IGIHE

Filime ya Joël Karekezi yegukanye igihembo mu iserukiramuco ryo mu Bufaransa

2 27-05-2019 - saa 08:55, Uwiduhaye Theos

Filime yitwa ‘Mercy of The Jungle’ yayobowe na Joël Karekezi yegukanye igihembo gitangwa n’akanama nkemurampaka muri Festival de Cinema de 5 Continents 2019 [F5C] ibera mu Bufaransa.

Joël Karekezi akomeje kuba ikirangirire, filime ye yitwa ‘Mercy of the Jungle’ ikomeje kwigwizaho ibihembo mu maseramuco atandukanye ku Isi.

Hari hashize iminsi mike yegukanye igihembo mu iserukiramuco ryo mu Misiri ryitwa ya Luxor African Film Festival [LAFF] aho yaherewe igihembo cya The Silver Mask of Tutankamun, gitangwa mu cyiciro kiba muri iri serukiramuco cyitwa Freedom International Competition.

Mbere yaho yari yubakiye amateka muri FESPACO yabereye muri Burkina Faso yegukana igihembo nyamukuru ndetse nyuma iyi filime yerekanwa n’ahandi hantu hatandukanye mu maserukiramuco akomeye, yongeye kwegukana igihembo.

Mu ntangiro z’umwaka yari yegukanye ibihembo bibiri muri Festival du Cinema Africain de Khouribga muri Maroc.

Ubu Mercy of The Jungle yegukanye igihembo muri Festival de Cinema de 5 Continents 2019 [F5C] ibera mu Bufaransa, ryabaga ku nshuro ya 14, iry’uyu mwaka ryatangiye guhera ku wa 17 risozwa ku wa 26 Gicurasi 2019.

Filime ya Joël Karekezi, yerekanwe muri iri serukiramuco ku wa 21 na 22 Gicurasi, ndetse nyuma iza kwegukana igihembo cyatanzwe n’akanama gatanga amanota k’urubyiruko.

Joël Karekezi yanditse kuri Facebook yishimira iki gihembo yahawe, arangije ashimangira ko ari iby’icyubahiro kuganira n’urubyiruko nyuma yo kwerekana filime ye.

Arakomeza ati “Ahazaza hari mu biganza byacu, dutangiriye ku rubyiruko.”

Filime “The Mercy of the Jungle”, irimo Nirere Shanel ikubiyemo inkuru ishushanya urugendo rw’umusirikare w’u Rwanda [ukina yitwa Xavier] watsinze urugamba nyuma akisanga mu ishyamba ryo muri Congo Kinshasa mu gice cyari cyuzuyemo abanzi.

Imara iminota 90, yanditswe na Casey Schroen, Joel Karekezi ndetse na Aurélien Bodinaux. Ifatwa ry’amashusho n’imirimo yo kuyitunganya byayobowe na Joel Karekezi.

Irimo abakinnyi nka Marc Zinga, Stéphane Bak, Ibrahim Ahmed Pino , Nirere Shanel, Kantarama Gahigiri n’abandi batandukanye.

Filime ya Karekezi iherutse kwegukana ibihembo bibiri mu iserukiramuco nyafurika rya sinema ribera i Ouagadougou muri Burkina Faso birimo n’igihembo nyamukuru cyitwa ‘l’Étalon de Yennenga’
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Francine 2019-05-28 00:32:37

Dusabe none se ko uvuga ko mwamwirukanye none mukaba mutangiye kumwiyitirira kubera ari kubona ibihembo?Ndumva niba mwaramwirukanye nta sano agifitanye namwe mugomba kumuha amahoro

2
dusabe 2019-05-27 07:21:41

Uyu muhungu ndamuzi.Yari umuhamya wa Yehova,bamwirukana mu idini yabo kubera ko yarongoye umukobwa badasezeranye.Nabajije umuyehova w’inshuti yanjye niba ibyo bihuye nuko bible ivuga.Yanyeretse muli Abakorinto ba mbere igice cya 5,umurongo wa 13,havuga ko niba uwo musengana yitwaye nabi ntiyihane mugomba kumwirukana,ndetse ntimusangire.

Kwamamaza