Prof. Peter Anyang’ Nyong’o, umubyeyi wa Lupita Nyong’o ukomoka ku Banya-Kenya wamamaye mu mwuga wa sinema ku Isi, yegukanye intsinzi mu matora y’ugomba kuyobora Intara ya Kisumu yo muri Kenya.

Uyu musaza w’imyaka 71 y’amavuko usanzwe ari umunyapolitiki ukomeye muri Kenya, abarizwa mu ishyaka rya National Super Alliance (NASA) riyobowe na Raila Odinga uri ku isonga mu bateje impaka mu matora y’Umukuru w’Igihugu.

Sahara Reporters yatangaje ko mu majwi yabaruwe kuri site z’itora zingana na 83%, Prof. Anyang’ Nyong’o yatorewe kuyobora iyo ntara n’amajwi y’abamutoye 252, 490 (63%), yatsinze abandi bari bahanganye barimo Jackton Ramguma watowe n’abantu 141, 320 (36%) n’uwitwa Christine Otieno wagize amajwi 1919 (1%).

Mu majwi y’agateganyo amaze kubarurwa ku mwanya w’Umukuru w’Igihugu, Komisiyo y’Amatora muri Kenya (IEBC) itangaza ko Uhuru Kenyatta wo mu ishyaka Jubilee ari imbere n’abamutoye bangana na miliyoni 8.0, mu gihe Raila Odinga wo mu ishyaka NASA rinabarizwamo umubyeyi wa Lupita Nyong’o yatowe n’abantu miliyoni 6.6.

Lupita Nyong’o wabyawe na Prof. Anyang’ Nyong’o, watorewe kuyobora Intara ya Kisumu, izina rye ryatangiye kuvugwa cyane muri 2014 ubwo yegukanaga igihembo cya Oscar abikesha uko yakinnye muri filime yitwa ’12 Years A Slave’.

Mu minsi ishize byaherukaga kuvugwa ko uyu mukobwa azahurira muri filime n’icyamamare Rihanna, nyuma y’uko abo bombi babisabwe n’ababakurikira ku rubuga rwa Twitter biturutse ku ifoto bifotoranyije muri 2014 ubwo bari bahuriye mu birori by’imideli bya Miu Miu byabereye mu Mujyi wa Paris.

Prof. Peter Anyang’ Nyong’o yatorewe kuyobora Kisumu
Lupita Nyong'o wavukiye muri Mexico ukomoka ku babyeyi b'Abanya-Kenya, amaze kubaka izina mu buryo bukomeye ku Isi


Kwamamaza

ANDIKA ICYO UTEKEREZA KURI IYI NKURU

Izina

Email


IBITEKEREZO

ANDI MAKURU

2009 - 2017 ©. All rights reserved