, kubeshya n’ibindi byaha.

Muri iki gihe Abayisilamu bagira umwanya uhagije wo kwegera Imana, bakanoza imibanire yabo na yo; banahurira mu bikorwa by’urukundo nko gufasha abakene, gusura abarwayi n’ibindi.

Itangazo ryashyizwe ahabona na RMC rikomeza rivuga ko “Ubuyobozi bukuru buboneyeho umwanya wo kwifuriza Abayisilamu ku buryo bw’umwihariko kuzagira igisibo cyiza cyuje umugisha.’’

Ramadhan ni ukwezi kwa cyenda ku ngengaminsi ya Islam. Igitabo gitagatifu Islam ikoresha cya Korowani cyagaragajwe muri uku kwezi.

Itegeko ryo gusiba Allah yarishimangiye muri Korowani ntagatifu 2:183, Intumwa Muhamadi nayo yabishimangiye mu mvugo yayo igira ati “Idini ya Islam yubatse ku nkingi eshanu muri zo harimo ukwezi kwa Ramadhan.”

Abagore batwite n’abonsa ntibasiba ahubwo bishyura iyo minsi iyo ibyo bikemutse; abageze mu zabukuru n’abarwayi bafata imiti buri munsi, na bo batanga icyiru, aho bagaburira umukene buri munsi mu gisibo.

Igisibo gitagatifu cya Ramadhan kimara ukwezi, gisozwa Isi yose yizihiza Umunsi Mukuru wa Eid al-Fitr.

Muri ibyo birori by’umwaka ushize, Mufti w’u Rwanda, Sheikh Hitimana Salim yahamagariye abayoboke ba Islam kugira uruhare mu kurwanya ibiyobyabwenge biri mu bibazo bihangayishikije urubyiruko.

Abayisilamu bo mu Rwanda no mu bindi bice by'Isi baratangira Igisibo gitagatifu cya Ramadhan ku wa 6 Gicurasi 2019. Iyi foto yafashwe na Muhizi Serge ku wa 15 Kamena 2018, ubwo hizihizwaga Umunsi Mukuru wa Eid al-Fitr, kuri Stade ya Kigali i Nyamirambo
RMC yifurije Abayisilamu bo mu Rwanda gutangira neza Igisibo gitagatifu cya Ramadhan
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
gahirima 2019-05-05 12:40:25

Ntabwo ari Abaslamu gusa bagira Igisibo.N’andi madini menshi arakigira.Gusa ntitukitiranye Igisibo no kuba umuntu wumvira Imana nyakuri.Urugero,nubwo Abafarisayo bakoraga Igisibo,ntabwo byabujije Yesu kubita ko bakomoka kuli Satani.Impamvu nuko,nubwo bakoraga igisibo,byari imihango gusa.Ntibyababuzaga gukora ibintu bibi.N’uyu munsi nuko.Urugero,abantu bali ku rugamba barwana,nabo bizihiza Igisibo na Ramazani,ndetse bagasenga.Imana ikunda gusa abantu bakora ibyo idusaba,bakirinda ibyo itubuza.Abo nibo bonyine bazabona ubuzima bw’iteka.Igisibo ni umuhango gusa.

Kwamamaza