IGIHE

Umunyamasengesho wahoze mu ntama za Yesu muri ADEPR: Ibyo utari uzi kuri Marina

17 14-03-2019 - saa 09:52, Uwiduhaye Theos

Uwase Ingabire Marina ni umwe mu bahanzikazi bahagaze neza mu muziki w’u Rwanda muri iki gihe. Ni umukobwa w’ijwi rihebuje rihogoza benshi kandi uzi kubijyanisha no gushimisha abafana iyo ari ku rubyiniro ku buryo n’iyo byasaba ko ashinga umutwe yabikora.

Ubu afashwa n’inzu ifasha abahanzi yitwa The Mane Music Label ihagarariwe na Bad Rama.

Ubusanzwe avuka mu Karere ka Rwamagana mu Ntara y’Iburasirazuba, afite imyaka 22. Ni umwana w’imfura mu bana babiri.

Ni umukobwa ukataje muri muzika n’ubwo bamwe bamufata nk’umwana ugikambakamba muri uru ruganda. Muri Gashyantare yizihije isabukuru y’imyaka ibiri amaze atangiye gukora umuziki mu buryo bw’umwuga.

Umuziki we wiganjemo indirimbo z’urukundo zinyura benshi zikururutsa imitima y’abari kurwiyumvamo kubera imitoma aba yungikanya.

Izina Marina ubu rimaze gutumbagira ku rwego ruhambaye ndetse risigaye rifite umuriri mu itangazamakuru mu Rwanda kubera ibikorwa bye umunsi ku wundi bye.

Ubu amaze gushyira hanze indirimbo icyenda zirimo ‘Byarara bibaye’, ‘Bikakubera’, ‘Decision’ yahuriyemo na Papito, ‘Karibu’, ‘Log out’, ‘Tubisubiremo’, ‘Impano’, ‘It’s Love’ yakoranye na Uncle Austin na ‘Love You’ yahuriyemo na Harmonize.

Marina yize icungamutungo mu mashuri yisumbuye aho yasoreje mu ishuri ryisumbuye rya ESSA Nyarugunga riherereye i Kanombe mu Mujyi wa Kigali.

Uyu mukobwa avuga ko yakundaga umuziki kuva kera ariko akiyumvamo gufasha abahanzi mu miririmbire (Backing vocalist) ndetse ngo hari igihe yigeze kwandika ashaka kubikora muri Primus Guma Guma Super Star ntibyamukundira.

Ati “Numvaga mbizi ko mfite impano mu muziki ndetse mbikunda ariko ntabwo nari nzi igihe bizabera. Umuziki nifuzaga gukora wari utandukanye n’uyu nkora, nakundaga kuririmba mfasha abandi bahanzi, hari n’igihe n’igihe nanditse nshaka kujya ndirimba muri Primus Guma Guma Super Star.”

Uyu mukobwa yatangiye aririmba muri ADEPR ndetse yari umuririmbyi akaba umunyamasengesho ukomeye.

Aganira na IGIHE yagize ati “Hari korali yabaga i Rwamagana ahitwa ku Rwikubo yitwaga Intama za Yesu, rero habagamo korali y’abana naririmbagamo nyobora indirimbo. Kuva namenya ubwenge nari ndi muri korali. Navuye muri ADEPR ndangije umwaka wa gatandatu w’amashuri abanza mu wa mbere w’amashuri yisumbuye njya muri Zion Temple muri Azaph.”

Marina yavuze ko kubera imirimo itandukanye yabaga mu rusengero irimo kuyobora imiririmbire, amasengesho n’ibindi bikorwa byatumaga akenshi atabona umwanya uhagije wo gukora ibindi; yageze mu mwaka wa gatanu w’amashuri yisumbuye ahitamo kuba aretse ibikorwa byo mu rusengero.

Ati “Nakoraga umurimo w’Imana ndirimba nayobora indirimbo. Mu 2015 navuye muri korali kubera amashuri, nari ngeze mu gihe cyo kuba nakwiga cyane kandi nahoraga mu rusengero mu masubiramo y’indirimbo, amasengesho n’ibindi hanyuma kwiga bikangora.”

Marina yakuriye muri Chorale yitwa Intama za Yesu yo mu Itorero rya ADEPR i Rwamagana

Yabaye umunyamuziki bimutunguye

Marina ubundi iyo yivuga, yemeza ko hari igihe icyo yari gukora iyo ataza kuririmba. Ati “Njya nibaza nti iyo ntaza kuririmba ubu mba mbayeho gute? Ndabikunda ku buryo nta kindi nakabaye nkora uretse umuziki.”

Kumenyekana k’uyu mukobwa kwaratunguranye kuko yahamagaye kuri radiyo akaza gutsinda bikamuhesha amahirwe yo kuba umunyamuziki gutyo atari abyiteze.

Ati “Ni ibintu byabaye bitunguranye ntabipanze. Hari mu Ukuboza 2016, mvuye gusenga ari ku wa Gatatu nimugoroba. Ndataha nk’uko bisanzwe ngeze mu rugo nsanga Uncle Austin ari kuri Kiss Fm aho batangaga amarushanwa utsinze bakamuhemba.”

“Nta na telefoni icyo gihe nagiraga, mubyara wanjye arayintiza ndahamagara Austin anyitabira mu gikari, ndamubwira nti nitwa Marina ndashaka kuririmba, icyo gihe ndirimba ‘Urwo Ngukunda’ ye na Buravan.”

Yakomeje avuga ko akimara kuririmba Austin yahise amwumvisha abari bamukurikiye, ubundi benshi bagashimangira ari umukobwa ufite impano ihambaye kandi ushobora kuzagera kure muri muzika.

