IGIHE

Hagati yo kuzajya mu ijuru n’ubuzima bwiza mu isi, ni iki gituma abantu basenga?

9 14-08-2019 - saa 11:30, Sekamana Mathias

Muri iyi minsi abantu bajya mu nsengero bariyongereye.Umubare w’insengero nawo ukomeza kwiyongera.Ukuri ni uko nubwo abantu bahurira mu nsengero, impamvu zituma basenga zo zitandukanye.

Kuba hari insengero no kuba ziyongera wenda si bibi kuko insengero zituma abantu bagira imyitwarire myiza, bigatuma hari umubare munini w’ibyaha bidakorwa mu gihugu. Ibi utekereje neza wabyumava nubwo bitavuze ko nta byaha bikorwa n’abo mu nsengero.

Hari abasenga ku buryo ari cyo kintu baba bakora kurusha ibindi byose mu buzima, ari nkako kazi ka buri munsi.

Benshi bazamuka imisozi,bakinjira mu manga kuko bizeye ko Imana iri bubumve kurushaho ikanabakemurira ibibazo.

Bibiliya, igitabo gitagatifu cyangwa cyera kiyobora abemera Yezu kristu nk’umwami n’umukiza kivuga ko hano ku isi atari iwabo w’abantu.

Iyo bagisobanura wumva kivuga ko abantu bagomba kubaho barangamiye ubuzima bw’ahazaza kurusha ubwo mu isi kuko gakondo yabo ari iyo mu ijuru.

Mbere y’umwaduko w’abazungu mu Rwanda, abantu basengaga bya Kinyarwanda (guterekera) , bakagira imyemerere, bagahiga imihigo ku Mana bakanatanga amaturo nk’uko bigenda mu nsengero z’uyu munsi.

Imigenzo ikorwa mu nsengero, harimo isa nk’imigenzo n’imihango y’abanyarwanda bo hambere.

Abantu bakuru bamwe bemeza ko kubandwa no guterekera ari byo byashyizwe mo ubusilimu biba gusenga.

Uwitwa Ntahobavukira Sipiriyani wo mu karere ka Ruhango mu murenge wa Ntongwe yabwiye IGIHE ati “Navutse mu 1945. Iwacu twarabandwaga tugaterekera.Twahiguraga Imihigo ku mana zeze, ibyo twasabye tukabibona bimwe na bimwe.Ibyo gusenga bije rero mu kiliziya, nabonye ntaho bitaniye cyane.Ni nko kugenda n’ipikipiki undi akagenda n’imodoka.Mwese muba mujya hamwe.”

Aho bijya gutandukanira ni uko abanyarwanda bo hambere batajyaga bizera umuzuko nyuma yo gupfa, ahubwo bizeraga imbaraga z’abakurambere babo bapfuye, ariko mu nsengero za gikirisitu ho bizera abakurambere b’abanyayisiraheli nubwo mwaba mudafitanye isano.

Mu nsengero zo muri iyi minsi hari igice kimwe cyizerera mu buzima bwa nyuma y’urupfu, hakaba n’ikindi gice cy’abantu basenga bashaka impinduka mu buzima bwa hano ku isi.

Aba bavuga ko basenga kugira ngo Imana ibahindurire ubuzima ku isi bube bwiza mu gihe bakiri ho.

Benshi muri aba ntibakunda gutekereza ikizaba nyuma yo gupfa kuko bizera ko iyo umuntu arangije ibye ku isi, ibindi ngo nta wamenya uko bigenda.

Impamvu ni uko nta wigeze apfa ngo agaruke ababwire koko niba ubuzima bwiza baburiye ku isi bazabubona mu ijuru.

Bamwe mubo twaganiriye ntibashatse ko twandika amazina yabo ariko twifashishije ibitekerezo by’abantu 10, basengera mu nsengero zitandukanye, batubwiye impamvu zitandukanye zituma abantu bajya gusenga.

Uwa mbere twise Ingabire utuye ku Kimisagara yagize ati “Reba nawe, niba koko Imana tujya gusenga buri munsi iba yumva, kuki ikureka ugaca mu bikomeye byenda no kuguturitsa umutima? Ngo kugira ngo irebe ko wihangana? Nonese iba iyobewe uko kwihangana kwawe kungana siyo iba yarakuremye?”

Yakomeje agira ati “Umubyeyi hano ku isi akora ibishoboka byose ngo abone umwana we afite buri kimwe ashaka, kuki Imana batwigisha ko igira urukundo rurenze urw’abantu, ishobora byose kandi idukunda itureka tukababarira mu isi kandi izi byose tunyuramo? Ngo tuzajye mu ijuru? Njye mba nshaka impinduka mu buzima bwo ku isi.Mu ijuru ibyaho simbizi, niyo mpamvu umushumba wigishije iby’ubwami bw’ijuru murambirwa ako kanya, ariko uvuga kuba ho neza, kubona ibyo twifuza namwumva kugeza ejo.”

Undi mukobwa twise Tina yagize ati “Njyewe nsengera i Gikondo.Njya gusenga buri gihe.Ndatura nkanakora umurimo mu rusengero.Maze imyaka itanu ariko ibyo nasengeye byose Imana nta na kimwe yasubije kandi bampanurira ibyiza gusa buri munsi.Ubanza baba bashaka ko nzahora ngaruka.”

“Narihanganye, ndakiranuka imyaka ibiri yose mbona ubuzima burushije ho kuba bubi, mpita mo kujya ndyamana n’abagabo mu ibanga,bamwe ari n’abo mu rusengero iwacu, nkabona amafaranga yo kubaho na mama wanjye, nkomeza no kujya gusenga.Nsaba impinduka mu buzima ndimo.Ijuru ntacyo narivugaho.”

Ndabasanze Dominique wo mu karere ka Nyaruguru we ati “Iyo mba nsenga nshaka iby’isi mba narabiretse kuko nubwo buri munsi nsengera ubuzima ngo buhinduke,bugenda burushaho gukomera.Icyo nshaka ni ijuru.Nsanze nta riba ho naba mpombye ubuzima bwose”

Uwambaje Sarah atuye i Kigali we yumva ko Imana wasenga ntihindure ubuzima bwawe hano ku isi, n’ijuru nta cyakwemeza ko izariguha.

Ati” Niba usaba Imana ikintu kitagejeje kuri miliyoni ntikiguhe, ubwo yaguha ijuru gute kandi ngo ari umunezero w’iteka? Aho ngiye gusengera simbone impinduka mu buzima mpita mpava.Imana itavuga ntinakore iyo si Imana.”

Murwanashyaka Théogene asengera muri ADEPR.Yatubwiye ko iby’isi nta kintu bimubwiye, anyuzwe n’uko abaye ho.

“Uko mbaye ho biranyuze.N’ibyo mfite byose niyo byashira ariko Imana ikazampa ijuru ntacyo naba mpombye.”

Byiringiro David, ni umusore w’imyaka 26.Yavukiye mu muryango w’abagatulika i Butare mu Ntara y’Amajyepfo.

Yavuze ko gusenga akibikora ariko atabiha umwanya munini nyuma yo kubona ko kubyinjiramo cyane bituma abandi bamusiga mu iterambere.

Ati “Nyuma yo kubona abasore tungana bansiga mu iterambere kandi batandusha gukora cyane, batanasenga, ubu gusenga sinkibigira intambara.Nsenga mbyutse, ngiye kurya no kuryama kandi Imana ikampa imigisha.Naba njya mu rusengero gujora iki ubwo?Gutura se?”

Byukusenge Emelyne we yagize ati “Njyewe ndi umuhamya ko mu rusengero hatanga amahoro.Niyo iryo juru ryaba ritabaho, ntewe ishema no kuba nararetse kuba Slay queen, ubu nkaba mpora mu rusengero.Byibuze byatumye mpindura imyitwarire.Niyo mpamvu njya gusenga.”

Mugurira Pheneas w’imyaka 55, atuye i Nyamirambo ku Kivugiza, akaba asengera muri Kiliziya Gatolika.Yemeza ko gusenga bitanga amahoro, bikanatuma abantu bakwizera.

