IGIHE

Ibidasanzwe mu “Butayu” aho abarokore bahererwa amasezerano y’ibizababaho

15 1-05-2019 - saa 13:07, Umutoni Rosine

Iterambere ririhuta hirya no hino ku Isi kandi bikaba mu nguni zose z’ubuzima. Ntiryasize amadini kuko ryadukiriye uburyo abantu basengaga, aho basengeraga, uburyo basengagamo n’ibindi bigenda bijyanishwa n’ibihe tugezemo.

Gusenga si ibyo guteranira hamwe ku cyumweru cyangwa kubikora ugiye kurya no kuryama ahubwo ni igikorwa kiba buri uko ugikeneye agishatse kandi akagikorera aho ashatse.

Nubwo Bibiliya ivuga ko n’imitima ari insengero, kuri ubu abanyamasengesho bavumvuye ahandi, ntibasiba mu mashyamba y’inzitane, mu buvumo, mu masumo n’ibihanamanga [ahazwi nko mu Butayu] aho bizera ko amasengesho yabo azasubizwa bwangu.

Ubutayu bwabaye ubuhungiro n’uburuhukiro bw’abakirisitu bizera ko iyo nzira ibaganisha ku gusubizwa ibibazo bigoye ubuzima bwabo.

Mu Rwanda hari amadini n’amatorero agera ku 2000 amaze kwandikwa no kwemererwa gukorera mu gihugu. Uko arushaho kwiyongera ni ko n’uburyo bwadutse bw’imisengere n’aho kwiyambariza Imana hatari mu nsengero hiyongera.

Mu myaka 20 ishize nibwo abakirisitu badukanye uburyo bwo gusengera hanze y’insengero bizwi nko mu Butayu. Ni ahantu rimwe na rimwe hashobora gushyira ubuzima bwabo mu kaga nubwo bidaca intege ababikora.

Inyamaswa z’inkazi mu ndiba z’ubuvumo bwo mu butayu

Umukirisitu ubara ijoro yaraye yabwiye IGIHE ko mu myaka 10 ishize yagiye gusengera mu buvumo buri mu Karere ka Nyarugenge, ahazwi nka “Mont Kigali” hahoze hacukurwa amabuye y’agaciro.

Ubwo buvumo bufite metero ziri hagati ya 300 na 500, ubugiyemo yinjira yunamye kugeza igihe azabuviramo.

Mu buhamya bwe yavuze ko ‘Ubwo buvumo bufite ibyumba bitandukanye ku buryo uyoboye abandi aba azi icyo bagomba kwinjiramo n’ikitinjirwamo kubera inyamaswa z’inkazi zirimo inzoka n’ingwe nabonye n’amaso yanjye ihacaracara.’’

Yakomeje ati “Mu butayu, hari abahamara iminsi iri hagati y’itatu n’irindwi batarya, batanywa batunzwe n’amasengesho, indirimbo ziherekezwa n’ibinyuguri, ingoma netse n’amashyi, ubundi bagacinya akadiho bigatinda batitaye ku nzara n’umwuma ufata benshi.’’

Inzira igana mu buvumo bwa Mont Kigali aho abarokore biyambariza Uwiteka

Ubutayu, indiri y’ibirura byihisha mu bana b’intama

Amasengesho yo mu Butayu yakunze kwikomwa na benshi kubera ibibuberamo cyane bishingiye ku buhanuzi bw’ubukorano, abajura bitwikira Bibiliya n’abayikoresha basambanya abagore n’abakobwa.

Mu mashyamba ari ku misozi yo mu Karere ka Ruhango, ahazwi nka Kanyarira, Nyabyugi, Kayenzi, Gisanga, Bangukuntabare ni hamwe mu hari ubutayu abantu bakunze gusengeramo.

Nubwo baba bajyanywe no gusenga, ntihatana no kubera ibikorwa bitandukanye bigaragaza ugutandukira ku gikorwa cy’ibanze cyo gusenga ari nacyo kiba cyabajyanye ahubwo bakumvikana mu busambanyi, ubujura, n’ibindi.

Urugero rwa hafi ni aho mu Butayu buri mu Murenge wa Bweramana, abakobwa bagiye batakira ubuyobozi ko bahafatiwe ku ngufu, abandi bakibwa.

Ibi byatumye tariki ya 7 Ukuboza 2018, ubuyobozi bw’Akarere ka Ruhango busohora itangazo ribuza abantu gusengera mu butayu.

Kubaza Imana ahazaza, kimwe mu bituma abantu bajya gusengera mu “Butayu”

Umuhanuzi Yeremiya mu gitabo cye 29:11 yaranditse ngo ‘Erega nzi ibyo nibwira nzabagirira! Ni amahoro si bibi, kugira ngo mbareme umutima w’ibyo muzabona hanyuma.’

