Umuririmbyi David Mugema yatangiye kuburanishwa ku cyaha akurikiranyweho n’ubutabera bwa Uganda cyo kubuza amahoro n’umudendezo Perezida Yoweri Kaguta Museveni.

David Mugema uzwi mu ndirimbo ‘Wegumye’ agiye kumara amezi abiri afungiwe muri Gereza ya Luzira aryozwa kuririmba no gusakaza ubutumwa bugamije kubuza ituze Perezida wa Uganda Yoweri Museveni.

Ikinyamakuru Daily Monitor cyatangaje ko umuhanzi David Mugema w’imyaka 31 afunganywe na producer Jonah Muwanguzi w’imyaka 23. Aba bombi bashinjwa ubufatanyacyaha mu gukora indirimbo yitwa ‘Wumula’ ifatwa nk’iyuzuyemo ubutumwa bugambiriye kubuza amahwemo Perezida Museveni.

Kuri uyu wa Kabiri aba bombi bagejejwe mu rukiko rwa Buganda, basomewe ibyaha baregwa birimo icyo gutuka no kubuza amahoro Perezida Museveni[iki gishinjwa David Mugema] n’ikindi cyo gukwirakwiza ubutumwa bubuza ituze Umukuru w’Igihugu[iki bagihuriyemo bombi].

Ibyaha David Mugema na mugenzi we bashinjwa babihakanye ndetse bahita basaba urukiko ko rwabitesha agaciro rukabarekura bagataha. Icyifuzo cy’ababuranyi bombi cyamaganiwe kure n’urukiko.

David Mugema na producer Jonah Muwanguzi bagejejwe mu rukiko

Ubushinjacyaha buvuga ko ibyaha aba bombi bakurikiranywemo babikoze hagati y’umwaka wa 2015 na 2017 muri Studio ya Producer Muwanguzi iherereye mu gace ka Makindye.


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved