Zari yasobanuye byimbitse uko abanye na Diamond nyuma y’iminsi urugo rwabo ruvugwamo umwiryane waturutse ku kuba umugabo yaramuciye inyuma akabyara umwana ku ruhande.

Aba bombi bari bamaze iminsi mu itangazamakuru bavugwaho gutandukana ndetse hakagaragazwa n’ibimenyetso bitandukanye byemeza ko batagicana uwaka. Diamond na Zari bari baherutse gusiba amafoto yose bahuriramo ku mbuga nkoranyambaga bakoresha, ndetse umugore akura izina ry’umugabo kuri konti z’abantu babyaranye, ibintu byatumye bamwe bemeza itandukana ryabo.

Ikinyamakuru Daily Nation cyatangaje ko Zari yemeje ko atigeze atandukana na Diamond mu kiganiro yagiranye n’imwe muri radiyo zikomeye muri Tanzania.

Muri icyo kiganiro, Zari yagize ati "Namwifurije isabukuru nziza bitari ku karubanda, naramwandikiye kuri WhatsApp. Turi kugerageza guhungisha imbuga nkoranyambaga ubuzima bwacu twembi. Nubwo uko tugerageza kubuhakura ariko ahubwo burushaho kuhagarurwa, nta kintu nk’icyo cyabayeho, turi kumwe tumeze neza."

Yongeye ati "Hari ibibazo bito bito biri kuba gusa ntaho bihuriye n’ibyo."

Zari yabajijwe niba ibyo yemeje ko akiri kumwe na Diamond atari ku mpamvu z’ubucuruzi n’amasezerano bari barasinyanye n’ibigo bikomeye bafatanyije kuko mu minsi ishize byakunze kugarukwaho ko baramutse batandukanye bagira igihombo gikomeye ndetse amasezerano yo kwamamaza bafitanye n’ikigo cyitwa Gmnetic agaseswa.

Yagize ati "Tuzi neza amasezerano twagiranye na Gmnetic kandi tuzakomeza gukorana nk’uko mu nyandiko bigenwe ku bw’ibyo nta kintu cyo guhangayikira rwose. Ndabizi ko hagiye kubaho ibintu bitandukanye hagahwihwiswa byinshi kuko nyine tuzwi ariko iyo bije mu kwamamaza tubifata nk’akazi."

Ibinyamakuru bitandukanye mu karere byahise bitangira gutangaza ko ibyo uyu mugore yatangaje byaba ari mu mayeri yo kwamamaza icyo kigo kigo mu gihe ibindi byirinze kugira icyo bivuga ku magambo ya Zari wemeje mu buryo butunguranye ko ataratandukana na Diamond.

Diamond Platnumz na Zari Hassan uri mu bagore b’ibyamamare muri Afurika y’Uburasirazuba, babana kuva muri 2014 ariko ntabwo bigeze bashyingiranwa. Bafitanye abana babiri biyongera ku bandi batatu umugore yabyaranye na Ivan Ssemwanga, umugabo we wa mbere uherutse kwitaba Imana.

Umwana wa mbere Zari yabyaranye na Diamond yavutse ku wa 6 Kanama 2015, amwita Lattifah Naseeb [Tiffah Dangote]. Bafitanye n’umuhungu bise Prince Nillan Dangote.

Amakuru y’itandukana ry’aba bombi yadutse biturutse ku magambo yavuzwe na Diamond mu kiganiro yagiranye na Clouds Fm yo muri Tanzania ku itariki 19 Nzeri 2017, akemeza amakuru yamuvugwagaho ko yabyaranye na Hamisa Mobetto, umunyamideli yakoresheje mu mashusho y’indirimbo ye yitwa ’Salome’.

Diamond yaciye inyuma Zari abyarana n'umunyamideli yakoresheje mu mashusho y'indirimbo
Zari na Diamond ngo baracyari kumwe nubwo umugabo yemeye ko yabyaye ku ruhande
Zari yavuze ko ngo impamvu basibye amafoto bahuriramo ku mbuga nkoranyambaga ari ukugerageza kuhakura ubuzima bwite bwabo


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved