IGIHE

Hateguwe igitaramo kigamije kuzamura abanyempamo bashya mu rwenya

0 24-04-2022 - saa 08:06, Mukahirwa Diane

Umunyarwenya Ndaruhutse Merci wamamaye nka Fally Merci yateguye igitaramo azahurizamo abanyarwenya batandukanye, kigamije kuzamura abanyempano bashya muri uyu mwuga.

Iki gitaramo Fally Merci yacyise Genz (Generation Z) kizajya cyiba kabiri mu mu kwezi, ku wa Kane w’icyumweru cya kabiri n’icya nyuma cy’ukwezi, ikaba ari muri gahunda yo kuzamura abanyempano no kwegereza abantu urwenya.

Iki gitaramo cyavuye mu gitekerezo Fally Merci yagize cyo kuba hajyaho uburyo abantu bashaka ahantu ho gusohokera bagaseka bajya bahabona mu buryo bworoshye.

Uyu munyarwenya kandi yari agamije kugira umusanzu atanga mu kuzamura impano nk’uko nawe yazamuwe n’abandi.

Yafashe umwanya ashakisha abafite impano yo gusetsa hirya no hino mu gihugu aza kubona 30 bazajya bakorana muri ibi bitaramo.

Mu kiganiro na IGIHE, Fally Merci yavuze ko yagize igitekerezo cyo kujya ategura ibi bitaramo kugira ngo afashe abantu kubona aho bajya bidagadurira bagaseka kandi ateze imbere impano nshya.

Ati “Nararebye mbona abantu ntibabona ibitaramo byinshi by’urwenya. Mbere habaga igitaramo kimwe ariko naravuze nti reka njye mbikora abantu bashaka ahantu bajya guseka bajye bahabona.”

“Nk’uko umuntu ashaka ahantu hari igisope akahabona cyangwa indi myidagaduro, n’abazajya bashaka urwenya bajye baza aha.”

Yakomeje avuga ko ibi bitaramo bizafasha abanyempano bashya kuzamuka mu bijyanye n’urwenya.

Ati “Nashatse uburyo nafasha abanyempano nibwo gutangira kubahitamo haza kuvamo 30, ni gahunda nari mfite yo kuvuga ngo reka nanjye ngire itafari nshyira muri uyu mwuga nk’uko Rutura yanzamuye.”

Iki gitaramo kimaze kuba inshuro eshatu, biteganyijwe ko ikindi kizaba ku wa 28 Mata 2022 cyikazitabirwa na bamwe mu banyarwenya bakiri bato bakorana na Fally Merci ndetse n’abandi bamaze kumenyekana nka Bruce The1St, Nimu Roger na Taikun Ndahiro.

Kwinjira ni 5000Fw harimo icyo kunywa kidasembuye, kizabera kuri Art Rwanda-Ubuhanzi dore ko Merci ari umwe mu banyempano baciye muri iri rushanwa.

Fally Merci yateguye iki gitaramo kugira ngo ateze imbere abanyempano bashya mu rwenya
Kibonke yatembagajwe n'abanyarwenya bitabiriye igitaramo cyashize
Iki gitaramo kigamije kuzamura abanyempano bashya mu rwenya
Merci na we azaba ari mu bazasusurutsa abantu muri iki gitaramo
Nimu Roger umaze kwamamara mu rwenya nawe azasetsa abazitabira iki gitaramo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza