IGIHE

Haruna Niyonzima agiye kugaragara muri filime ari umwe mu bakinnyi b’imena

1 17-09-2019 - saa 15:20, Uwiduhaye Theos

Kapiteni w’ikipe y’igihugu Amavubi, Haruna Niyonzima, agiye kugaragara muri filime yo muri Tanzania yitwa ’The Ring’, akinamo ari umugabo ukunda abagore cyane bigatuma uwo bashakanye amuta akajya kwicuruza.

Iyi filime yiswe ’The Ring’ yakorewe muri Tanzania, Haruna akaba ari umwe mu bakinnyi b’imena bayigaragaramo. Amashusho yayo yafashwe ubwo uyu mukinnyi usigaye akina muri AS Kigali, yakinaga muri Simba SC wo muri Tanzania.

Agace k’iyi filime kamara umunota umwe kagiye hanze, kagaragaza Haruna akina yitwa Daniel, umugore we bigaragara ko yasabwe n’agahinda akavuga ko agiye kumuta kubera ko yabaswe no kumuca inyuma.

Ati “Daniel, guhera uyu munsi sinzonera kukwizera, sinzongera kukubaha, nzibagirwa ko nigeze gukora ubukwe na we, sinzongera no kugukunda ukundi, ku bw’ibyo nzaba indaya.”

Nta byinshi biratangazwa kuri iyi filime bijyanye n’igihe izasohokera cyangwa andi makuru ajyanye n’ikorwa ryayo.

Haruna Niyonzima ni ubwa mbere azaba agaragaye muri filime, gusa mu 2013 yasohoye indirimbo yise ’Wicika Intege’ yahuriyemo na Jay Polly.

Haruna Niyonzima ni umwe mu byamamare muri Tanzania, yakiniye amakipe atandukanye akomeye arimo ayo mu Rwanda nka Rayon Sports, APR FC, Etincelles na AS Kigali; ndetse na Young Africans na Simba SC zo muri Tanzania.

Haruna yamaze imyaka umunani muri Tanzania, itandatu muriyo akaba yarayimaze akinira Yanga Africans aho yagiriye ibihe byiza ndetse aba umwe mu bakinnyi bakunzwe cyane muri iki gihugu haba mu kibuga no hanze yacyo.

Mu mpera za 2017 nibwo yatangaje ko atazakomeza gukinira Yanga, ayivamo ajya muri Simba SC nayo yo muri Tanzania. Muri uyu mwaka azakinira AS Kigali yo mu Rwanda.

Haruna Niyonzima ni umukinnyi ubirambyemo haba mu Rwanda no muri Tanzania
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
mutaganzwa imena christopher 2019-09-22 07:32:49

Nibyz da na komerezaho tumurinyima

Kwamamaza