Iri jambo ry’ihumure riri mu akoreshwa n’abakirisitu ndetse benshi bakomeza gushyira imbaraga mu gushaka abahanuzi ba none ngo bamenye icyo Uwiteka avuga ku buzima bwabo bw’ahazaza.

IGIHE yegereye abantu batandukanye ishaka kumenya impamvu ituma bagana ubutayu mu masengesho, aho benshi bahurira ku kubaza ibizababaho.

Umukirisitu wo mu Itorero rya ADEPR Gasave, Mutesa Fabien, yagize ati “Si buri mukirisitu ufata inzira ngo ajye gusengera mu butayu. Hajyayo umuntu ufite ibibazo cyangwa ibigeragezo bimuremereye. Nkanjye njyayo ngiye kubaza Imana ejo hazaza, ngiye kuyisenga no kuyisaba ngo incire inzira.”

Nikuze Devota usengera muri Eglise Vivante we yagize ati “Ubutayu njyamo ni ubwa Kanyarira hariya i Muhanga. Iyo ngiyeyo mba mfite ibyifuzo bitandukanye ngiye gusengera ariko kandi mpakundira ko haba hariyo abahanuzi batandukanye bampanurira nkamenya uko ejo hazaza hanjye hifashe.”

Amasezerano atangirwa mu butayu yibazwaho

Abakurikira ubuhanuzi bwo mu minsi ya none, si ubwa mbere bumvise ngo ‘Imana irakuzamuye, irakubakiye, iguhaye amafaranga, ubonye visa yo kujya muri Amerika.’

Aya ni amwe mu masezerano atangwa n’abahanuzi b’ubu barimo n’abo mu Butayu.

Ibihabera ntibisanzwe! Usanga abantu bavuga mu ndimi zitandukanye, ababyeyi bahetse abagabo, bitaba ibyo abagabo bakikorera abagore.

Abakoresha imbuga nkoranyambaga babonye amashusho yatangajwe, agaragaza umugore uri mu kigero cy’imyaka 35, abangatana umugabo w’ibiro nka 80, akamuhanurira ko agiye kuba umutunzi.

Yumvikana avuga mu ijwi rirenga ati “Kuko ndi Uwiteka ndakubwiye ngo mwana wanjye akira amafaranga kandi ndakubwiye ngo uzagaburira n’imfubyi, uzagaburira abashonje kuko ndi Uwiteka. Ndi Imana iri kumwe nawe ndagusinyiye […] ndi Imana iguhaye ubwenge, bamwe bakwita igicucu kubera ko utakigendana na bo, mbagucishijemo kandi ucyeye […] mparuye umuhanda nta mahwa awurimo ndi Imana igutambukije.”

Ubutayu bwahitanye bamwe

Mu kubungabunga umutekano w’abagana mu butayu nyuma y’amakuru y’abahaguye, abahibiwe n’abahasambanyirijwe, Leta yashyizeho ingamba zo gukumira abahasengera.

Ku wa 19 Werurwe 2016, Mukamuyango Dancille w’imyaka 48 wari utuye ku Kimironko mu Karere ka Gasabo, yaguye ku musozi w’amasengesho wa Kanyarira aho yari yagiye gusengera.

Yakurikiye umupolisikazi na we wahasize ubuzima yagiye kuhasengera muri Nyakanga 2015.

Muri Nzeri ya 2016 kandi Inama y’umutekano y’Umurenge wa Gisenyi yahuriyemo abayobozi b’Umurenge, abahagarariye abigenga n’abagize inzego z’umutekano, yanzuye ihagarikwa ry’amasengesho ya nijoro yaberaga ku musozi wa Rubavu hikangwa ko ashobora kuba icyanzu cy’abahungabanya umutekano mu Mujyi cyane ko umugizi wa nabi ashobora kwivanga mu banyamasengesho agasohoza umugambi we.

ADEPR yahaye abayoboke bayo umurongo

Abakirisitu bo mu Itorero ADEPR ni bamwe mu bitabira gusengera mu butayu ku bwinshi.

Umuvugizi wa ADEPR, Rev. Pasiteri Karuranga Ephrem, yabwiye IGIHE ko itorero ryasabye abayoboke kwirinda gusengera ahantu hashyira ubuzima bwabo mu kaga.

Ati “Gusengera mu butayu ni ikibazo kimaze iminsi kigoranye kandi twebwe twabitanzeho umurongo. Igihugu cyacu ntikibuza abantu gusenga, twasabye abakirisitu bacu ko aho bagiye gusengera bagomba kubimenyesha ubuyobozi bw’inzego z’ibanze na Polisi. Hari ubutayu abantu basengeramo buzwi, ariko nanone ntawe ugomba kujyayo atabimenyesheje ubuyobozi.”