Yaje gutsinda ntiyabona uko avugana na Austin, hashize igihe yaka Junior Multi System bari basanzwe baziranye nimero ya telefoni y’uyu munyamakuru, amuhamagaye Austin amubwira ko yari yaramubuze bapanga guhura batangira gukorana gutyo.

Uyu muhanzikazi yavuze ko guhanga kwe biza mu buryo butangaje kuko atajya afata urupapuro ngo yandike indirimbo.

Ati “Sinzi niba navuga ko ntazi kwandika ariko sinjya mfata urupapuro n’ikaramu ngo nandike indirimbo, ntabwo nabishobora, narabigerageje biranga niyo mbigerageje haza indirimbo z’Imana. Iyo ndi muri studio ikintu nkora mbwira Producer agacuranga piano ubundi amagambo agahita yizana.”

Indirimbo ye yamutwaye igihe gito ni ‘Log out’. Nta gitekerezo afite hafi aha cyo gukora indirimbo ihimbaza Imana nubwo ari umukobwa wakurikiye mu rusengero.

Zimwe mu ndirimbo z’uyu mukobwa zakunzwe mu minsi ishize

Muri iki gihe ni umukobwa umaze gushimangira ko ari umuhanga iyo ari ku rubyiniro
Iyo bigeze ku rubyiniro avuga yanashinga umutwe ariko agashimisha abakunzi be
Amaze imyaka ibiri muri muzika ariko izina rye rimaze kuba ikimenyabose
Mupenda Ramadhan uzwi nka Baad Rama ni we mujyanama Marina
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
GOGO 2019-05-08 09:43:47

Oh! GUSA SINAGUCIRA URUBANZA KUKO UWITEKA NIWE MUCAMANZA UTABERA GUSA ICYO
NAGUSABIRA NUKO IMANA YAGUHINDURA NKUKO YAHINDUYE SAWULI AGAHINDUKA PAWULO
KUGEZA UBU URACYARI UMWANA MUTO WAKAGOBYE GUKORARA IMANA UGIFITE IMBARAGA GUSA ICYO NZI NUKO SATANI AJYA AHEMBA NABI NIBA KOKO WARAKORARAGA IMANA UBIKUNZE KOKO BUJYA IREBA MU MUTIMA KUKO KIJYA GIHE UKORARA IMANA WARWANYAGA SATANI UTANGIRA YO YARABYIBAGIWE IRAKWIBIKIYE NTAGO IGUKUNZE IBYIZA NUKO IMANA WAYIGARUKIRA NAYO IKAKUZAHO KUKO IJAMBO RYAYO RIBIVUGANEZA DUSHAKE UBWAMI BWAYO NO GUKIRAKA IBINDI IZABITWONGERERA.

2
gatare 2019-03-15 03:53:47

Abanditse hano benshi,barashaka kwerekana ko uyu mukobwa yahoze ari "umukristu nyakuri".
Baribeshya cyane.Aba biyita abarokore,akenshi biba ari ibigambo gusa.Bible ivuga ko bafite ishusho yo kwera.Ibyo bavuga bitandukanye n’ibyo bakora.Ikindi kandi,muli Matayo 24:13,Yesu yavuze ko umuntu azamenya ko arokotse ku munsi w’imperuka,ubwo Imana izarimbura abantu bose bakora ibyo itubuza wowe ugasigara.

3
Byiza 2019-03-15 02:48:02

Gutangira neza ukarangiza nabi ni ishyano. Nutihana ngo ugaruke mu murimo w’Imana uzarimbuka kuko inziza urimo igana irimbukiro.

4
Byiza 2019-03-15 02:23:31

Gutangira neza ukarangiza nabi ni ishyano. Nutihana ngo ugaruke mu murimo w’Imana uzarimbuka kuko inziza urimo igana irimbukiro.

5
Bienvenue 2019-03-15 02:09:24

Arambabaje gusa nta kindi!
Sinari nzi ko yigeze kuba uwo mu rusengero. Ni akumiro kabisa!

6
Bienvenue 2019-03-15 02:09:24

Arambabaje gusa nta kindi!
Sinari nzi ko yigeze kuba uwo mu rusengero. Ni akumiro kabisa!

7
Dumbuli 2019-03-15 01:46:50

Mana yanjye Uwase Ingabire ntacyo ngushinja ni amahitamo yawe nuko wabanye n’Imana yawe, Marina yaraparitse ibyo gusenga yigira kureba uburyo ibyo mu isi a none bihagaze Satani natakwiba uzagaruka ucumbukure cga uzagendereka . none ibyo urimo urabizi kdi urabishaka ADPR yari yarakubujije byinshi none uri mu bwisanzure

8
silas 2019-03-14 15:31:28

satani ahemba nabi

9
Ezra mpyisi nanjye ndabyemeye 2019-03-14 11:32:42

Gucirana imanza. Turabizi, ninde mwambwira udakora ibibi ninde?! Uwatararemewe gukorera Imana ninde?! Weho irebe aho wicaye maze wikorere igenzura. Naho ubundi tuzatungurwa no gusanga abo twaciraga imanza aribo baridutanzemo. Bijya bibaho no m ubuzima, umuntu ukamutongera ukamucira iteka bikarangira uje inyuma ye, wifuza uko abayeho.

10
Nzayisenga 2019-03-14 10:43:53

Nina yari umunyamasengesho akabireka araje aboneko indamu y’isi ari nk’umurama utumuka.biragatsindwa gutangiz iby’umwuka ugaheruka iby’umubiri.birababaje

Paji: 1 | 2  

Kwamamaza