Ati “Iyo usenga abantu barakwizera cyane.N’abadasenga bakugirira icyizere.Niyo mpamvu nsenga. Ijuru simbizi mbyemera uko gusa nanjye kuva kera. Icyo ntemera ni ukuba umunebwe ugasenga gusa ntukore akazi ngo Imana izakubesha ho cyangwa ngo izaguha ijuru, gute se kandi Imana ikunda abantu bakora?”

Ibi ni ibitekerezo by’abantu. Hari uko nawe ubizi, hari igituma ujya gusenga cyangwa utajya ujya guterana ugasengera iwawe cyangwa mu mutima, cyangwa se ukaba utajya usenga.

Nta muntu numwe ukwiye gucira undi urubanza ngo arasenga cyangwa ntasenga kuko uburere bwiza bubuza abantu gucira abandi imanza, ndetse n’ibyanditswe byera bikabuza abemera guca imanza kugira ngo nabo batazazicirwa.

Ese wowe ubyumva gute?Usenga ushaka impinduka mu buzima bwo mu isi cyangwa usenga ushaka kuzaragwa ubuzima bw’iteka mu ijuru?

Hari abasenga ku buryo ari cyo kintu baba bakora kurusha ibindi byose mu buzima, ari nkako kazi ka buri munsi.
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Alice 2019-08-20 10:07:02

Njye nsenga kuko nziko Imana iriho kandi nyigomba icyubahiro, amashimwe n’ibindi. Ijuru naryo nditegeranije ibiganza byombi. Igihembo cyo guhomba biriya byose bitunezeza tugakurikira Yesu cyaba ari ikihe se? Heaven is reel and God’s blessings are there. If we pray for heaven, God will give us accordingly and trust me serving God is a guarantee to even live well in this earth. Maybe not today, but probably tomorrow or another day. We ought to serve God faithfully and wait for His word.

2
Mutagatifu 2019-08-16 01:52:38

Dusenga (kuvugisha Imana no kumugenera umwanya(igihe) wacu yaduhaye) kuko ari Data, Inkomoko yacu (Njye nawe) kuko tuzi ko atwumva aho tuba tuvugira. Dushima, tuvuga ineza ye, urukundo rwe, imbaraga ze n’icyubahiro cye. Tumwereka kandi ibitameze neza cg ibitubabaje, tukavuga tuti’’ nubana natwe ntacyo tuzabura mu bidukwiye. Hanyuma tugakurikiza ibyo yategetse n’inama yatugiriye( byose byanditse muri Bibiliya). Icyo gihe tuba tubaye abana, Imana nayo ikaba ibaye Data (uturengera), tukaba turazwe ibyasezeranyijwe byose. NGUKO gusenga. Iby’ijuru cg ibindi si ibyacu. Uwiteka azi ibizakurikiraho byose mu butware bwe. Kuki twamuhitiramo cg tukamutegeka? Na Yesu yavuze ko bizwi na Data wenyine gusa.

3
Emmanuel 2019-08-15 03:51:51

Jye nsaba Imana ngo impe ubuzima bwiza no kuramba kuri iyi si ahasigaye nkabana neza nabandi naho iby’ijuru narijya ntarijyamo simbitindaho, cyane cyane ko iyo usomye Bible mw’Isezerano ryakera usanga ijuru ritavugwaho cyane bitaga kubyo kuri iy’isi ahubwo wakosa Imana Ikaguha igihano n’ubundi cyo kuri iy’isi!

4
Bosco 2019-08-15 02:05:06

Ibyo aribyo byose gusenga ningombwa kugirango tugire ingeso nziza ryaba ijuru kubizera ko rihari ndetse n’ubutunzi burangwamo amahoro byose uko ari bibiri ubutunzi n’ijuru inzira nziza yo kubigeraho n’ugusenga Imana .Uko waba uri kose gusenga ningombwa.

