IGIHE

Arsene Tuyi yahurije Masasu n’umugore we mu gitaramo azamurikiramo album nshya

2 8-06-2019 - saa 13:14, Ishimwe Israel

Umuhanzi Tuyiringire Arsène [Tuyi] ukorera ivugabutumwa ry’indirimbo mu Itorero rya Evangelical Restoration Church (ERC) agiye gukora igitaramo gikomeye azamurikiramo album ye ya kabiri yise ‘Icyaremwe gishya.’

Iki gitaramo ngarukamwaka cyiswe “PENTECOST HYMN” giteganyijwe kubera kuri ERC Masoro ku wa 9 Kamena 2019, ubwo abakirisitu bazaba bizihiza Pantekote, umunsi ufatwa nk’uwo umwuka wera yamanukiyeho.

Cyatumiwemo Umuyobozi wa ERC mu Rwanda, Apôtre Ndagijimana Yoshua Masasu n’umugore we Pasiteri Lydia Masasu. Kwinjira muri icyo gitaramo kizatangira saa kumi z’umugoroba ni ubuntu.

Ni ku nshuro ya kabiri Tuyi yateguye igitaramo gihanitse nyuma y’icyo yakoze mu 2018 ubwo yamurikaga album ye ya mbere yise ‘Umujyi w’Amashimwe’.

Arsène Tuyi ni umuhanzi ukora umurimo wo kuramya no guhimbaza Imana muri Shekinah Worship Team umaze kubaka ibirindiro mu muziki waririmbiwe Uwiteka.

Muri “PENTECOST HYMN” azafatanya n’abandi baramyi barimo Patient Bizimana, Serge Iyamuremye, Christian Irimbere, Sam Rwibasira ndetse n’amatsinda yo kuramya ya True Promises, Shekinah Worship Team ya Paruwasi ya Masoro na Shining Stars.

Kuri iyi nshuro gifite umwihariko kuko kizayoborwa n’Umuyobozi wa Evangelical Restoration Church mu Rwanda, Apôtre Ndagijimana Yoshua Masasu afatanyije n’umugore we Pasiteri Lydia Masasu.

Arsène Tuyi yabwiye IGIHE ko muri iki gitaramo azaba afata amashusho ya album ateganya kumurika.

Yakomeje agira ati “Igikuru ni uko buri munsi uba ufite ubuntu bwayo Imana yawugeneye kandi iby’Imana bihora bitubera bishya. Muzaze mwiteguye guhura n’Imana, gusabana na Mwuka Wera no guhabwa umugisha n’Uwiteka.’’

Icyaremwe gishya ni album izaba igizwe n’indirimbo zirindwi zirimo ‘Yaratsinze’, ‘Waramutse Rwanda’ yakoranye na Israel Mbonyi, ‘Bye Bye Dry Season’, ‘Naranyuzwe’, ‘Twigijwe hafi n’amaraso’, ‘Imboni y’umuraba’ yafatanyije na Christian Irimbere na ‘Icyaremwe Gishya’.

Arsène Tuyi yabyirutse ari umuririmbyi muri korali y’abana yo muri ADEPR. Nyuma yaje kuyoboka Itorero ry’Isanamitima muri Paruwasi ubu yitwa iya Masoro ari naho akibarizwa.

Yabaye muri Shining Stars na Shekinah Worship Team ndetse ari mu batangije itsinda ryiswe Salvation Proclaimers ryateguraga ibitaramo byo kuramya no guhimbaza Imana.

Izina rya Arsène Tuyi ryatumbagiye cyane mu 2016 ubwo yahabwaga igihembo cya Groove Awards Rwanda nk’umuhanzi mushya w’umwaka mu ruhando rw’abaririmba indirimbo zo kuramya no guhimbaza Imana bakoze cyane.

Arsène Tuyi ari mu bahanzi bakunzwe cyane mu muziki uhimbaza Imana
Apôtre Masasu n'umugore we Pasiteri Lydia Masasu ni bo bazayobora igitaramo
Arsène Tuyi agiye kumurika album nshya mu gitaramo yatumiyemo Masasu n'umugore we
Imyambaro izakoreshwa n'abazitabira igitaramo yamaze gutegurwa kare
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Me too 2019-06-08 10:19:44

Go, go, go, Tuyi. Uwiteka ari kumwe nawe wa munyembaraga we...... Keep on proclaiming salvation up to the ends of the earth.

2
Am Akuru 2019-06-08 09:56:35

Kizabera he?

Kwamamaza