Somi yacyeje u Rwanda azataramiramo ko nta wabona aho arunenga nk’ibindi bihugu bya Afurika

1 12-02-2018 - saa 22:22, Dusabimana Aimable

Somi, umuhanzikazi ufite inkomoko mu Rwanda ariko akaba akorera umuziki muri Leta Zunze Ubumwe za Amerika yageze i Kigali kuri uyu wa Mbere, aje kuririmba mu gitaramo kizabera muri Marriot Hotel, ashima iterambere ry’igihugu ryigaragaza mu nzego zitandukanye.

Somi ni umuririmbyi ukomoka ku mubyeyi w’Umunyarwanda ariko wavukiye akanakurira i Champaign muri Leta ya Illinois. Yamamaye cyane mu njyana ya Jazz ndetse afitanye amasezerano n’iyi nzu itunganya umuziki ya Sony Music basinyanye muri Kanama 2013, i New York, aho asanzwe akorera ibikorwa bye bya muzika.

Agiye gutaramira mu Rwanda nyuma y’iminsi ahawe igihembo gikomeye mu cyiciro cy’abakoze album zifite umwihariko mu njyana ya Jazz mu bya NAACP Image Awards byatanzwe ku nshuro ya 49 mu birori byabaye ku itariki ya 14 Mutarama 2018; byabereye ahitwa Pasadena Conference Center mu Mujyi wa Los Angeles.

Nyuma yo gusesekara i Kigali ku gicamunsi cyo kuri uyu wa Mbere, yagiranye ikiganiro n’itangazamakuru ku mugoroba asobanura byimbitse ibyerekeye urugendo rwe mu Rwanda ndetse n’igitaramo azahakorera ku wa 13 Gashyantare 2018.

Somi yavuze ko amaze iminsi mu rugendo rw’ibitaramo mu bihugu bitandukanye bya Afurika ndetse yagombaga kwerekeza i Johannesburg muri Afurika y’Epfo avuye i Zanzibar ariko akaba yarifuje kuza mu Rwanda ku ivuko akahataramira.

Yagize ati "Ni iby’igiciro cyinshi kuba ndi hano iwacu, turi hano muri Afurika y’Iburasirazuba n’itsinda rincurangira, byari kuba bibabaje kudasura Umurwa Mukuru Kigali ngo mbasuhuze ndetse twishimire ibyiza bimaze kugerwaho muri uyu mwaka ndetse twishimire kwereka amahanga u Rwanda ndetse n’Umugabane wa Afurika."

Yasobanuye ako akunze kuza mu Rwanda, yaheherukahga mu Ukuboza 2017; aza cyane mu biruhuko, ubukwe n’ibindi bikorwa bwite.

Ntiyahishe amarangamutima ye ku givugu cye cy’inkomoko, ati “ Nterwa ishema n’impinduka, ibigerwaho n’urugero u Rwanda ruha abandi ku mugabane.”

Yakomeje ati "Ngira ishema cyane iyo nibutse ku nshuro ya mbere nza kuririmbira inaha mu 2004, biranshimisha cyane rero kubona ibyagezweho nyuma y’imyaka 14 ishize. Ntabwo nibanze cyane ku bintu bihenze bihari nabyo kandi bidasanzwe nka Convention Centre, imitako mperuka mu minsi mikuru n’ibindi, ndavuga n’ibindi byose, nk’iyo wumvise umubare w’abagore mu Nteko Ishinga Amategeko, gahunda y’Umujyi utoshye, isuku n’izindi ngero aho hose u Rwanda rutanga urugero."

"Nishimiye cyane uko Guverinoma, urubyiruko n’abandi mu gihugu bashyize imbaraga mu kubaka u Rwanda rwatera ishema buri wese, abantu bashobora kunenga uko bashaka ariko nyuma usuzumye ubona ko hari byinshi biri gukorwa ndetse ntiwabona n’aho uhera uvuga bya bintu bibi abandi bakunze kuvuga ku bindi bihugu bya Afurika. Ibyo ni bimwe mu bintera ishema buri uko nje iwacu."

Umuyobozi ushinzwe kwamamaza ibikorwa muri Bralirwa, Patricia Garuka Mugume, yavuze ko bishimiye gushyigikira igitaramo cya Somi binyuze mu kinyobwa cya Mutzig.

Yagize ati "Ni iby’igiciro gikomeye kuba mu ruhare rw’itegurwa ry’iki gikorwa, uyu mwaka tuzakoranira bya hafi n’abanyamuziki kandi ntekereza ko nta buryo bwiza bwo gutangira buruta gufatanya na Somi wubatse izina muri Jazz ku Isi, ikiruta ibindi ni uko akomoka ku Rwanda byumvikane rero ko ari uwacu. Ni ibintu byiza kuri twe, dutegerezanyije amatsiko ejo kandi twiteguye ko bizaba ibidasanzwe, dusaba abantu kuzitabira kugira ngo baryoherwe n’iki gikorwa."

Eric Soul uyoboye Afrogroov yateguye iki gitaramo yavuze ko imyiteguro yarangiye nubwo bitatwaye igihe kirekire kukimenyekanisha bizeye umusaruro mwiza.

Pablo Aronso ushinzwe iyamamazabikorwa muri Marriot Hotel yavuze ko bishimiye kuba bagiye kwakira umuririmbyi ukomeye mu njyana ya Jazz ku rwego nk’urwa Somi by’umwihariko akaba anafite inkomoko ku Rwanda.

"Abenshi dutuye hanze tuzi cyane umuziki wa Kayirebwa"

Somi ubusanzwe witwa Laura Kabasomi Kakoma, ni umuririmbyi ukomeye w’imyaka 38, mwene Dr. Ibulaimu Kakoma na Elizabeth Nyarubona Kakoma.

Nubwo atavukiye mu Rwanda yumvikanisha ko azi amagambo amwe namwe y’Ikinyarwanda ariko ngo nta byinshi azi ku bahanzi cyangwa umuziki ukorerwa mu gihugu.

Yavuze ko umuhanzi rukumbi yakuze azi wo mu Rwanda ari Cecile Kayirebwa ndetse ngo benshi mu rungano rwe n’ababa hanze y’u Rwanda niwe bazi.

Yagize ati "Nakuze nzi Cecile Kayirebwa, ni umuntu abantu benshi baba hanze bakunda kumva indirimbo ze nyinshi, gusa mu by’ukuri nta byinshi nzi ku muziki w’u Rwanda. Ni ikintu ntekereza ko ngiye gushyiramo imbaraga no kugirana imikoranire n’abandi hano mu Rwanda ndetse no muri Afurika y’Iburasirazuba. Uyu mwaka nizeye ko nziga byinshi."

Somi afite icyiciro cya gatatu cya kaminuza mu bijyanye n’ubuhanzi, yavanye muri New York University’s Tisch School of the Arts.

Somi waje gutaramira mu Rwanda
Pablo Alonso ushinzwe iyamamazabikorwa muri Marriot Hotel yavuze ko bishimiye kuba igitaramo cy'uyu muhanzi kigiye kuhabera
Eric Soul wateguye igitaramo Somi yaje gususurutsamo Abanyakigali
Somi n'abagize uruhare mu itegurwa ry'igitaramo cye mu Rwanda bafata ifoto y'urwibutso
Somi yaganiriye n'abanyamakuru nyuma y'isaha imwe n'igice ageze mu Rwanda
Umuyobozi ushinzwe kwamamaza ibikorwa muri Bralirwa, Patricia Garuka Mugume yavuze ko bishimiye gushyigikira igitaramo cya Somi
Umuyobozi wa Isaano iri mu bagize uruhare rukomeye mu itegurwa ry'iki gitaramo, Judo Kanobana
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
uwacu 2018-02-13 01:39:57

Uyu mukobwa ni umunyakuri cyane, ati nzi Kayirebwa gusa ndetse n’abandi tubana iyo niwe bumva gusa
Ubwo se muragirango haricyo atabwiye abahanzi nyarwanda? Ubundi mbaze bariya babayo ko numva bakora indirimbo zigera inaha gute abo muri America batazizi?

Kwamamaza