5
Jean 2019-08-15 01:40:29

Abasengera kugirango batungishwe iby’isi barambababaje. Ntabwo kujya gusenga ari igishoro uha Imana kugirango ikwishyure gutunga no gukira. Bene izo nyigisho ni iza ba Rugagi n’abandi nkabo n’abigize abahanuzi abenshi ari abanyabinyoma bifashisha ibibazo abantu bafite bakabizeza ibisubizo bihambaye by’imyifurize yabo, abameze batyo bashidikanyisha abantu Imana kandi abakurikiye uretse no kubihomberamo nari mu gihombo cy’iteka. Hari ibintu 2 abantu bakwiye gutandukanya. Kugira idini (ariho hava gusenga) no Kwizera ubuhamya n’inyigisho z"ibyanditswe byera binyuze muri Yesu Kristo (aha ndavuga ku bakristo). Muri uko kwizera habamo icyo bita "kuvuka ubwa kabiri" abavutse ubwa kabiri kubwo kwizera bagera kw’ihishurirwa ry’ubumana bakanasogongera kumunezero w’igihe kizaza (Abaheburayo 6:4-5). Ntabwo baba bakigengwa n’irari rya kamere muntu ubundi riba rigambiriye guhazwa n’iby’isi no kwiyumvisha ko kugera ku munezero ari ukugira ubukire hano kw’isi. Ariko abizera Kristo bahishuriwe ibanga ry’Imana n’ubwiza bw’igihe kizaza bo niyo wabaha iby’isi itunze byose ntibanyurwa nabyo kuko bazi neza aho bava n’aho bajya n’ubwiza bubategereje. Abo rero ntibashidikanya inzira barimo, kuko barayizi. Ntinyura kandi mw’idini cyangwa itorero rikomeye, cyangwa irimaze igihe kirekire cyangwa ikigufi.inyura gusa mu kwizera no my guhishurirwa guturuka mu busabane abizera bagirana n’Imana binyuze muri Kristo. Abavuga ko ibyo ari iby’Abisraheri abandi bakabyita iby’abazungu cyangwa abakoloni babiterwa nuko baba bashakisha ibisubizo by’irari rya kamere muntu mu nzira yo kubaha Imana. Abo rero ntibahishuriwe ahubwo bafite idini , bitiranya amatorero n’amadini duteraniramo n’itorero rya Kristo. Abisiraheri nabo cyangwa abazungu siko bose bizera cyangwa bizeye Yesu Kristo cyangwa Uwiteka Imana, nabo barimo abatemera n’abakerensa iby’Imana nk’uko no mu birabura cyangwa hano iwacu bimeze. Ariko Imana ifite intore zayo mu moko yose no mu bice byose by’isi kandi mu bihe byose byabayeho cyangwa ibizabaho. Abashaka kumenya ibyo gutoranya kw’Imana bazasome kandi bige neza inkuru ya Yohana umubatiza mu gitabo cya Luka igice cya 1-3 uvuka nu muryango w’abatambyi bari babayeho mu bukire no mu cyubahiro ariko we yabayeho ubuzima bushaririye kubw’umuhamagaro we. Hanyuma Yesu yamuvuzeho ko mu babyawe n’abagore ntawe uruta Yohana. Na Yesu yabwiye abamukurikira ko ubugingo bw’umuntu butava mu bwinshi bw’ubutunzi afite. ibi bikaba ikinyuranyo cy’ibyo Satani yizeza abantu ashingiye kuri rya rari rya kamere ko azaguha ubukire n’icyubahiro cy’iby’isi n’umuyoboka (Matayo4:8-9). Ubwo rero buri wese ni amahitamo. Ushaka iby’isi azabibona n’ushaka iby’ijuru nawe azabibona. Gusa kubashaka iby’isi bo icyo nababwira ntibazigera banyurwa na rimwe habe no kugera ku munezero wuzuye, na none kandi n’uwatunze byinshi ntanakimwe azarenza urupfu bizasigarana abandi agende wenyine uko yake. Nagirango nibutse abantu kandi ko amatorero n’amadini tubona agabanijemo ibice 3:ashingwa ashingiye kw’ihushurirwa ry’abahamagawe n’Imana. Aya kenshi agira abayoboke bake ntashingira cyane kubinezeza umubiri. Ashingwa ashingiye kuguhanga imirimo (projects), agira abayoboke benshi ninayo aba yiganjemo abantu bashidikanya, batazi n’ibyo bakurikiye. Ariko kubera imishinga iyarimo, inyigisho zizeza gutunga n’amaraha, kuyoborwa n’abantu b’ibyamamare kurusha uwo bavuga ko bakorera no kuba mu bintu bigezweho mu buzima bwa none bayabamo bitwa ibyo bataribyo abayashinze babagurisha mu buriganya imigambi yabo kugirango bagere nzozi zabo zatumye bayashinga. Bene aya ntayoborwa n’abaswa, ayoborwa n’abahanga usanga bafite n’impamyabumenyi zihambaye. Hari n’ashingwa ashingiye kunyungu za politiki. Bene aya agendana na politiki igezweho, ararenganya, akibasira abatayarimo kandi abayagize baharanira gufata imyanya ikomeye n’iy’ingenzi mu mitegekere y’ibihugu. Iyo babigezeho bahatira abatayirimo kuyoboka kungufu ababyanze bagakumirwa ku byiza by’igihugu,
bakanatotezwa. Bene aya imihango y’idini niyo iba ari ikintu cy’ingezi mu myemerere yabo. Uwo ariwe wese azahitemo uko ashaka twe twahisemo gukurikira Yesu Kristo n’umusaraba we (Luka 9:23-24).

6
Furaha.arine 2019-08-14 16:02:53

Andika hano.Icyoncakuvuga.nukokuruhanderwanjye.nizerako.ijururihari nifashi shije.bible.murimatayo .5;3.haravugo.hahirwaabakenemumitimayabo.kukoubwamibwomwijuru.arubwabo.tugombakuba.nukuvugango.niduharanira.ijuru tuzarijyamo.murakoze

7
JOJO 2019-08-14 12:23:58

Wenda gusengera ubuzima bwo kwisi ngo bumere neza sinzi icyo bashatse gusobanura, gusa kuri njye ndamutse nkora nkaronka nkabana nabandi neza ntahemuka ndumva nijuru rihari naba mfite itike pe

8
mazina 2019-08-14 08:16:29

Munyamakuru,ikibazo cyawe ni kiza.Wareka nkagusubiza nifashishije Bible?
Nibyo koko,abantu benshi,biganjemo abitwa Abarokore ndetse n’Abaslamu,bavuga ko "Iwabo ari mu Ijuru".Ntabwo Bible ivuga ko abeza bose bazajya mu Ijuru.Muli 2 Petero 3:13,havuga ko "dutegereje isi nshya n’ijuru rishya".Muli Imigani 2:21,22 havuga ko ku munsi w’imperuka,Imana izakura mu isi abantu babi bose,igasigaza mu isi abantu beza gusa bumvira Imana.Muli Zaburi 37:29,havuga ko Abakiranutsi bazatura mu isi iteka ryose.Ndetse muli Matayo 5:5,Yesu ubwe yavuze ko abantu beza bazatura mu isi.Muli make,nkuko twabisomye hejuru,hazabaho Ijuru n’ISI izaba paradizo,itagira ikibazo na kimwe.Nkuko Daniel 7:27 na Ibyahishuwe 5:10 havuga,abantu bazajya mu ijuru bazaba "Abami n’Abatambyi",hanyuma bategeke ISI izaba Paradizo.Ntabwo Bible ivuga ko twaremewe kuzajya mu ijuru.
Ni ikinyoma.Biterwa nuko abantu batazi neza ibyo Bible yigisha.

9
DUKUZUMUREMY Fabrice 2019-08-14 05:08:04

Gusenga nibyiza ndetse nubuzima twe twemerako ari imibereho kuko Imana dusenga numubyeyi wacu itumenyera byose kandi yaduteguriye ijuru.

Ijuru ririho kandi yesu kristo niyo nzira yukuri nubugingo muhumure ijuru ririho

Kwamamaza