Yakomeje avuga ko abazajya gusengera ahantu hatazwi bagahurirayo n’ibibazo bazabyirengera kuko ahantu hagenewe gusengerwa kandi hadashyira ubuzima bw’abantu mu kaga hazwi.

Amatorero amwe n’amwe afite ubutayu buzwi kandi butunganyije arimo Evangelical Restoration Church iyoborwa na Apôtre Ndagijimana Joshua Masasu.

Ubutayu bwaryo buherereye i Masoro hafi y’ahitwa kuri 15, bisaba ikiguzi cya 500 Frw ku muntu ushaka kubwinjiramo.

Ubutayu bwo kwa Masasu kubwinjiramo umuntu yishyura amafaranga 500 Frw
Ifoto yafatiwe i Kanyarira ubwo abanyamasengesho biyambazaga Uwiteka
Abarokore bari kumanuka ku musozi wa Kanyarira berekeza aho bise Kizabonwa bajya gusenga
Aha ni mu Karere ka Gicumbi ahari isumo y'amazi aho abarokore batandukanye bajya gusengeramo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
pajo 2019-05-14 15:35:51

aba niba ADEPR nibo bagira bene iyi mwyumvire iri hasi

2
king 2019-05-04 03:42:39

Nta mu kristu usobanukiweko Imana ibera hose icyarimwe kandi ishobora byose wajya bene aho hantu,keretse bamwe bishwe n’ubujiji. muzabigenzure murebe.

3
jose umugwaneza 2019-05-03 21:47:48

ariko se mwaretse gusebya abajya kwishakirimana koko.ubutayu buraryoha umuntu akurayo byinshi kdi Imana iba irikumwe nabsjyayo pee.
kuko ngo (uyishakana umwete niwe uzayibona)

4
Alpha 2019-05-03 04:22:10

lmana iravugango nibababwira gwarimubuvumo ntimuzajyeyo5 cg gwari mubutayu ntimuzabyemere cg gwari mumazi gokuko beshibazaza biyita izinaryage babayobya

5
Ben 2019-05-02 17:53:06

Ariya Mubutayu rero hakunze kugya Abakene,Abasambanyu , nabantu baba nyabwenge kugira ngo bishingire Amadini biyomore kuba pasitoro babo babone Amafaranga ubundi injiji zabagore bazirongorere murayo mhyamba.

6
linca 2019-05-01 23:29:14

Ariko mwagiye muba abanyamakuru b’umwuga koko iyi nkuru ntacyo yungura abanyarwanda , kandi umuntu wese afite uburenganzira bwo gusengera aho ashaka, ko hari bamwe bajya muri za picnic se kunywa amayoga na amatabi, igihe ntimukajye mwivanga mubintu bya abantu basenga kuko ntimuzapfa mubisobanukiwe.

7
Karangwa 2019-05-01 14:16:00

Amen,amen

8
@@@@ 2019-05-01 13:45:02

Nge mbona atari ngombwa gushyira ubuzima bwawe mu kaga ngo uri gusenga,aho wigemurira ingwe n’ibirura,no mu bihonomanga aho numvise numvise umwe yibaranguye ku bitare mpaka mu kabande.Ubundi tubwirwa ko Imana iba hose.Ushobora no gupfukama mu cyumba cyawe mu mutuzo usesuye,ukaganira n’Imana yawe,ukayigezaho ibyifuzo byawe,wabikora n’umutima umenetse nk’uko babivuga,Ikakumva kandi igihe cyagera Ikagusubiza.Ikibazo nge mbona gikomeye gihari,nuko tubeshya Imana.Yatwumva ite????

9
@@@@ 2019-05-01 13:42:48

Nge mbona atari ngombwa gushyira ubuzima bwawe mu kaga ngo uri gusenga,aho wigemurira ingwe n’ibirura,no mu bihonomanga aho numvise numvise umwe yibaranguye ku bitare mpaka mu kabande.Ubundi tubwirwa ko Imana iba hose.Ushobora no gupfukama mu cyumba cyawe mu mutuzo usesuye,ukaganira n’Imana yawe,ukayigezaho ibyifuzo byawe,wabikora n’umutima umenetse nk’uko babivuga,Ikakumva kandi igihe cyagera Ikagusubiza.Ikibazo nge mbona gikomeye gihari,nuko tubeshya Imana.Yatwumva ite????

10
Natus 2019-05-01 13:41:25

Nawe byagucanze wayimanuka ukayizamuka ntawe ugusunitse nimwivugire ibyanyu.. Hariya ni ahabantu bafite ibindi bisazi mwe mushyira munyurabwenge mukabiburira inyito,namwe byababaho,kandi bibabayeho nibwo mwatanga ubusobanuro bw’ibi mubona..aho kwiyahuza inzoga ,itabi cg ibindi,nakwiyahuza amasengesho.

Paji: 1 | 2  

Kwamamaza